76
[Psalm lal Asaph]
God, El Su Kutangla
1 God El eteyuk in Judah,
Inel akfulatyeyuk in Israel.
2 Lohm sel oasr in Jerusalem,
Ac El muta Fineol Zion.
3 Ingo El kotalik sukan pisr nutin mwet lokoalok,
Oayapa mwe loang ac cutlass natulos, aok, mwe mweun nukewa natulos.
4 Fuka lupan wolana lom, O God,
Fuka akfulatyeyom ke kom foloko liki eol uh
Yen kom kutangla mwet lokoalok lom we.
5 Ma nukewa lun mwet mweun pulaik lalos itukla lukelos,
Ac inge elos topelik misa, oana mwet motul;
Wanginla sripen ku ac pah in mweun lalos.
6 Ke kom aksangengyalos, O God lal Jacob,
Horse uh ac elos su muta fac elos nikanulosla ac misa.
7 A kom, LEUM GOD, mwet nukewa sangeng sum.
Wangin sie ku in tu ye motom
In pacl kom kasrkusrak.
8 Kom oru nununku lom in kalem inkusrao me,
Ac faclu sangeng kac ac mihslana
9 Ke kom tuyak in oru nununku lom
In molelosla nukewa su akkeokyeyuk fin faclu.
10 Kasrkusrak lun mwet uh oru tuh in yokelik kaksak nu sum.
Elos su painmoulla tukun mweun, elos ac fah wi alu nu sum ke len fulat lom.
11 Sang nu sin LEUM GOD lom ma kom wulela nu sel.
Use mwe sang nu sel, kowos mutunfacl nukewa su apkuran.
Tuh God El oru mwet nukewa in sangeng sel —
12 El akpusiselye fisrak,
Ac aksangengye tokosra pwengpeng.