1 SAMUEL
Oaralap en Pwuhk wet
Keieun Pwuhken Samuel koasoia duwen wiewia kan me pweida nan irair en ahnsou nanpwungen mwehin sounkopwung kan oh mwehin nanmwarki kan nan wehin Israel. Wekidekla wet nan mouren wehin Israel pidada ohl kesempwal silimen: Samuel, iei ih me wia kaimwseklahn sounkopwung lapalap ako; Sohl, ih me tepin nanmwarkien Israel; oh Depit, me eh mwekid kan mwohn eh wiahla nanmwarki kin iang pwarada nan koasoiepen mouren Samuel oh Sohl.
Oaralap kesempwal en pwuhk wet, duwehte oaralap kesempwal en pwuken poadopoad teikan en Kedehde Mering, iei duwen loalopwoatohng Koht eh kin kahrehda pweida mwahu, a sapeik kin kahrehda paisuwed. Met dehdedahr mehlel sang ni mahsen en Kaun-o ong samworo Ilai nan ire laud 2.30 me mahsanih, “I pahn kin kawauwihala irail kan me kin waunekin ie, oh I pahn kin mwamwahliki irail kan me kin mwamwahlikin ie.”
Pwuhk wet kasalehda duwen peikasal en mehn Israel ko ong ni koasoandien mwehin nanmwarki kan. Pwe Kaun-o me kin wia uhdahn nanmwarkien Israel, ahpw e ketin pilohng irail arail nanmwarki pwehki ar pekipeki. Ahpw me keieu kesempwal, duwen nanmwarki oh mehn Israel kan, ar kin mihmi pahn manaman oh kadeikpen Koht (2.7-10). Nin duwen kosonned en Koht pwungen aramas koaros me semwehmwe oh kepwehpwe kan, pahn duweduwehte.
Audepe ni Oaralap
Duwen Samuel eh wia sounkopwung en Israel 1.1—7.17
Sohl wiahla nanmwarki 8.1—10.27
Keieun sounpar akan en mwehin Sohl 11.1—15.35
Depit oh Samuel 16.1—30.31
Sipallahn Sohl oh sapwellime pwutak kan 31.1-13
1
Elkana oh Eh Peneinei nan Sailo
1 Mie ohl emen me kisehn Epraim me ede Elkana, me kin kousoan nan kahnimw Rama, nan sahpw nahnahn Epraim. Eh pahpa, iei Seroham, oh eh pahpa kahlap iei Elihu, kisehn peneineien Tohu, apali en peneineien Sup. 2 Elkana pwoudiki lih riemen, Ana oh Penina. Penina me neitik seri, a Ana sohte neitik. 3 Nan sounpar koaros Elkana kin kohla Sailo sang nan eh kahnimwo pwe en iang wia eh kaudok oh meirong ong KAUN-O, Wasa Lapalap, wasa me Opni oh Pineas, nein Ilai pwutak riemeno, kin wia samworo en KAUN-O ie. 4 Ahnsou koaros me Elkana pahn kin wia eh meirong, e kin kihong pweisen Penina oh pweisen emenemen nah seri ko sang ni meirongo. 5 Eri mehnda ma e poakepoake mehlel Ana, ahpw e kin kihong uwen pwais en emente aramas, pwehki KAUN-O sohte ketin kupwurehiong nah seri. 6 Eri, Penina kin pelian Ana oh kin epwehnki kaloke oh kasarowe, pwehki KAUN-O eh sohte ketikihong nah seri. 7 Eri, met wiewiawiher erein sounpar tohto. Ahnsou koaros me re kin pwarala nan tehnpas en KAUN-O, Penina kin kansensuwedihada Ana, ih me kahrehda Ana kin sengiseng oh sohla kin men mwenge. 8 Eh pwoudo, Elkana, kin idek reh, “Ana, dahme ke sengisengki? Dahme ke sohte tungoalki? Dahme ke mwomwen nsensuwedki ahnsou koaros? Ke sohte itarkin ie sang omw pahn naineki pwutak ehk?”
