7
Verse Lun Mukul Se
Fisrak mutan, mutan fusr na kato se pa kom an!
Niom arulana oasku in fahluk lom an.
Finyepom uh raraun
Oana ma mwet usrnguk ke tufahlfal uh orala.
Futom oana sie ahlu pol
Ma wain keng uh tia wi lisr loac uh.
Kapin siom oana tohktok in wheat se
Ma ros kiuf uh raunela.
Titi lom uh oana deer fak lukwa,
Ku kosro gazelle lukwa.
Inkwawom oana sie tower naweyukla ke ivory.
Atronmotom oana lulu in kof in siti Heshbon
Su oan sisken mutunpot lun siti pwengpeng sac.
Infwem kato oana tower lun Lebanon
Su tuyak suwohs ac tawi acn Damascus.
Kom pusrukak sifom nu lucng oana Fineol Carmel.
Aunsifom pirakla ac saromrom oana nuknuk musresre na wowo;
Katoiya uh ku in akmunasyela sie tokosra.
Kom arulana kato ac oasku;
Lungse lom nu sik arulana akpwaryeyu.
Kom loes oasriksrik oana soko sak palm,
Ac titi lom an oana ungin fokin palm uh.
Nga ac fanukya palm soko uh
Ac filiya pouk ke fahko kac uh.
Titi lom oana ungin grape uh sik,
Ac momong lom uh keng oana foulin apple uh.
Ac oalum oana wain ma wo oemeet uh.
Verse Lun Mutan Se
Fin ouinge, lela wain uh in sororla nu yurin el su saok sik,
Ac kahkla fin ngoasrol ac wihsel.
10 Nga ma na lun el su nga lungse, ac el mwelyu na.
11 Fahsru, kom su saok sik. Lela kut in illa nu inimae
Ac motullana we.
12 Kut ac fah toang na tukakek ac som nu ke ima in grape,
Ac liye lah elos mutawauk in kapak,
Ac liye lah ros uh mutawauk in farengelik,
Ac oayapa in liye lah sak pomegranate oasr ros kac.
Na nga ac fah akkalemye lungse luk nu sum uh e we.
13 Kom ac ku na in ngokak foul keng ke ros mandrake uh,* mandrake: Liye kalmac ke Kalmen Kutu Kas.
Ac fokinsak wowo nukewa pa na oan sisken srungul in lohm uh.
Ku na safla luk, nga elosak kain mwe insewowo nukewa nu sum.

*7:13 mandrake: Liye kalmac ke Kalmen Kutu Kas.