142
[Psalm lal David ke el muta in luf sac]
Sie Pre In Suk Kasru Sifa 1 Sam 22:1; 24:3
Nga pang nu sin LEUM GOD Elan kasreyu;
Aok, nga kwafe nu sel.
Nga use mwe torkaskas luk nukewa nu yorol,
Nga fahkak ongoiya nukewa luk nu sel.
Ke nga apkuran in fuhleak,
El etu lah mea fal nga in oru.
Ke inkanek su nga fahsr kac
Mwet lokoalok luk elos okanla mwe kwasrip in sruokyuwi.
Ke nga ngetnget nu siskuk,
Nga liye tuh wanginna mwet in kasreyu.
Wangin mwet in karinginyu,
Wanginna mwet nunku keik.
 
LEUM GOD, nga pang nu sum tuh kom in kasreyu;
Kom nien molela luk, LEUM GOD.
Kom mukena pa nga enenu in moul se inge.
Porongo ke nga pang,
Tuh nga arulana muta in ongoiya.
Moliyula liki mwet lokoalok luk;
Elos arulana ku likiyu.
Aksukosokyeyu liki mwe keok luk,
Na nga fah kaksakin kom in walil lun mwet lom
Ke sripen orekma wo lom nu sik.

^ Sifa 1 Sam 22:1; 24:3