103
[Psalm lal David]
Lungse Lun God
1 Kaksakin LEUM GOD, O ngunik!
Ma nukewa in nga, in kaksakin Ine mutal lal!
2 Kaksakin LEUM GOD, O ngunik,
Ac tia mulkunla lupan kulang lal.
3 El nunak munas ke ma koluk luk nukewa
Ac akkeyala mas luk nukewa.
4 El moliyula liki misa
Ac akinsewowoyeyu ke lungse ac pakoten.
5 El akkihpye moul luk ke ma wo
Tuh nga in fusr na ac ku oana sie won eagle.
6 LEUM GOD El oru nununku lal in wi layen lun mwet akkeokyeyuk,
El oru tuh nununku suwohs in orek nu selos.
7 El akkalemye inkanek lal nu sel Moses
Ac lela tuh mwet Israel in liye orekma kulana lal.
8 LEUM GOD El kulang ac pakoten,
El tia sa in mulat, ac yoklana lungkulang lal.Jas 5:11
9 El ac tia kaiyuk pacl nukewa,
El tia kolla mulat lal nwe tok.
10 El tia kai kut fal nu ke ma koluk lasr,
Ku ase nu sesr ma fal nu ke orekma koluk lasr.
11 Tuh lungse lun God nu selos su sunakunul
Oana fulatan kusrao nu faclu.
12 El usla ma koluk lasr loes liki kut,
Oana lusen kutulap lac nwe roto.
13 LEUM GOD El pakomutalos su akfulatyal,
Oana ke sie papa el pakomuta tulik natul.
14 God El etu lah mea kut orekla kac,
El esam lah kut orekla ke kutkut.*kutkut: kas Hebrew fahk mu “dust.”
15 A funu mwet uh, moul lasr uh oana mah.
Kut kapak ac farngelik oana ros inimae,
16 Na eng tuhyak nu faclos ac elos wanginla
Ac tia sifil liyeyuk.
17 A nu selos su sangeng sin LEUM GOD, lungse lal oan nu tok ma pahtpat,
Ac suwoswos lal nu sin fwil nu ke fwil —
18 Nu selos su karinganang wuleang lal
Ac oaru in akos ma sap lal.
19 LEUM GOD El oakiya tron lal inkusrao;
El tokosra fin ma nukewa.
20 Kaksakin LEUM GOD, kowos lipufan kulana lal,
Su akos sap ku lal,
Ac porongo kas lal.
21 Kaksakin LEUM GOD, kowos un mwet ku lal inkusrao,
Kowos mwet kulansap lal, su oru lungse lal.
22 Kaksakin LEUM GOD, kowos su ma orekla lal
In acn nukewa el leumi.
Kaksakin LEUM GOD, O ngunik!