GIN M’ON E BABYOR NI PI’ PAUL NGE YAN NGAK E GIRDI’ NU
KORINTH
Gin m’on e babyor ni pi’ Paul nge yan ngak girdi’en e galesiya nu Korinth e yoloy ni bochan e ba’adag ni nge ayuweg girdi’en e galesiya ko tin nib mo’maw’ nma yib ngorad. Re galesiya nem e sum u daken e maruwel rok Paul, me ere i guy rogon ni ngar gelgad u daken e michan’ rorad ngak Kristus ko tin nib mo’maw’ nma yib ngorad. Ngiyal’ nem e yu Korinth e fare binaw ni ba ga’ u lan e nug nu Akaia ni bay u Greece, ma yu Akaia e mmil fan nga Roma. Yu Korinth e ba ga’ ni un folchuway’ riy ma pire’ ban’en ni bfel’ ni bay u rom. Machane girdi’ riy e ur pired ni yad be darngal, ma pire’ yu raba’ i taliw riy.
Tin ni magawonnag laniyan’ Paul e yo’or raba’ ni un tay u lan e galesiya, ma ku bay e girdi’ u fithik’rad ni yad be ngongliy e ngongol ko darngal, aram fan ni i fonow nagrad Paul u murung’agen e mabgol. Ma ki tamilangnagrad u murung’agen e ggan ni yibe pi’ ngak e liyos nma meybil boch e girdi’ ngay, nge rogon ni ngan pigpig u galesiya, ngu murung’agen e tow’ath ni yib rok fare Kan Nthothup nge fos ko yam’. I Got e pi’ e gonop ngak Paul nge yag ni nge tamilangnag e girdi’ u murung’agen e pin’ey.
Fare guruy ni go’ yima nang e guruy ni 13, ni ir e be dag ni t’ufeg e fare tow’ath nib th’abi fel’ ni pi’ Got ngak girdi’en.
Tin ni bay riy
Tabolngin 1:1–9
Yoor raba’ u lan e galesiya 1:10—4:21
Rogon ni ngan ayuweg dowey ni fan ngak Got nge rogon e mabgol 5:1—7:40
Girdi’en Kristus nge pi’in gathi yad girdi’en Kristus 8:1—11:1
Rogon ni ngu’un par ni yibe pigpig ngak Got u lan e galesiya nge rogon e meybil 11:2—14:40
Fos ko yam’ ni tay Kristus nge fos ko yam’ ni bay tay e pi’in ni kar manged girdi’en 15:1–58
Salpiy ni ka ni kunuy ni fan ngak girdi’en Kristus u Judea 16:1–4
Tin ni leamnag Paul ni nge rin’ nge tin tomur e thin rok 16:5–24
1
Re babyor ney e yib rok Paul, ni Got e leamnag nge pining ni nge mang reb e apostel rok Kristus Jesus, ma ki yib rok Sosthenes ni walagdad ni girdi’en Kristus —
Ngak girdi’en e galesiya rok Got ni bay u lan yu Korinth, ni urngin e pi’in ni Got e ke piningrad ni ngar manged girdi’en, ni pi’in ke mil farad ngak Got ni bochan e kar ta’ab girdi’gad Kristus Jesus, ma kar ta’ab girdi’gad urngin e girdi’ nu gubin yang ni pi’in yad ma pining fithingan e Somol rodad i Jesus Kristus, ni ir e Somol rorad nge gadad:
I Got ni Chitamangidad nge Somol Jesus Kristus e ngu’ur ayuwegew gimed ma yow be pi’ e gapas nga lanin’med.
Pin’en ni bfel’ ni be pi’ Got u daken Kristus
Gubin ngiyal’ ni gu be pining e magaer ngak e Got rog ni bochmed, ni bochan e ayuw nike pi’ ngomed u daken Kristus Jesus. Ke pig pangimed ni polo’ kari manigil ni mus ko thin ni gimed be yog nge thin rok Got ni kam nanged fan, ni bochan e kam ta’ab girdi’gad Kristus. Murung’agen Kristus e kari muduwgil u lanin’med, ma urngin e tow’ath nma pi’ Got e go’ ke pi’ ngomed, ma gimed be sonnag e Somol rodad i Jesus Kristus ni nge yib i m’ug. Ma ku bayi ta’med ni gimed bmuduwgil nge mada’ ko tomur, ni fan e nge yan i m’ug ndariy thibngimed ko Chirofen ni bay sul e Somol rodad i Jesus Kristus. I Got e nge pagan’uy ngak, ni Got ni ir e ke piningmed ni ngam chaggad ngak Jesus Kristus ni Fak, ni ir e Somol rodad.
