132
On In Kaksak Ke Tempul
1 LEUM GOD, nik kom mulkunulla David
Ac ma upa nukewa el tuh mutangla.
2 LEUM GOD, esam ma el tuh wulela kac,
Wulela ku su el oru nu sum, God Kulana lal Jacob:
3 “Nga ac fah tia utyak nu in lohm sik, ku oan fin mwe oan kiuk,
4 Nga ac fah tia mongla ku motulla,
5 Nwe ke na nga orala sie acn in muta lun LEUM GOD,
Sie lohm sin God Kulana lal Jacob.”
6 In acn Ephrathah*Ephrathah: tok pangpang acn se inge Bethlehem. kut tuh lohng ke Tuptup in Wuleang,
Ac kut tuh konauk in acn Jearim.132:6–10; 2 Chr 6:41–42
7 Ac kut fahk, “Lela kut in som nu in lohm sin LEUM GOD;
Lela kut in alu ye mutun tron lal.”
8 LEUM GOD, fahsru nu ke Tempul uh, wi Tuptup in Wuleang
Su akilenyen ku lom,
Ac muta we nwe tok.
9 Lela mwet tol lom in oru ma suwohs pacl e nukewa;
Lela mwet lom in sasa ke engan!
10 Kom orala sie wulela nu sel David, mwet kulansap lom;
LEUM GOD, nikmet sisla tokosra se su kom sulela.
11 Kom tuh orala sie wulela ku nu sel David —
Sie wulela ma kom fah tia sifil ekulla, su fahk:
“Nga fah oru tuh sie sin wen nutum in tokosra,
Ac el ac fah leum tukum.2 Sam 7:12–16; 1 Chr 17:11–14; Psa 89:3–4; Orek 2:30
12 Wen nutum fin pwaye insialos nu ke wuleang luk
Ac nu ke ma sap luk su nga sang nu selos,
Na wen natulos ac fah oayapa eis acn sum in tokosra nwe tok.”
13 LEUM GOD El sulela Zion;
El lungse orala tuh in nien muta lal:
14 “Pa inge nien muta luk nwe tok.
Pa inge acn su nga lungse leum we.
15 Nga fah akkasrupye Zion ke mwe enenu lal nukewa;
Nga fah akkihpye mwet sukasrup lal ke mwe mongo.
16 Nga fah akinsewowoye mwet tol lal in ma nukewa elos oru,
Ac mwet lal fah on ac sasa ke engan.
17 In acn se inge nga fah oru tuh sie sin fita lal David elan sie tokosra fulat;
In acn se inge nga fah akloesye pacl in leum lun tokosra se su nga sulela.1 Tok 11:36
18 Nga fah nokomla mwet lokoalok lal ke mwekin,
A tokosrai lal fah kapkapak ac yokyokelik.”
*132:6 Ephrathah: tok pangpang acn se inge Bethlehem.
132:6 132:6–10; 2 Chr 6:41–42
132:11 2 Sam 7:12–16; 1 Chr 17:11–14; Psa 89:3–4; Orek 2:30