Pwuhken
AISEIA
Oaralap en Pwuhk wet
Pwuhken Aiseia adasang soukohp ndand emen me koukousoanehr nan Serusalem mweinele sang pahr 750 lel pahr 700 mwohn Krais. Pwuhk wet kak pwalpeseng wiahda pali silu:
1) Ire laud 1-39 pid koasoiepen ahnsou me Suda, wehin mehn Suhs ni palieir, ale kahpwal kei sang Asiria, wehi kehlail ehu me mihte limwah. Aiseia tehkada oh kadehdehda me kaidehkte kehlail en Asiria me kak kauwehla mouren wehin Suda, ahpw pein dipe oh eh sapeikiong Koht, oh en aramas akan ar sohte likih Koht. Ni mahsen oh wiewia kehlail soukohpo ahpw kapahrengkihong tohn wehi oh arail kaun akan pwe re en weweidki mouren pwung oh inen; oh e ahpw pil kehkehlingkihong irail pwe ma re sohte pahn peikiong Koht, re uhdahn pahn mehla oh mwomwla. Aiseia pil kohpada duwen popohl me pahn pid sampah pwon oh pil ketidohn emen kadaudok en Depit me pahn wiahla nanmwarki.
2) Ire laud 40-55 pid koasoiepen ahnsou me mehn Suhs tohtohie kalipilipalahng Papilon, re mihmihki nan apwal laud oh sohla ar koapworopwor. Soukohp menet eri kalohkihda duwen Koht eh pahn ketin kasaledekihala oh kapwureiraillahng nan uhdakarail nan Serusalem pwe re en tapihada ehu mour kapw. Ire kesempwal en nan ire laud pwukat, iei duwen Koht eh ketin wia Kaunepen mehkoaros nin sampah, oh duwen sapwellime koasoandi ong sapwellime aramas akan en Israel, iei, en ketin wiahkinirailla mehn kamarainpen oh kapaipen wehin liki kan koaros. Ire kan me koasoia “Ladu en Kaun-o” iei ele me keieu ndand nanpwungen ire kan me sansalehr nan Kadehde Mering.
3) Ire laud 56-66 pali laud en ire pwukat de mahsenpe wiawihong irail ko me sapahldohngehr Serusalem, me uhdahn anahne kadehdepen Koht eh pahn ketin kapwaiada sapwellime inou ong arail wehi. Kupwur ngoang sansalehr wasa pwukat duwen mehn Israel ar pahn kin apwalih pwung oh inen, oh pil duwen epwelpen rahnen Sapad, meirong kan, oh pil kapakap. Ahpw mehlel wasa kis me konehng petehkpe en mie, iei 61.1-2, pwe Sises ketin doadoahngki mahsen pwukat ni eh tapihada sapwellime doadoahk pwe en kawehwehda pein ih.
Audepe ni Oaralap
Kehkehlik kan oh inou kan 1.1—12.6
Kalokolok en wehi kan 13.1—23.18
Sapwellimen Koht kadeik ong sampah 24.1—27.13
Pil ekei kehkehlik oh inou 28.1—35.10
Mehn Asiria kan, oh Esekaia, nanmwarkien Suda 36.1—39.8
Pakairpen inou oh koapworopwor 40.1—55.13
Kehkehlik kan oh inou kan 56.1—66.24
1
1 Audepen pwuhk wet, iei mahsen kei duwen Suda oh Serusalem me Koht ketin kasalehiong Aiseia nein Eimwos ni mwehin nanmwarkien Suda pwukat: Usaia, Sodam, Ahas, oh Esekaia.2 Nan. 15.1-7; 2 Kron. 26.1-23; b 2 Nan. 15.32-38; 2 Kron. 27.1-9; c 2 Nan. 16.1-20; 2 Kron. 28.1-27; d 2 Nan. 18.1—20.21; 2 Kron. 29.1—32.33.
Koht ketin Angiangih Sapwellime Aramas akan
2 KAUN-O ketin mahsanih, “Sampah oh pahnlahng, kumwa rong dahme I mahmahsanih! Seri kan me I apwalihadahr kahngohdiongielahr. 3 Kou men kin ese kaunepe, oh ahs pwul men kin ese wasa me eh soumas kin kamwenge ie, ahpw mahn pwukat loalokong sang nei aramas akan, Israel. Re sohte wehwehki mehkot.”
4 Kumwail wehi dipan ehu me melahr; kumwail ohlahr oh wialahr aramas suwed! Dipamwail kan keseikumwaildier! Kumwail keselahr KAUN-O, Koht sarawien Israel; kumwail sohpeisangehr. 5 Dahme kumwail kin pwurupwurehngki amwail kahngohdiong Koht? Ia duwe, kumwail men ale lokolok me laudsang met? Moangamwail unsek kenspesengehr, oh mohngiongimwail unsek oh mwahlielimwail unsek soumwahulahr. 6 Sang ni moangamwail lel ni nehmwail, sohte wasa kis mwahu mie, a ihte, ohla, mwoula, oh kens me pile kereker. Amwail ohla kan sohte kin ale kamwahu, de sohte kin ale wini, de kidikidpene.
7 Sapwamwailo tehnlahr, amwail kahnimw kan luldahr; nindokon amwail kilikilang, mehn liki kan kaundahr sapwamwailo oh kauwelahr mehkoaros. 8 Serusalem kelehpw me luhwehdi, kahnimw ehu me nektehn lohdi—rasehng kisin pelien ihmw kis me mi nan mwetin wain, de nan mwetin kiuhri, kahnimw ehu me eh imwintihti kan kapilpenehr. 9 Ma KAUN-O Wasa Lapalap, sohte ketin kapitala ekei aramas ako, Serusalem uhdahn kamwomwmwomwlahr douluhl, duwehte Sodom oh Komora.Sen. 19.24; Rom 9.29.
