85
[Psalm Lun Tulik Natul Korah]
Pre Ke Misla Nu Sin Mwet Israel
LEUM GOD, kom pakoten nu sin facl sum;
Kom oru tuh Israel in sifilpa kapkapak.
Kom nunak munas nu sin mwet lom ke ma koluk lalos
Ac kom eela ma sutuu lalos nukewa.
Kom sisla sulung lom nukewa lukelos
Ac forla liki folak lun mulat lom.
 
Sifil furokkutwot, O God, Mwet Lango lasr,
Ac tulokinya sulung lom nu sesr.
Ya kom ac mulat sesr nwe tok?
Ya kasrkusrak lom ac tiana tui?
Oru tuh kut in sifil kui,
Na kut su mwet lom, fah kaksakin kom.
Akkalemye nu sesr lungse kawil lom, O LEUM GOD,
Kasrekut ac molikutla.
 
Nga porongo na ma LEUM GOD El fahk,
Tuh El wulema misla nu sesr, mwet lal,
Kut fin tia sifil folokla nu ke inkanek lalfon lasr meet.
Pwayena lah El akola in molelosla nukewa su akfulatyal,
Ac wolana lal, su mwe loango nu sesr, fah oanna in facl sesr.
 
10 Lungkulang ac oaru ac fah osun;
Suwoswos ac misla ac fah asruoki.
11 Oaru lun mwet uh fah sowak liki faclu nu lucng,
Ac suwoswos lun God fah ngeti inkusrao me.
12  LEUM GOD El ac fah oru tuh kut in kapkapak,
Ac facl sesr fah isus fahko wo.
13 Suwoswos fah fahsr meet liki LEUM GOD
Ac akoo inkanek lal.