17
[Sie Pre Lal David]
Pre Lun Sie Mwet Wangin Mwata
O LEUM GOD, porongo ke nga kwafe sum ke nununku suwohs;
Lipsre pang luk ke nga suk kasru sum!
Porongeyu ke nga pre ke inse nasnas.
Lela tuh nununku lom in wo nu sik
Mweyen kom etu ma pwaye.
 
Kom etu na insiuk.
Kom sikme nu sik ke fong.
Kom arulana suk ouiyuk
Ac kom tia konauk kutena nunak koluk in nga.
Nga tia fahk kutena ma koluk, oana ke mwet saya oru;
Nga akos na ma sap lom
Ac nga tia fahsr ke inkanek lun mwet sulallal.
Nga fahsr ke inkanek lom in pacl nukewa,
Ac tiana kuhfla liki.
 
Nga pre nu sum, O God, mweyen kom topukyu;
Ke ma inge, forma nu sik ac porongo kas luk.
Akkalemye lungse wolana lom ac moliyula;
Ke nga muta siskom nga moulla liki mwet lokoalok luk.
 
Karinginyu oana ke kom karingin atronmotom sifacna;
Wikinyula ye lulin poum,
Liki anwuk lun mwet koluk.
Mwet lokoalok akmas elos rauniyula;
10 Wangin pakomuta lalos ac elos kaskas filang.
11 Elos rauniyula yen nukewa nga forla nu we,
Ac elos suk na pacl wo lalos in uniyuwi.
12 Elos soaneyu oana kosro lion,
Ac kena sreyuwi nu ke ip srisrik.
 
13 Fahsru, O LEUM GOD! Lain mwet lokoalok luk ac kutangulosla!
Moliyula liki mwet koluk ke cutlass nutum;
14 Moliyula lukelos su eis insewowo lalos in moul se inge.
Kaelos ke ongoiya su kom elosak nu selos;
Oru in yohk tuh in sun pac tulik natulos,
Ac in oasr pac ma lula nu sin tulik nutin tulik natulos!
 
15 A funu nga, nga ac fah liye kom, mweyen nga tia oru ma koluk;
Ac ke nga ngutalik, nga fah arulana engan ke sripen kom muta yuruk.