94
God El Nununku Mwet Nukewa
LEUM GOD, kom sie God su kai ma koluk;
Fahkak mulat lom!
Kom mwet nununku lun mwet nukewa faclu;
Tuyak ac oru nu sin mwet filang ma fal nu selos!
Mwet koluk inge ac engan putaka?
LEUM GOD, elos ac konkin nwe ngac?
Mwet orekma koluk elos ac inse fulat
Ac tungakkin ma koluk lalos nwe ngac?
 
Elos itungya mwet lom, LEUM GOD,
Ac akkeokye mwet su ma lom.
Elos uniya katinmas ac tulik mukaimtal,
Ac akmuseya mwetsac su muta in facl sesr.
Elos fahk, “LEUM GOD El tia liye kut;
God lun Israel El tia akilen ma inge.”
 
Mwet luk, efu ku kowos arulana lalfon?
Kowos ac etala ngac?
God El orala insrasr — ya El ku in tia lohng?
El orala mutasr — ya El ku in tia liye?
10 El mulat nu sin mutunfacl — ya el ac tia kaelos?
El su luti mwet nukewa — ya pwaye wangin etu lal?
11  LEUM GOD El etu ma elos nunku;
El etu lah wangin kalmen nunak lalos. 1 Cor 3:20
 
12 O LEUM GOD, insewowo mwet se su kom luti,
El su kom luti ke ma sap lom.
13 Kom sang mongla nu sel ke len in ongoiya,
Nwe ke pacl se pukpukyak sie luf in sruokya mwet koluk.
14  LEUM GOD El ac fah tia sisla mwet lal,
Ac El ac fah tia som lukelos.
15 Ac fah sifil koneyukyak nununku suwohs ke iwen nununku;
Ac mwet suwoswos nukewa ac fah akkeye.
16 Ku su ac tuyak keik in lain mwet koluk?
Ac su ac wiyuyak lain elos su orek ma koluk?
17  LEUM GOD El funu tia kasreyu
Na ngunik lukun sa na som nu ke facl se wangin pusra lohngyuk we.* facl se wangin pusra lohngyuk we: facl sin mwet misa, liye Psa 6:5
18 Nga fahk, “Nga ikori,”
Na lungse kawil lom, O LEUM GOD, tapukyuyak.
19 Ke pacl nga fohsak ke nunak pus insiuk,
Kom akwoyeyu ac akenganye ngunik.
 
20 Kom tia welulos su oru nununku sesuwos,
Su oru mu ma koluk uh wo —
21 Su pwapa sulallal lain mwet suwohs
Ac wotela tuh mwet wangin mwata in anwuki.
22 A LEUM GOD El loangeyu;
God luk El nien moul luk.
23 El ac fah kaelos ke koluk lalos,
Ac kunauselosla ke ma koluk lalos;
LEUM GOD lasr El ac fah kunauselosla.

94:11 1 Cor 3:20

*94:17 facl se wangin pusra lohngyuk we: facl sin mwet misa, liye Psa 6:5