1 MAKAPI KAN
Oaralap en Pwuhk wet
Keieun Pwuken Makapi kan koasoia mwekid kan nan poadopoad en mehn Suhs akan sang ni mwehin Antaiokus Epipanihs (175 mwohn Krais.) lel ni ahnsou me Sohn Hirkanus ndandla (134 mwohn Krais).
Ire kesempwal oh kainsenoh en pwuhk wet pid peneinei en Hasmon de Makapi. E kasalehda lamalam en mehn Suhs duwen peneineio eh pilipilda sang rehn Koht pwe re en kamourala Israel. Pwuhk wet pil audaudkihda soangen lamalam kehlail en pali ngen: duwen Koht eh ketin wie doadoahk nan poadopoad en Israel oh duwen eh pahn ketin katingih irail kan me kin loaloapwoat ong ih.
Audepe ni Oaralap
Kalokolok oh moromor en Madadaias 1.1—2.70
Ahnsou me Sudas Makapius wia kaun emen 3.1—9.22
Ahnsou me Sonadan wia kaun emen 9.23—12.53
Ahnsou me Saimon wia kaun emen 13.1—16.24
1
Aleksander Lapalap
Poadoapoad wet tepida ni ahnsou me Aleksander Lapalap, nein Pilip mehn Masedonia ketido sang Masedonia oh mahweniong oh kalowehdi Darius, nanmwarkien Persia oh Media. Aleksander eri katehlapahla wehin Krihs ni eh kalowehdi Darius oh alehdi mwoaleo. Mahwen tohtohie e wiadahr, oh kalowedier wasahn mahwen kehleil kei en kahnimw kan oh kemelahr nanmwarki kei. Ni eh ketiketseli oh ketiket kolahng ni irepen sampah, e ketin kauwehla wehi tohto oh kulihasang ar kepwe kan; oh ni eh kalowehdier wehi koaros en sampah e pohnmwahsohla oh aklapalapala. E ahpw ketikipene karis lapalap kehlail ehu, oh kalowehdi wehi kei pwon oh arail nanmwarki kan oh itonehng irail koaros en pwainohng daksis.
5-7 Ni ahnsou me Aleksander wie kakaun duwen nanmwarki lapalap men erein sounpar eisek riau, e luhmwuhmwda oh pehmada me e pahn sipallahr. E ahpw malipepene sapwellime kaunen sounpei lapalap akan, soupeidi kan me iang ih tikda sang ni eh pwulopwul, oh nehkong irail sapwellime wehi nindokon eh ieias. Mwurin eh sipallahr, sapwellime kaunen sounpei ko ahpw uhd katanga wehio, oh emenemen pein kasapwilada pein ih en wiahla nanmwarkien wasa kan me e kaunda nan wehio. Kadaudok en nanmwarki pwukat pil wiahla nanmwarki erein sounpar tohto oh kahrehiong sampah pai suwed tohtohie.
Antaiokus Epipanihs oh Pwihn Suwed en mehn Suhs ehu
(Tehk 2 Makapi 4.7-17)
10 Kaun suwed Antaiokus Epipanihs, nein Antaiokus Kesilimen, nanmwarki en Siria, kisehn kadaudok en emen sapwellimen Aleksander kaunen sounpei ko. Antaiokus Epipanihs irairdi sang eh saledek nan Rom mwohn eh wiahla nanmwarkien Siria ni pahr 137a PAHR 137: Pahr koaros me sansalehr nan pwuhk wet tepida wadawad sang ni kokoudahn Wehin Siria ni pahr 312 mwohn Krais Sounpar 137 ni mwehin Siria pahrekiong pahr 175 mwohn Krais. en mweihn mehn Krihs. 2 Mak. 4.7.
11 Ni ahnsowo pwihn suwed en mehn Suhs ehu ahpw pwarada nan Israel me sohte kin wauneki Kosonnedo oh me ahneki manaman suwed pohn me tohto en riatail aramas akan. Re kin nda, “Kitail wiahda ehu inou en ehuwong mehn liki kan pwe ihte kahpwal me kitail kin diar ma kitail kin tohrohrasang irail.” 12 Aramas tohto eri pwungkihda kaweid wet, 13 oh ekei irail ahpw perenkihda oh kohla rehn nanmwarkio oh ale mweimwei en idawehn tiahk en mehn liki kan. 14 Re ahpw wiahda wasahn mwadong ehu nan Serusalem me duwehte me mi nan kahnimw kan en Krihs. 15 Re kihsang kilel en sirkumsaisla me mi ni paliwarail kan, pohnsehsehla inou sarawio, oh tapihada patehng mehn liki kan oh pangala pein irail ong ni soangen tiahk suwed koaros. 1 Kor. 7.18.