10 Serusalem, noumw kaun akan oh aramas akan duwehte mehn Sodom oh Komora. Kumwail rong dahme KAUN-O mahmahsanihong kumwail. Kumwail tehk mwahu padahk en atail Koht. 11 KAUN-O ketin mahsanih, “Da katepehiong ie tohtohn amwail mehn meirong kan? I solahr kin kupwurperenki amwail meirong isihs en sihpw wol kan, oh meirong en noumwail kou wih kan; I solahr kin kupwurperenki ntahn noumwail kouwol kan, sihmpwul kan oh kuht kan.Eimw. 5.21-22. 12 Ni amwail kin kodohn wia amwail kaudok ong ie, ihs me padahkihong kumwail en wahdo soahng pwukat! Ihs me peki kumwail en pwurupwururseli nan ei Tehnpas Sarawio? 13 Sohte katepen amwail kin wiahiong ie meirong; I pwohsuwedki amwail kin isik warpwohmwahu. I solahr kak kupwuramwahwih amwail Sarawien Maram Pwul kan, rahnen Sapad kan, oh amwail pokon sarawi kan, pwe re saminkilahr dipamwail kan. I kin kalahdeki amwail wiewia suwed kan, oh pil kamadipw kan. 14 I pil kalahdeki amwail Sarawien Maram Pwul kan oh amwail rahn sarawi kan; re katoutowihielahr, I pwangahkidahr.
15 “Ni amwail pahn kapahwei pehmwail pwe kumwail en kapakap, I sohte pahn tehk kumwail. Mehnda ma amwail kapakap me tohto oh reirei, ahpw I sohte pahn karongei kumwail, pwe nta milahr ni pehmwail kan. 16 Kumwail kamwakeleikumwailda. Kumwail tokedihsang amwail wiewia suwed pwukat mwohn silangi. Kumwail tokedihsang amwail wia me suwed, 17 oh esehla wia me pwung. Ngoangki pwe pwuhng pahrek en mie—sewese irail kan me milahr pahn kehnaudek, kihong pwung en me sepwoupwou kan, oh doarehla liohdi kan.”
18 KAUN-O pil mahsanih, “Kumwail kohdo kitail kapwungala mahs ire pwukat. Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh. Mehnda ma dipamwail wiahla mwahi weitahta douluhl, ahpw kumwail pahn pwetepwetala duwehla wunen sihpw. 19 Ma kumwail pahn peikiong ie, eri, kumwail pahn tungoale reken wahnsapwamwail; 20 ahpw ma kumwail pahn kahng dukiong ie, eri, kumwail uhdahn pahn mehla. Ngehi, KAUN-O, me mahmahsen.
Kahnimw Suwed
21 Kahnimw me kin loalopwoat mahso wialahr lih suwed men! Mahso aramas pwung tohr me kin kousoan ie, a met sounkam aramas tohr. 22 Serusalem, mahs ke duwehte silper, ahpw met solahr katepomw. 23 Omw kaun akan me kahngohdi oh kin kompoakepahnki sounpirap akan; irail koaros kin perenki ale kisakis ahnsou koaros oh kin ale pweipwei ni ahl sapwung. Re sohte kin doarehla me sepwoupwou kan nan mwoalen kopwung de rong en liohdi kan ar repenpwung.
24 Eri, rong dahme KAUN-O, Wasa Lapalahpie, Koht manaman en Israel, ketin mahmahsanih, “I pahn dupukohng kumwail, ei imwintihti kan, oh kumwail solahr pahn kansensuwedih ie. 25 I pahn kauwong kumwail limei kat; I pahn kamwakelehki omw silper samin kisiniei mwehl, oh kihsang rehmw omw samin koaros. 26 I pahn kihong uhk kaun ekei oh sounkaweid kei me duwehte me ke kin ahneki mahs. Eri, Serusalem pahn adanekihla kahnimw pwung, oh loalopwoat.”
27 Pwehki KAUN-O eh ketin pwung, e pahn ketin doarehla Serusalem oh towe kan koaros me kolulahr oh weliakapwalahr; 28 ahpw e pahn ketin kamwomwala koaros me kin wia dihp oh kahngohdiong ih; e pahn ketin kemehla koaros me kin kesehla ih.
29 Kumwail pahn sarohkihdi amwail kin pwongih tuhke kan oh wiahda amwail mwetuwel sarawi kan.aMWETUWEL SARAWI KAN: Aramas akan kin kamehlele me ma re kasarawihong koht en kaparapar mwetuwel ehu, kohto pahn kapaiahda arail wahnsahpw akan. 30 Pwe kumwail pahn duwehla tuhke ohk pwoat me teh kan mengidihsang, oh duwehla mwetuwel me sohte pile. 31 Nin duwen dihpw meng eh kin luluda sang ni kisin lepin semwut okohk kis, iei duwen ohl kehlail kan ar pahn mwomwkihla arail wiewia suwed kan, oh sohte emen me pahn kak en katokihedi kamwomwmwomwla wet.
1:1: 2 Nan. 15.1-7; 2 Kron. 26.1-23; b 2 Nan. 15.32-38; 2 Kron. 27.1-9; c 2 Nan. 16.1-20; 2 Kron. 28.1-27; d 2 Nan. 18.1—20.21; 2 Kron. 29.1—32.33.
1:11: Eimw. 5.21-22.
a1:29: MWETUWEL SARAWI KAN: Aramas akan kin kamehlele me ma re kasarawihong koht en kaparapar mwetuwel ehu, kohto pahn kapaiahda arail wahnsahpw akan.