37
[Psalm lal David]
Saflaiyen Inkanek Lun Mwet Koluk Ac Lun Mwet Wo
1 Nikmet elya ke ma mwet koluk elos oru;
Ac nik kom sok selos su oru ma sufal.
2 Tuh elos ac fah sa in wanginla oana mah,
Ac uli oana mahsrik.
3 Lulalfongi in LEUM GOD ac oru ma wo;
Tuh kom fah ku in moul ac misla fin facl se inge.
4 Suk engan lom in LEUM GOD,
Ac El ac fah asot ma lungse lun insiom.
5 Eiskomyang sifacna nu sin LEUM GOD;
Lulalfongel, ac El ac fah kasrekom.
6 El ac fah oru suwoswos lom in arulana kalem,
Oana kalmen faht ke infulwen len.
7 Kom in mongfisrasr ac tupan ma LEUM GOD El fah oru;
Nikmet elya kaclos su kapkapak,
Ku elos su eis woiyen pwapa kutasrik lalos.
8 Nik kom eiskomyang in fosrnga ku kasrkusrak;
Ma inge mwe kolla nu ke ongoiya.
9 Elos su lulalfongi LEUM GOD fah usrui acn uh,
A mwet koluk fah lisyukla.
10 Ac tia paht mwet koluk fah wanginla;
Kom finne sokolos, kom ac tia konalosyak.
11 A mwet fakpap ac fah usrui acn uh,
Ac elos fah engankin mwe insewowo ac misla.Mt 5:5
12 Mwet koluk elos pwapa in lain mwet wo;
Elos suelosi ke kasrkusrak.
13 Tusruktu Leum El isrun mwet koluk,
Mweyen El etu lah elos ac fah sa in kunausyukla.
14 Mwet koluk elos faisak cutlass natulos ac akola pisr natulos
In uniya mwet sukasrup ac mwet enenu,
In onelosi su oru ma suwohs;
15 Tusruktu elos ac fah anwuki ke cutlass natulos sifacna,
Ac pisr natulos fah kotkot uh.
16 Finne pu ma su oan yurin sie mwet wo,
A yohk sripa liki na mwe kasrup puspis su oan yurin mwet koluk nukewa,
17 Mweyen LEUM GOD El ac fah eisla ku lun mwet koluk,
Ac karinganulos su wo.
18 LEUM GOD El karinganulos su aksol,
Ac acn uh fah ma lalos nwe tok.
19 Elos ac fah tia keok in pacl koluk;
Elos ac fah kihp in pacl sracl.
20 A mwet koluk elos ac fah misa;
Mwet lokoalok lun LEUM GOD elos ac fah wanginla oana ros inimae;
Elos fah wanginla oana kulasr.
21 Mwet koluk elos ngusr ac tia folokin,
A mwet wo elos sang ke kulang.
22 Elos su akinsewowoyeyuk sin LEUM GOD fah usrui acn uh,
A elos su selngawiyuk sel fah lisyukla.
23 LEUM GOD El kol mwet uh ke inkanek fal elos in fahsr kac,
Ac El karinganulos su akinsewowoyal.
24 Elos fin ikori, elos ac fah tia mutana ten,
Mweyen LEUM GOD El ac tulokunulosyak.
25 Nga matuoh inge; nga moul paht na,
Tusruktu nga soenna liye sie mwet wo in pilesreyuk sin LEUM GOD,
Ku tulik natul in ngusr mwe mongo.
26 In pacl nukewa el insewowo in sang mwe kite nu sin mwet, ac tia tupan in eis molo,
Ac tulik natul elos mwe insewowo.
27 Forla liki ma koluk ac oru ma wo,
Na fwil nutum elos ac fah mutana fin facl se inge;
28 Tuh LEUM GOD El lungse ma suwohs,
Ac El tia pilesralos su oaru nu sel.
El karinganulos nwe tok,
A fwil nutin mwet koluk fah lisyukla.
29 Mwet suwoswos fah usrui acn uh,
Ac elos ac fah muta fac ma pahtpat.
30 Kas lun sie mwet wo, kas lalmwetmet,
Ac ma el oru uh suwohs pacl nukewa.
31 El sruokya ma sap lun God lal ke insial
Ac tiana fahsr liki.
32 Sie mwet koluk el tawi mwet wo
Ac suk in unilya.
33 Tusruktu LEUM GOD El ac tia eisalang nu ye ku lun mwet lokoalok lal,
Ac El ac tia lela in itukyang mwatal ke pacl in nununku nu sel.
34 Filiya finsrak lom in LEUM GOD ac akos ma sap lal;
El ac fah akfulatye kom ke El asot sie facl tuh in mwe usru lom,
Ac kom ac fah liye ke mwet koluk elos lisyukyak.
35 Sie pacl ah nga liye sie mwet koluk su arulana sulallal;
El fulat liki mwet nukewa, oana soko sak cedar in acn Lebanon,
36 Tusruktu tok ke nga fahsryak we el wangin;
Nga sokol a nga tia ku in konalak.
37 Liye mwet wo, ac tuni mwet suwoswos;
Oasr fwilin tulik nutin mwet su moul in misla,
38 A mwet koluk elos kunausyukla,
Ac fwilin tulik natulos sikiyukla.
39 LEUM GOD El molela mwet suwoswos
Ac El karinganulos in pacl in ongoiya.
40 El kasrelos ac molelosla;
El loangelos liki poun mwet koluk
Mweyen elos sokol in wikla yorol.