Pwuhken DANIEL
Oaralap en Pwuhk wet
Pwuhken Daniel ntingdier ni ahnsou me mehn Suhs ako kin ale lokolok laud sang rehn nanmwarki rotorot emen. Sang ni koasoi oh kaudiahl kei, Sounntingo kin koangoangehki aramas akan en ahnsowo pwe re en koapworopworki duwen Koht eh pahn ketin kasapwildi arail nanmwarki lemeio, oh duwen eh pahn ketin onehda sapahl manaman en sapwellime aramas akan.
Pwuhk wet kak pwalpeseng wiahda pali riau: 1) Duwen koasoiepen Daniel oh ekei ienge ko me kalipilipala; eri, duwen ar kin powehkihdi ar imwintihti kan ar pwoson Koht oh peikiong. Koasoi pwukat wiawihda ni mwehin mehn Papilonia oh mehn Persia. 2) Duwen kaudiahl kei me kohieng Daniel, me kasalehiong duwen kohkodahn wehi kei oh ohlahn wehi ko sang mwehin Papilonia kohdo lel ahnsou me pwuhk wet wiewiawi. Kaudiahl pwukat pil kohpada duwen ohlahn nanmwarki lemeio, oh lingan en powehdi en sapwellimen Koht aramas akan
Audepe ni Oaralap
Daniel oh kompoakepah kan 1.1—6.28
Kaudiahl ong Daniel 7.111.45
a. Mahn kamasepwehk pahmeno 7.1-28
b. Sihpw wol men oh kuht men 8.1—9.27
c. Meninkeder sang nanleng 10.1—11.45
d. Ahnsoun imwisekla 12.1-13
KOASOAIEPEN DANIEL OH KOMPOAKEPAH KAN
1
(1.1-6.28)
Mehn Israel Pwulopwul akan nan Mwoalen Nepukadnesar
Ni pahr kesiluh me Sehoiakima SEHOAKIM: Nanmwarkien Suda sang pahr 609 lel 598 mwohn Krais. wiewiahki nanmwarkien Suda, nanmwarkien Papilonia, Nepukadnesar, ahpw ketido pwe en mahweniong Serusalem; e ahpw kapilpene kahnimwo. 2 Nan. 24.1; 2 Kron. 36.5-7.
Eri, Kaun-o ahpw ketin mweidohng Nepukadnesar en salihedi Nanmwarki Sehoiakim oh ketikihsang nan Tehnpas Sarawio kepwe kesempwal kei. Nepukadnesar eri ketin kahrelahng me selidi kan nan tehnpas sarawien sapwellime koht akan nan Papilon, oh ketikihong nan sapwellime wasahn nahk kepwehn kul kan. 2 Nan. 20.17-18; 24.10-16; 2 Kron. 36.10; Ais. 39.7-8.
Nanmwarkio eri mahsanihong Aspenas, sapwellime kaun lapalap, pwe en pilada sang nanpwungen mehn Israel me selidi kan ekei mwahnakapw sang nan peneineien ar nanmwarkio oh pil sang nan peneineien ar soupeidi kan. Mwahnakapw pwukat re en masamwahu, paliwar kehlail, oh loalokong, koahiek, oh mwadang en wehwehki mehkoaros, pwe irail en kak iang papah nan mwoalen nanmwarkio. Oh Aspenas en padahkihong irail wadawad oh ntingen mahsen en Papilonia. Nanmwarkio ahpw pil ketin koasoanehdi pwe irail en kin tungoal duwehte tohn tehnpeseo rahn koaros. Eri, mwurin ar pahn kaiahnki soahng pwukat erein pahr siluh, re en patodohng pahn kupwur en nanmwarkio. Eri, nanpwungen me pilipildahr akan, mwahnakapw pwukat iei: Daniel, Ananaia, Misael, oh Asaraia, irail koaros mehn Suda. Lapalapo ahpw kihong irail ahd kapw kei: Peldesasar, Sadrak, Mihsak, oh Apedneko.
Eri, Daniel ahpw lemedahr me e sohte pahn kasaminehkihla paliwere kisin tungoal oh wain me kin kohda nan tehnpaso. Pein ih ahpw peki rehn Aspenas, kaun lapalapo, pwe en sewese. Eri, Koht ketin kupwurehda pwe Aspenas en kin poakohng Daniel oh kadekohng. 10 Pwehki Aspenas eh masak nanmwarkio me kahrehda eh mahsanihong Daniel, “Nanmwarkio ketin koasoanedier dahme kumwail en kin tungoale. Eri, ma kumwail sohte pahn mwomw kehlail duwehte mwahnakapw teiko, nanmwarkio kakete kemeiehla.”
11 Daniel eri kohla rehn silepeo me Aspenas kilelehiong en sinsile ih oh ienge mwahnakapw silimeno, 12 oh ndaiong, “Menlau komw song kiht nan erein rahn eisek. Kihong kiht wahntuhke oh pihl se en tungoale. 13 Mwuri, komwi ahpw pahn karasaikitpene, kiht oh mwahnakapw teiko me kin tungoale kisin tungoal me kin kohsang nan tehnpaso. Komwi eri pahn kasawih ihs reht me mwomw kehlail.”
14 Ohlo eri pwungki re en song soangen tungoal wet erein rahn eisek. 15 Oh ni irair en ahnsowo eh imwisekla, irail ahpw mwomw mwahu oh kehlailasang mehteiko koaros me kin tungoale kisin tungoal en tehnpaso. 16 Silepeo eri solahr kihong arail tungoal sang nan tehnpaso; e ahpw mweidohng irail wahntuhkehte.
17 Koht ahpw ketikihong mwahnakapw pahmeno loalokong oh koahiek en sukuhlki pwuhk kan oh rapahki dahme mehlel. E pil ketikihong Daniel koahiek en kawehwehda ouraman oh kaudiahl kan.
18 Eri, ni pahr siluhwo me nanmwarkio ketin kileledier lao imwisekla, Aspenas ahpw kahrelahng mwahnakapw koaros rehn Nepukadnesar. 19 Ni nanmwarkio eh mahsanihirailda, e ahpw ketin diarada me Daniel, Ananaia, Misael, oh Asaraia me keieu mwahu sang mwahnakapw teiko. Irail pahmeno eri towehla sapwellime pwihn nan tehnpaso. 20 Eri, ni en nanmwarkio eh kin ketikihda peidek sohte lipilipil oh apwal akan, e ahpw ketin diarada me mwahnakapw pahmen pwukat dehdehki mwahusang sounkeseu oh sounkosetipw koaros me mihmi nan sapwellime wehio pahn pak eisek. 21 Daniel eri mihmihte nan tehnpaso lao lel ahnsou me Sairus,b SAIRUS: Sairus Keieu, mehn Persia, kalowedier Papilon nan pahr 538 mwohn Krais. nanmwarki lapalap en Persia, kalowehdi Papilonia.

a1:1: SEHOAKIM: Nanmwarkien Suda sang pahr 609 lel 598 mwohn Krais.

1:1: 2 Nan. 24.1; 2 Kron. 36.5-7.

1:2: 2 Nan. 20.17-18; 24.10-16; 2 Kron. 36.10; Ais. 39.7-8.

b1:21: SAIRUS: Sairus Keieu, mehn Persia, kalowedier Papilon nan pahr 538 mwohn Krais.