116
Sie Mwet Su Moliyukla Liki Misa El Kaksakin God
1 Nga lungse LEUM GOD mweyen El lohngyu;
El porongo pre luk.
2 El lohngyu
Ke pacl nukewa nga pang nu sel.
3 Mwe kwasrip lun misa rauniyula,
Ac mwe keok lun Hades kapriyuwi.
Nga sangeng ac fosrngalana.
4 Na nga pang nu sin LEUM GOD, ac fahk,
“Nga kwafe sum, LEUM GOD, moliyula!”
5 LEUM GOD El kulang ac wo;
God lasr El pakoten.
6 LEUM GOD El karinganulos su selalkung;
Ke nga muta in mwe sensen El moliyula.
7 O ngunik, mongla ac inse misla,
Mweyen LEUM GOD El arulana wo nu sik.
8 LEUM GOD El moliyula liki misa,
El tulokinya sroninmutuk
Ac sruokyuwi liki ikori.
9 Ouinge nga fahsr ye mutun LEUM GOD
In facl lun mwet moul.
10 Nga srakna sruokya lulalfongi luk,
Nga finne fahk mu, “Nga keoklana,” 2 Cor 4:13
11 Oayapa ke nga sangeng ac fahk,
“Wangin mwet ku in lulalfongiyuk.”
12 Mea nga ac ku in sang nu sin LEUM GOD
Ke ma wo nukewa El ase nu sik?
13 Nga fah use cup in wain ac kisakin nu sin LEUM GOD
In sang kulo nu sel ke El moliyula.
14 Nga ac fah akfalye wulela luk nu sin LEUM GOD
Ye mutun mwet lal nukewa.
15 Fuka lupan asor lun LEUM GOD
Ke sie sin mwet lal misa.
16 Nga mwet kulansap lom, LEUM GOD;
Nga kulansupwekom oana ke nina kiuk el oru.
Kom moliyula liki misa.
17 Nga fah asot nu sum mwe kisa in sang kulo,
Ac nga fah pre nu sum.
18 Nga fah akfalye wulela luk nu sin LEUM GOD
Ye mutun mwet lal nukewa,
19 Ke elos tukeni ke inkul lun Tempul
Lun LEUM GOD in Jerusalem.
Kaksakin LEUM GOD!