1 I muli taumagi, Dimaadua ga helekai gi Moses mo Eleazar, tama daane Aaron, 2 “Heia di hihi dangada o nia madahaanau o nia daangada Israel huogodoo, nia daane huogodoo ala gu madalua nadau ngadau gaa huli gi nua ala e humalia e hai digau dauwa.” 3-4 Moses mo Eleazar gu daudali, gu gahi mai gi di gowaa e dahi digau huogodoo ala nadau ngadau beelaa. Digaula gu dagabuli i hongo di gowaa maalama i Moab i di baahi gi golo di monowai Jordan e huli adu gi Jericho.

Aanei la go digau Israel ne loomoi i Egypt:

5 Di madawaawa Reuben (Reuben la go tama daane madua o Jacob): go nia madahaanau o Hanoch, Pallu, 6 Hezron mo Carmi. 7 Nia madahaanau aanei le e 43,730 ono daane. 8 Nia hagadili ni Pallu la go Eliab, 9 gei ana dama daane go Nemuel, Dathan, mo Abiram. (Aanei go Dathan mo Abiram ala ne hilihili go digau Israel, aalaa go meemaa ala ne hai baahi gi Moses mo Aaron, gaa buni gi nia hoo a Korah i nadau madagoaa ne hai baahi gi Dimaadua. 10 Tenua gu mahuge gu hagabugu digaula, gei meemaa guu mmade dalia Korah mo ono ehoo, i di madagoaa di ahi ne daaligi digau e lua lau madalima (250). Digaula guu hai di hagailoo hagalliga ang gi nia daangada. 11 Gei nia dama Korah digi daaligi gii mmade).

12 Di madawaawa Simeon: go nia madahaanau o Nemuel, Jamin, Jachin, 13 Zerah, mo Shaul. 14 Nia madahaanau aanei le e 22,200 ono daane.

15 Di madahaanau o Gad: go nia madahaanau o Zephon, Haggi, Shuni, 16 Ozni, Eri, 17 Arod mo Areli. 18 Nia madahaanau aanei le e 40,500 ono daane.

19-21 Di madawaawa Judah: go nia madahaanau o Shelah, Perez, Zerah, Hezron mo Hamul. (Nia dama daane dogolua o Judah, go Er mo Onan, guu mmade i Canaan.) 22 Nia madahaanau aanei le e 76,500 ono daane.

23 Di madawaawa Issachar: go nia madahaanau o Tola, Puah, 24 Jashub mo Shimron. 25 Nia madahaanau aanei le e 64,300 ono daane.

26 Di madawaawa Zebulun: go nia madahaanau o Sered, Elon, mo Jahleel. 27 Nia madahaanau aanei le e 60,500 ono daane.

28 Nia madawaawa Joseph, go tamana o nia dama daane dogolua go Manasseh mo Ephraim.

29 Di madawaawa Manasseh: Machir, tama daane a Manasseh, la go tamana ni Gilead, gei nia madahaanau aanei nadau damana mmaadua le e daamada mai i Gilead: 30 go nia madahaanau o Iezer, Helek, 31 Asriel, Shechem, 32 Shemida mo Hepher. 33 Tama daane a Hepher go Zelophehad ana dama daane ai, nia dama ahina hua. Nadau ingoo go Mahlah, Noah, Hoglah, Milcah, mo Tirzah. 34 Nia madahaanau aanei le e 52,700 ono daane.

35 Di madawaawa Ephraim: go nia madahaanau o Shuthelah, Becher, mo Tahan. 36 Di madahaanau o Eran e daamada ono hagadili mai i Shuthelah. 37 Nia madahaanau aanei le e 32,500 ono daane.

Nia madahaanau aanei la di hagadili mai i Joseph.

38 Di madawaawa Benjamin: go nia madahaanau o Bela, Ashbel, Ahiram, 39 Shephupham, mo Hupham. 40 Nia madahaanau a Ard mo Naaman le e daamada nadau hagadili mai Bela. 41 Nia madahaanau aanei le e 45,600 ono daane.

42 Di madawaawa Dan: go di madahaanau o Shuham, 43 dela ono daane e 64,400.

44 Di madawaawa Asher: go nia madahaanau o Imnah, Ishvi, mo Beriah. 45 Nia madahaanau a Heber mo Malchiel le e daamada nadau hagadili mai i Beriah. 46 Asher dana dama ahina go Serah. 47 Nia madahaanau aanei ono daane e 53,400.

48 Di madawaawa Naphtali: go nia madahaanau o Jahzeel, Guni, 49 Jezer, mo Shillem. 50 Nia madahaanau aanei ono daane e 45,400.

51 Di hulu daane damana o digau Israel le e 601,730.

52 Dimaadua ga helekai gi Moses, 53 “Duwwa ina tenua gi nia madawaawa, e hagatau gi togologo o nia daangada. 54-56 Duwwa ina tenua gi di hudihudi e hai, gaa wanga di gowaa damana gi di madawaawa dela e dogologo ono daangada, tenua dulii gaa wanga gi di madawaawa dela e hogoohi ono daangada.”*Numbers 34.13; Joshua 14.1-2

57 Di madawaawa Levi la go nia madahaanau a Gershon, Kohath mo Merari. 58 Nia hagadili digaula labelaa go nia madahaanau o Libni, Hebron, Mahli, Mushi mo Korah. Kohath la go tamana o Amram. 59 dela nogo lodo gi tama ahina a Levi go Jochebed dela ne haanau i Egypt. Mee mo Amram ne hai nau dama daane dogolua go Aaron mo Moses mo tama ahina go Miriam. 60 Aaron ana dama daane dogohaa, Nadab, Abihu, Eleazar mo Ithamar.*Numbers 3.2 61 Nadab mo Abihu ne mmade i di nau hai gi Dimaadua di ahi dela hagalee haga madagu.*Leviticus 10.1-2; Numbers 3.4 62 Nia daane Levi ala nadau ngadau e tugi di malama e dahi gaa huli gi nua huogodoo e 23,000. Digaula ne hihi gi lala i daha mo digau Israel, idimaa digaula digi hai nadau duhongo gowaa i Israel.

63 Nia madahaanau ne hihi huogodoo gi lala go Moses mo Eleazar di madagoaa meemaa ne dau nia daangada Israel i di gowaa maalama i Moab i di baahi gi golo di monowai Jordan e huli adu gi Jericho. 64 Deai taane e dahi ne dubu i digau ala ne hihi go Moses mo Aaron matagidagi i di Anggowaa o Sinai ai. 65 Dimaadua gu helekai bolo digaula huogodoo gaa mmade i lodo di anggowaa, aalaa hua go Caleb tama daane a Jephunneh mo Joshua tama daane a Nun hagalee mmade.*Numbers 14.26-35