EKSODUS
Oaralap en Pwuhk wet
Eden pwuhk wet, Eksodus, wehwehki ‘seiloaksang,’ eri, met kawehwehda wiewia kesempwal ehu nan poadopoad en Israel me koasoiepe mi nan pwuhk wet—iei en mehn Israel ko ar seiloaksang Isip, wasa re wia lidu.
Pwuhk wet pwalpeseng wiahda pali pahieu: 1) koasoia duwen kasaledeklahn mehn Ipru kan sang nan mour en lidu; 2) koasoia duwen arail seiloaklahng ni Nahna Sainai; 3) koasoia duwen sapwellimen Koht inou ong sapwellime aramas akan nin Nahna Sainai, iei ahnsou me e ketikihong irail sapwellime kosonned pwe re en kin kapwaiada nin duen pwungen kosonned en Koht, oh pwungen kosonned en wehi, oh pil kosonned akan me re pahn momourki; oh 4) duwen kokoudahn oh kalinganlahn en mehn Israel kan ar wasahn kaudok, duwen koasoandi kan me pid samworo kan, oh duwen kaudok ong Koht.
Ahpw mwohn mehkoaros, pwuhk wet koasoia dahme Koht ketin wiahda, ni eh ketin kasaledekala sapwellime aramas ako me mihmi nan mouren lidu oh ketikinirailpene pwe re en wiahla wehi ehu me ahneki koapworopwor laud ong ahnsou kan me pahn kohdo.
Nan pwuhk wet aramas me keieu kesempwal, iei Moses, ohl emen me Koht ketin pilada pwe en patohwan kahluwa sapwellimen Koht aramas akan sang Isip. Me keieu wadawad nan pwuhk wet, iei Kosonned en Koht Eiseko, me sansal nan ire laud 20.
Audepe ni Oaralap
Mehn Israel kan kasaledekla sang Isip 1.1—15.21
a. Mour en lidu nan Isip 1.1-22
b. Ipwidien Moses oh eh mour ni eh pwulopwul 2.1—4.31
c. Moses oh Aaron tuhwong nanmwarki en Isip 5.1—11.10
d. Pahsohpa oh seiloaksang Isip 12.1—15.21
Sang Sehd Weitahta ong Nahna Sainai 15.22—18.27
Kosonned oh inou 19.1—24.18
Impwalen Inowo oh kaweidpen duwen kaudok 25.1—40.38
1
En mehn Israel ar Kahpwal nan Isip
1 Iet eden nein Seikop pwutak ko me iangih kohdihla Isip, emenemen irail iangahki eh peneinei:Sen. 46.8-27. 2 Reupen, Simion, Lipai, Suda, 3 Isakar, Sepulon, Pensamin, 4 Dan, Napdali, Kad, oh Aser. 5 Eri, koaros me uhdahn kisehn kadaudok en Seikop patpene me isiakan. A Sosep ketiketier nan Isip. 6 Eri, Sosep oh rie ko, iangahki diho koaros, melahr. 7 Kadaudokarail ko, mehn Israel ko, ahpw kaparaparala oh inenen tohtohla; re pil kehlailla oh audehla wasa koaros nan sahpwo.Wie. 7.17.
8 Eri, nanmwarki kapw emen, me sohte mwahn mwahngih duwen Sosep, ahpw kesepwilda nan Isip.Wie. 7.18. 9 E ahpw mahsanihong sapwellime aramas akan, “Kumwail kilang duwen mehn Israel kan ar wie tohtohla oh kehlailasang kitail. Met keper mehlel ong kitail. 10 Eri, e konehng kitail en wiahiong irail ehu koasoandien pwe re dehr tohtohla. Pwe, ni ahnsoun mahwen, re de miniminiong atail imwintihti kan oh mahweniong kitail, oh pil lipalahsang rehtail.”Wie. 7.19. 11 Eri, mehn Isip ko koasoanediong arail kaunen doadoahk pwe re en kin itonehng irail nan doadoahk apwal re lao luwetala. Iei mehn Israel ko me kauwadahng Parao kahnimw kan en Pitom oh Rameses, wasahn nekidala mwenge. 12 Eri soh, ni uwen mehn Isip ar kaloke mehn Israel ko, re pil tohtohlahsang mahs oh parpeseng wasa koaros nan sahpwo. Mehn Isip ko eri masakala mehn Israel ko. 13-14 Re kin itonehng irail nan mour apwal en kalidu oh nan doadoahk laud en wiahda ihmw, oh pil soangen doadoahk koaros en nansapw. Re sohte kin poakeirailla.
15 Nanmwarkien Isip ahpw pil mahsanihong Sipra oh Pua sounkeneitik ko, me kin sewese lihen Ipru ko, 16 “Ni amwa pahn kin sewese kanaitikih lihen Ipru kan, ma serio ipwidi kisin pwutak, a kumwa kemehla; a ma kisin serepein, a kumwa kamourala.” 17 Ahpw sounkeneitik ko, lih masak Koht riemen, ihme ira sohte peikikiong nanmwarkio; pwe ira kin kamourala kisin pwutak kan. 18 Nanmwarkio eri malipeirahdo, oh keinemwe rehra, “Dahme kumwa kin kamourkihla seri ohl akan?”
19 Lih ako eri sapeng, patohwan, “Lihen Ipru kan sohte duwehte lihen Isip kan; pwe re kin mengei en neitik, oh serio kin ipwidi mwohn sounkeneitik eh kin lel rehrail.”
20 Eri, Koht ketin kupwurehla sounkeneitik ko, oh mehn Israel ko pil wie tohtohlahte oh kekehlailla. 21 Pwehki sounkeneitik ko ara masak Koht, Koht ketikihong ira neira seri tohto. 22 Parao eri mahsanihong sapwellime aramas koaros kosonned wet: ‘Kumwail kesehla nan Pillap Nail seri ohl koaros me ipwidihsang mehn Ipru kan, a kumwail kamourala serepein koaros.” Wie. 7.19.