Ana oh Ilai
9-10 Kedekedeo, mwurin ar tungoal nan tehnpas en KAUN-O, nan Sailo, Ana ahpw uhda, e inenen nsensuwed mehlel; ih eri sengiseng oh kapakapohng KAUN-O. Ni ahnsowo Ilai mwomwohd nan dewe limwahn wenihmwo. 11 Ana ahpw inoukihda kehlail nan kapehde, ketihtihki, “Maing KAUN, Wasa Lapalap, komw ketin mahsanih sapwellimomwi lidu menet! Komw ketin mwahngih ei apwal oh ketin kupwurei ie! Komw dehr ketin likidmelieiehla! Ma komw pahn ketin kupwurehiong ie emen pwutaken, I pahn inoukihda met me I pahn kasarawihong komwi erein eh mour unsek, oh e sohte pahn sehkasang pitenmoange.”aSOHTE PAHN SEHKASANG PITENMOANGE: Kilel en kasarawihong KAUN-O (tehk Nemp 6.5.)Nemp 6.5
12 Ana eri usehlahte wie kapakapohng KAUN-O ahnsou reirei, a Ilai mwomwohd mwasamwasahn kilin ewe. 13 Ana wie kapakap ni ngihl tikitik; kilin ewe mwekimwekid ahpw sohte ngile. Ihme Ilai kihkihong me e sakaula, 14 ahpw ndahng, “Ke dehr nim wain, pwe ke dehr mwomwen sakau!”
15 A liho sapeng, ketihtihki, “Soh, maing! I sohte sakau! I pil sohte iang nim wain. I mihmi nan apwal laud, oh I wie kapakap pwe I en kasalehiong KAUN-O ei apwal akan. 16 Komw dehr wiahkin ie lih sohte katepe men. I kin wie kapakap nin duwen mwohmw wet pwehki ei direkilahr nsensuwed.”
17 Ilai eri sapeng, ketihtihki, “Eri, kohkohwei ni popohl, oh Koht en Israel en ketin kapwaiada omw pekipeken.”
18 Ana eri nda, “Komw ketin kupwure sapwellimomwi lidu menet ahnsou koaros.” E ahpw kohkohla oh nsenamwahulahr, oh kakehr tungoal.
Ipwidi oh Kasarawihpen Samuel
19 Eri, manda sang rahno, Elkana oh eh peneinei ahpw pwourda mwadang oh wia ar kaudok ong KAUN-O. Re ahpw pwurala ni imwarailo nan Rama. Elkana ahpw wiahda nsenen pwopwoud ong eh pwoud Ana. KAUN-O eri ketin kapwaiada en Ana eh pekipeko. 20 Ih eri liseianda oh naitikihada kisin pwutak kis, ih eri kihong ede Samuel;bSAMUEL: Ahd wet ni mahsen en Ipru wehwehki “mwaren Koht,” e pil ekis duwehte mahsen me wehwehki “pekihda.” pwehki duwen eh ketihtihki, “I patohwan pekidahr rehn KAUN-O.”
21 Eri, e pil lelehr ehu ahnsou me Elkana oh eh peneinei pahn pwurala Sailo pwe re en wiahiong KAUN-O ar meirong me re kin wia nan pahr koaros, oh pil meirong tohrohr me e inoukidahr. 22 Ahpw Ana sohte iang kohla; pwe e ndaiong eh pwoudo, “Mwurin kisin seriet eh pahn mweisang dihdi, I pahn walahng nan tehnpas en Koht, wasa e pahn mihmi ie erein eh mour.”
23 Elkana eri sapeng, “Kowe me ese dahme keieu mwahu. Eri, kapwaiada, oh mihmihte met, serien lao mweisang dihdi. KAUN-O en ketin kupwure pwe omw inou en pweida.” Ana eri mihmihte ni imweo, apwahpwalih nah serio.
24 Mwurin eh kamweidsang serio dihdi, e ahpw walahng Sailo, iangahki kisin koupwul wol kis me sounpar siluh, oh pil nesen pilawa ehu, oh ehd kilin mahn me diren wain. Mehnda en pwutako eh tikitiko, a e wahla nan tehnpas en KAUN-O nan Sailo. 25 Irail eri kemehla kouo, a serio re walahng rehn Ilai. 26 Ana eri ndahng Ilai, “Maing, komw kupwur mahk. Komw tamataman ie? Pwe iei ngehi liho me komw mahsanih eh kesikesihnen wasaht oh wie kapakapohng KAUN-O. 27 I peki rehn KAUN-O en ketikihong ie seriet. Eri, iet e ketin kapwaiadahr ei pekipeko. 28 Eri, I pahn patohwan kasarawihong KAUN-O seriet. KAUN-O me pahn ketin sapwellimaniki seri menet erein eh mour.”
Irail eri wia ar kaudok ong KAUN-O wasao.