1 Lloomoi, gidaadou e hagaamu a Dimaadua!

Gidaadou e daahili hagaamu a God dela e abaaba gidaadou!

2 Gidaadou gi lloomoi gi heia tadau danggee hagaamu i mua o Mee,

mo di tenetene dadaahili nia daahili hagaamu.

3 Idimaa, Dimaadua la di God mogobuna,

di King dela i nua nia god huogodoo.

4 Go Mee dela e dagi henuailala hagatau,

e tugi i di gowaa llala i henuailala gaa hana gi di ulu nia gonduu.

5 Go Mee dela e dagi di moana dela ne hai go Mee,

mono henua huogodoo ala ne hai go Mee.

6 Lloomoi, gidaadou e pala gi lala e daumaha gi Mee,

gidaadou e dogoduli i mua o Dimaadua dela ne hai gidaadou!

7 Mee go tadau God. Gidaadou ala go ana daangada e madamada humalia ai,

gidaadou go ana hagabuulinga siibi ala e hahaangai.

Hagalongo dangi nei gi ana helekai ala e helekai ai:*Hebrews 3.7-11

8 “Goodou hudee hamaaloo godou lodo,

be di hai o godou maadua mmaadua i mua ala nogo i Meribah,

gadoo be nadau hai huaidu ala nogo haihai i di anggowaa i Massah.*Hebrews 3.15; 4.7

9 Digaula gu gidee ginaadou agu hegau mogobuna ala ne hai ko Au i nadau baahi,

gei digaula gu hagamada Au.*Exodus 17.1-7; Numbers 20.2-13

10 Au nogo hagawelewele gi digau aalaa

i nia ngadau e mada haa, gei Au gaa hai:

‘Digaula e huli nadau manawa gi daha mo Au,

gei digaula hagalee hagalongo gi agu haganoho!’

11 Au gu hagawelewele guu hai dagu hagababa mau dangihi boloo:

‘Goodou hagalee loo e ulu gi lodo tenua dela ne hagababa ko Au

belee hagamolooloo ai goodou i no lodo.’ ”*Numbers 14.20-23; Deuteronomy 1.34-36; 12.9-10; Hebrews 4.3-5