Antaiokus Mahweniong Isip
16 Ni Antaiokus eh soandier nan mwoale duwen nanmwarki men, e kupwurehda en pil kalowehdi Isip pwe en kin kakaun wehi riau. 17 E mahwenkihong Isip polohn sohp ehu, lapalahn karis kehlail ehu iangahki werennansapw en mahwen, elepant oh sounpein dak oahs. 18 Ni mahweno eh tepida, Tolemi, nanmwarkien Isip masepwehkadahte tangdoaui, oh kiden sapwellime sounpei mehla. 19 Wasahn mahwen en kahnimw kan en Isip eri lohdi, Antaiokus ahpw kulihasang kepwe kan en sahpwo pwon.
Antaiokus Kaloke mehn Suhs akan
20 Ni pahr 143,b PAHR 143: Sounpar wet pahrekiong pahr 169 mwohn Krais. mwurin eh kalowehdi Isip, Antaiokus iangahki sapwellime lapalahn karis ehu ahpw ketilahng Israel oh kahnimw en Serusalem.
21 Nan eh aklapalap, e ahpw ketilong nan Tehnpas Sarawio oh ketikihsang pei sarawi kohlo, dewen lampo, iangahki dipwisawi kan, 22 tehpel me pilawa mehn meirong ong Kaun-o kin mi powe, kep oh pwohl ko, pan kohl ko me kisiniei kin mi loale, kahdengo oh sapwellimen nanmwarki nihn kan. E pil ketikihsang kapwat kohl ko me kin langalang pohn wenihmwen Tehnpas Sarawio, 23 oh pil ketikihsang silper, kohl, oh dipwisou kesempwal koaros, iangahki dipwisou kan me e diarada wie nekinek wasao. 24 E ahpw ketikilahng dipwisou pwukat koaros nan sapwellime wehi. E pil kemehla aramas tohto oh susuweiki ire wet. 25 Mwahiei laud ahpw kipedi wasa koaros nan Israel.
26 Kaun akan oh me lapalap akan iang tentenihr.
Mwahnakapw akan oh peinakapw akan luwetala.
Sohla lingan en neitail serepein kan.
27 Ohl kamwohd kan koaros kokoulki koulen kedepwidepw kan,
oh lih kamwohd kan kin mwomwohd nan ar pere mwahmwahiei.
28 Neitail aramas akan koaros sarohdier
oh sapwatailet pwon rerrerki paisuwedlahn towe kan.
29 Sounpar riau mwurin mepwukat eh wiawiher, Antaiokus ahpw kadarasang Misia lapalahn karis ehu iangaki sounrik daksis men pwehn dawi kahnimw kan en Sudia. Ahnsou me sounpei ko pedolong nan Serusalem, 30 arail kauno ahpw lokaiaiong aramas ako ni liksansalmwahu duwen meleilei. Re ahpw kamehlele. Ih eri mwadangete mahweniong kahnimwo, oh kemehla aramas tohto. 31 E kulihasang kepwe kan nan kahnimwo oh isikala oh karangkehdi ihmw kan oh kelen kahnimwo. 32 E ahpw salihedi lih akan oh seri kan oh kihsang pelinmen kan.
33 Antaiokus oh sapwellime sounpei ko ahpw wiahda kehl ile oh kehlail oh wasahn iroir kehlail kei ni paliepeng en Tehnpas Sarawio, oh wiahkihla wasao kelen mahwen. 34 Re ahpw kihdiong wasao mehn Suhs kei me pangala ar wehi oh iangirailla, pwe re en kin sinsile. 35 Re pil wadohng dipwisoun mahwen kan wasao iangahki dipwisou kan me re kulihada nan Serusalem. Wasa kiset ahpw wiahla wasa kamasepwehk ong tohn kahnimwo.
 
