ON LAL SOLOMON
Tukakinyen Book In ON LAL SOLOMON
Oasr on in lungse onkosr simla in book se inge, ma sie mukul el onkakin nu sin sie mutan su el lungse, ac oayapa mutan sac el onkakin nu sin mukul sac. In kutu leng ke Ma Simusla uh, book se inge pangpang “On Lun On uh,” oana fahk mu “On Ma Kato Emeet,” mweyen pa inge kas ma sikyak emeet in book uh.
Yurin mwet Jew, on inge lumweyuk nu ke lungse lun God nu sin mwet lal; ac mwet Christian uh luma mu ma ke lungse lun Christ nu sin Church.
Takla Lun Koanon Book Se Inge
On Soko Meet 1:1—2:7
On Soko Aklukwa 2:8—3:5
On Soko Aktolkwe 3:6—5:1
On Soko Akakosr 5:2—6:3
On Soko Aklimekosr 6:4—8:4
On Soko Akonkosr 8:5–14
1
Pa inge on ma kato emeet, ma Solomon el orala.* ma Solomon el orala: ku pac in lungasyukla ouinge: ma simla kacl Solomon.
On Soko Meet
Verse Lun Mutan Se
Nga ke kom in arulana ngokla mutuk;
Lungse lom uh los liki na wain uh.
Oasr foul na keng se keim;
Ke pacl inem ac fwack uh, nga sifil pacna esamak foul keng sac.
Wangin mutan ku in kutongya lungse la nu sum.
Usyu nga in wi kom, ac kut ac fah kaingla;
Kom in tokosra luk ac pwenyuwot nu infukil sum.
Kut ac fah tukeni ac arulana engan,
Nga yukin lungse lom uh yohk liki kutena ma.
Pwaye sin mutan uh in lungse kom!
Mutan Jerusalem, nga ne sroalsroal tuh nga oasku.
Nga sroalsroal oana lohm nuknuk in acn mwesis Kedar,
Tuh nga kato oana lisrlisr inkul fulat sel Solomon.
Nimet pilesreyu mu nga sroalsroal,
Mweyen faht uh pa tuhneyula uh.
Tamulel luk elos tuh kasrkusrak sik
Ac sap nga orekma ke ima in grape.
Na wangin pacl luk in karinginyu sifacna.
Kom su nga lungse yohk, fahkma nu sik,
Kom ac pwen un sheep nutum an in mongo oya?
Elos ac mongla ya ke pacl faht uh fol ke infulwen len uh?
Efu ku ngan suk kom
Inmasrlon un sheep nutin mwet shepherd ngia?
Verse Lun Mukul Se
Ya kom tia etu acn sac, kom su oasku liki mutan nukewa?
Fahla ukweot na un sheep uh
Twe konauk acn nani nutum an in mongo we
Apkuran nu ke lohm nuknuk sin mwet shepherd ngia.
Kom su nga lungse na pwaye, lumom arulana kato
Oana horse mutan ma amakin chariot okoal Tokosra Egypt.
10 Aunsifom oaskulana ke oan likintupom uh,
Ac putati sisken kwawom oana wek saok uh.
11 Kut ac fah orala soko sein gold ah lom,
Ac nawela ke mwe yun silver.
Verse Lun Mutan Se
12 Ke tokosra luk el oan infukil sel,
Ono keng keik uh nwakla in lohm uh ke foul wo.
13 Ke mukul kawuk luk el elongak iniwuk,
El oana sie nwana keng orekla ke myrrh.
14 El su saok sik el oana sie ros inima uh
Su farngelik inima grape in acn Engedi.
Verse Lun Mukul Se
15 Mutan saok sik, kom arulana oasku,
Motom saromrom ke ngetnget in lungse lom!
Verse Lun Mutan Se
16 Mukul kawuk luk, kom kato na pwaye sik,
Nga arulana pwar sum!
Mah folfol uh pa ac fah mwe oan kiuktal.
17 Sak cedar pa srulun loaloa nu ke lohm sesr,
Ac sak cypress pa ac srulun siling lasr uh.

*1:1 ma Solomon el orala: ku pac in lungasyukla ouinge: ma simla kacl Solomon.