47
Mahsen en KAUN-O duwen Pilisdia
Mwohn nanmwarkien Isip eh mahweniong Kasa, KAUN-O ketin mahsanihong ie duwen Pilisdia. Ais. 14.29-31; Esek. 25.15-17; Soel 3.4-8; Eimw. 1.6-8; Sep. 2.4-7; Sek. 9.5-7. E mahsanih:
“Kilang! Pihl kan loalloalada ni paliepeng,
oh pahn pwilla rasehng lapake ehu.
E pahn kaduhala sahpwo oh mehkoaros loale,
kahnimw kan oh towe kan.
Aramas akan pahn likwer en peksawas;
aramas koaros nin sampah pahn sengiseng kowahlap.
Re pahn rong ngilen pahn nehn oahs kan,
ngilen ngirisek en werennansapw en mahwen kan,
ngilen tangatang en mehn kadar kan.
Sahm kan sohte pahn pwuralahng neirail seri kan;
pehrail kan pahn sohla angi.
Ahnsoun kamwomwala Pilisdia leledohr,
pwehn katokehdi sang Dair oh Saidon
sawas koaros me luhwehdi.
Ngehi, KAUN-O, me pahn kamwomwala mehn Pilisdia kan,
koaros me kohsang ni oaroahr kan en Krihd.
Nsensuwed laud lellohngehr mehn Kasa,
oh mehn Askelon solahr mweseisei.
Ia erein mehn Pilisdia kan me luhwehdi ar pahn wie mwahmwahiei?
Kumwail weriwer oh kalelapak, ‘Kedlahs en KAUN-O!
Ia erein omw pahn wie palapal?
Pwurala nan deumw,
mihmi oh komkommoal wasao!’
Ahpw ia duwen eh pahn kommoaldi,
ni ei ketikihong eh doadoahk?
I koasoanediongehr en mahweniong Askelon
oh aramas akan me kin kousoan ni oaroahro.”

47:1: Ais. 14.29-31; Esek. 25.15-17; Soel 3.4-8; Eimw. 1.6-8; Sep. 2.4-7; Sek. 9.5-7.