71
Pre Lun Sie Mwet Matu
1 LEUM GOD, nga tuku in wikla yurum;
Nikmet lela in kutangyukla nga.
2 Ke suwoswos lom, kom in kasreyu ac loangeyu.
Porongeyu ac moliyula.
3 Kom fah eot in molela luk,
Ac nien wikla ku luk in langoeyu,
Tuh kom eot ku ac nien muta ku luk.
4 O God luk, moliyula liki poun mwet koluk,
Liki ku lun mwet sesuwos ac mwet sulallal.
5 LEUM GOD Kulana, nga filiya finsrak luk in kom;
Nga nuna lulalfongi kom oe ke pacl nga srakna tulik.
6 Nga nuna lulalfongi kom in moul luk nufon.
Kom karinginyu na oe ke nga isusla ah me.
Nga ac fah kaksakin kom pacl e nukewa.
7 Moul luk sie mwe srikasrak nu sin mwet pus,
Mweyen kom mwet kasru ku luk.
8 Ke len nufon nga kaksakin kom
Ac fahkak wolana lom.
9 Nikmet sisyula inge ke nga matuoh;
Ac nikmet ngetla likiyu inge ke nga munasla.
10 Mwet lokoalok luk lungse in uniyuwi,
Elos kaskas keik ac pwapa in lainyu.
11 Elos fahk, “God El sisella tari.
Kut som sruokilya,
Tuh wangin mwet ac molella.”
12 O God, nikmet muta loesla likiyu,
God luk, aksaye kasreyu.
13 Lela tuh elos su lainyu
In kutangyukla ac kunausyukla.
Lela tuh elos su suk in akkolukyeyu
In akmwekinyeyuk ac akkolukyeyuk.
14 Nga ac fah filiya finsrak luk in kom pacl e nukewa;
Nga fah kalwenina in akyokye pusren kaksak luk nu sum.
15 Nga ac fah fahkak wolana lom —
Ke lusenna len uh nga fah sramsram ke molela lom,
Finne yohk liki na ma nga ku in kalem kac.
16 Nga ac fah fahsr ke ku lun LEUM GOD,
Nga fah fahkak wolana lom, tuh kom mukena wo.
17 God, kom lutiyu ke nga tulik me,
Ac nga srakna fahkak orekma wolana lom.
18 Inge ke nga matuoh ac fiaya,
O God, nik kom fahsr likiyu.
Wiyu ke nga fahkak ku lulap lom
Nu sin fwil nukewa su ac fah tuku.
19 Suwoswos lom, O God, sowak ac sun kusrao,
Tuh kom oru ma usrnguk;
Wangin sie oana kom.
20 Kom tuh supwama mwe ongoiya ac mwe keok nu fuk,
Tusruktu kom ac fah sifil folokonma ku luk.
Kom ac fah sruokyuwi liki inkulyuk uh.
21 Kom ac fah oru tuh nga in fulat liki meet,
Ac kom fah sifil akwoyeyu.
22 Pwaye nga ac fah kaksakin kom ke pusren harp;
Nga ac fah kaksakin oaru lom, God luk.
Nga fah sritalkin harp nutik in on nu sum,
Kom su Mutallana lun Israel.
23 Nga ac fah wowoyak ke engan ke nga srital nu sum;
Ke moul luk nufon nga ac fah on,
Mweyen kom moliyula.
24 Nga ac fah kaskas ke suwoswos lom ke lusen len nufon,
Mweyen elos su srike in akkolukyeyu
Elos kutangyukla ac aklusrongtenyeyukla.