36 Kelen mahweno wiahla wasahn kamasak Tehnpas Sarawio,
wasa suwed poatopoat ong mehn Israel kan.
37 Re kakerehdi nta mwakelekel limwahn pei sarawio;
re kasaminehla Wasa Sarawio.
38 Tohn Serusalem masepwehkada tangasang ar kahnimwo
oh kahnimwo wiahla wasahn kousoan en mehn liki kan.
Serusalem wiahla sapwen liki ehu ong pwilidake kan,
me idihdohng re en sopohsang ar kahnimwo.
39 Tehnpas Sarawio tehnla duwehla sapwtehn ehu;
rahn sarawi kan wiahla rahnen nsensuwed,
rahnen Sapad kaperen kan wiahla rahn kanamenek.
Wahupe wiahla mehn kepit.
40 Eh namenek inenen laud mehlel sang eh lingan en mahs,
eh peren wiahla mwahiei mwuledek.
 
41-43 Antaiokus ahpw ketin kauwada nan wehio kosonned ehu me ketihtihki: sapwellime aramas koaros pahn kesehla pein ar tiahk kan oh wiahla wehiteieu. Mehn liki kan koaros oh pil me tohto rehn mehn Israel kan pwungki kosonned en nanmwarkio. Re ahpw iangala lamalam en me rotorot kan, oh iang wia meirong ong dikedik en eni kan oh sohla wauneki rahnen Sapad.
44 Nanmwarkio pil poaronehla meninkeder kei ong Serusalem oh kahnimw koaros en Sudia me wa sapwellime kosonnedo me koasoanehdi me aramas koaros en idawehn tiahk en mehn liki kan. 45 E ketin koasoanehdi re en dehr wia meirong isihs, meirong en wahnsahpw, de meirong en wain nan Tehnpas Sarawio, oh pil koasoanehdi re en doadoahk rahnen Sapad kan duwehte rahn mwahl akan. 46 E pil koasoanehdi re en kasaminehla Tehnpas Sarawio oh dipwisou sarawi kan loale. 47 E koasoanehdi re en wiahda pei sarawi oh tehnpas sarawi ong dikedik en eni kan, oh pil wiahda sansal en dikedik en eni kan; oh re en meirongki pwihk oh soangen mahn samin teikan wasao. 48 E keinapwihdi re en sirkumsaisih nair seri kan oh idingohng irail re en kasaminehla pein irail ong kaudok ni soangen tiahk samin koaros. 49 pwe re en manokehla Kosonned me Kaun-o ketikiong Moses oh dehr kapwaiada koasoandi kan. 50 Eri mehmen me sohte pahn kapwaiada kosonned en nanmwarkio, e pahn kamakamala.
51 Kaidehn koasoandio me nanmwarkio kadarpeseng nan sapwellime wehi pwon, ahpw e pil ketin idihada lapalap ekei mehn apwalih aramas akan oh koasoanehdi nan ehuehu kahnimw kan en Sudia re en wia meirong ong dikedik en eni kan. 52 Me tohto rehn mehn Israel ko me onopadahr re en kesehla Kosonned en Koht oh uhd kapwaiada en me lapalap pwukat ar koasoandi kan. Re kasaminehkihla sahpwo ar wiewia suwed, 53 re ahpw kahrehiong mehn Israel loaloapwoat kan ar tangpeseng oh rukula wasa kan me re diar oh rukula ie.
54 Ni rahn kaeisek limau en sounpwong en Kislep ni pahr 145,c PAHR 145: Sounpar wet pahrekiong pahr 167 mwohn Krais. Nanmwarki Antaiokus ketikidiong pohn pei sarawi en Tehnpas Sarawio “Sansal Kansensuwed Likemisiko”; oh pei sarawien me rotorot kei kokouda nan kahnimw kan en Sudia. Dan. 9.27; 11.31; 12.11; 1 Mak. 6.7; Mad. 24.15; Mark 13.14. 55 Meirong en me rotorot akan ahpw kin wiewiawi ni wenihmwen ihmw kan oh nanial akan. 56 Pwuhk kan en Kosonnedo me re kin diarada, re kin tehrpeseng oh isikala. 57 Oh mehmen me pahn dierekda kolokol ehu kisehn pwuhk sarawi ko de kapwaiada Kosonnedo, pahn kamakamala nin duwen koasoandi en nanmwarkio. 58 Eri, met iei duwen aramas suwed pwukat ar doadoahngkier ar manaman erein sounpwong kei pohn mehn Israel ko me dierekda nan kahnimw kan me sohte idawehn koasoandi kan en Antaiokus.
59 Ni karieisek limau en sounpwong koaros, aramas suwed pwukat kin wia meirong pohn pei sarawien me rotorot akan, me kokouda pohn pei sarawien Kaun-o. 60 Lih akan me kin sirkumsaisihala nair seri kan, kin kamakamala, nin duwen koasoandien nanmwarkio. 2 Mak. 6.10. 61 Seri kan kin pirapiriong ni tepinweren ar nohno kan oh arail peneinei kan iangahki me sircumsaisihala seri ko kin kamakamala. 62 Ahpw me tohto rehn mehn Israel ko me uhwong koasoandi en nanmwarkio oh sohte iang tungoale kisintungoal akan me samin ong kaudok. 63 Re mehndahki ma re mehla sang kauwehla inou sarawio oh saminkihla kisintungoal samin kan—kahrehda me tohto rehrail kamakamala. 64 Engieng en Koht kahrehda mehn Israel ar lokolok mwuledek.

a1:10: PAHR 137: Pahr koaros me sansalehr nan pwuhk wet tepida wadawad sang ni kokoudahn Wehin Siria ni pahr 312 mwohn Krais Sounpar 137 ni mwehin Siria pahrekiong pahr 175 mwohn Krais.

1:10: 2 Mak. 4.7.

1:15: 1 Kor. 7.18.

b1:20: PAHR 143: Sounpar wet pahrekiong pahr 169 mwohn Krais.

c1:54: PAHR 145: Sounpar wet pahrekiong pahr 167 mwohn Krais.

1:54: Dan. 9.27; 11.31; 12.11; 1 Mak. 6.7; Mad. 24.15; Mark 13.14.

1:60: 2 Mak. 6.10.