Yo’or raba’ u lan e galesiya
10 Gu be wenig ngomed, pi walageg, ni Jesus Kristus ni ir e Somol rodad e ke pi’ mat’wug ni be lungug: nge ta’reban’med ni gimed gubin ko tin gimed be weliy, ma aram e dabiyag ni ngam yo’or raba’gad; mi gimed par ni gimed ba ta’reb ma ta’ab pa’ lanin’med ma ta’a ban’en e gimed be nameg. 11 Gimed pi walageg, bay boch e girdi’ ni girdi’en e tabinaw rok Kloe ni karogned ngog nib tamilang ni gimed be malu’ag thin 12 ni ba’aray rogon: ra bigimed ma be yog ban’en nib thil. Be’ e ke ga’ar, “I gag e gub mu’un ngak Paul”; ma be’ e ke ga’ar, “I gag e gub mu’un ngak Apollos”; ma be’ e ke ga’ar, “I gag e gub mu’un ngak Peter”; ma be’ e ke ga’ar, “I gag e gub mu’un ngak Kristus.” 13 Ere kan wereg Kristus* Ere kan wereg Kristus; boch e babyor e bay riy ni Kristus e dabyag ni ngan wereg. kan yo’ornag ulung! Ere mini’ e ke yim’ u daken e kuruth ni fan ngomed? Gur i Paul? Gur ntawfe nagmed ni aram e kam manged pi gachalpen Paul?
14 Gu be pining e magaer ngak Got nda gu tawfenag bigimed, ma kemus ni Krispus nge Gayus e gu tawfe nagrow. 15 Ere dariy be’ nrayag ni nge ga’ar e ntawfe nagmed ni aram e kam manged pi gachalpeg. 16 (Ah, ku errogon ni gu tawfenag Stefanas nge girdi’en e tabinaw rok; machane dakuriy be’ ngabang ni kug manang ni gu tawfenag.) 17 Kristus e gathi pi’eg nggub ngomed ni nggu tawfe nagmed. Yi pi’eg nggub ngomed ni nggu weliy ngomed fare Thin Ni Bfel’, ma nggu weliy ngomed ndab gu maruwel ko gonop nma yib rok e girdi’, ya ra m’aynag gelngin e yam’ ni tay Kristus u daken e kuruth.
Kristus e ir gelngin Got me ir e gonop rok Got
18 Ya murung’agen e yam’ ni tay Kristus u daken e kuruth e thin ko balyang u wan’ e pi’in kar maloggad; machane rogon u lanin’dad e pi’in kad thapgad ngak Got e ireram gelngin Got. 19 Ya babyor nib thothup e be ga’ar:
“Bay gu kirebnag e gonop rok e pi’in yad ba llowan’,
bay gu m’aynag fan e llowan’ rok e pi’in nib tolang e sukul rorad.”
20 Ere uw rogon e pi’in yad ba gonop? Ara pi’in nib tolang e sukul rorad? Ara pi’in yad ba salap i lu’ag murung’agen ban’en u roy u fayleng? I Got e ke dag ni gonop nu roy u fayleng e balyang!
21 Ya Got e gonopiy ni nge dabiyag ni nge nang e girdi’ Got u gelngin e gonop rorad. Machane ke turguy Got ni nge thapeg ngak e pi’in ke mich Jesus Kristus u wun’rad nu daken e re thin ni ba’aray ni gamad be machibnag ko girdi’, nike yog boch e girdi’ e “thin ko balyang” ngay. 22 Piyu Israel e yad ba’adag e maang’ang ni nge m’ug ngar guyed nge mang mich riy, ma piyu Greece e yad be gayiy e llowan’. 23 Ma gadad e gadad be weliy murung’agen Kristus nni kuruthnag, ni bbugithin ndabun piyu Israel ma thin ko balyang u wan’ e pi’in gathi yad piyu Israel; 24 machane rogon u wan’ e pi’in ke piningrad Got, ni piyu Israel nge pi’in gathi yad piyu Israel, e re morong’ag ney e Kristus, ni ir e aram gelngin Got nge gonop rok Got. 25 Ya n’en ni be finey e girdi’ ni balyang rok Got e ka ba ga’ e gonop riy ko gonop rok e girdi’, ma n’en ni be leamnag e girdi’ ni me’waer rok Got e kab gel nga gelngin e girdi’.
26 Pi walageg ni girdi’en Kristus, nge bigimed me leamnag rogon ni immoy ko ngiyal’ ni ba’aram ni piningmed Got riy. Ri in i gimed e immoy nib gonop, ara ma yog e thin, ara ba tolang u rogon e tafinay nma tay e girdi’. 27 I Got e tafinaynag ni nge mel’eg e tin be finey e fayleng ni dariyfan, ni fan e nge tamra’nag e girdi’ ni gonop, nge n’en ni be finey e fayleng nib me’waer, ni fan e nge tamra’nag e pi’in nma yog e thin. 28 Ke mel’eg e pi’in be tafinaynag e fayleng ni yad ba sobut’, ma dabun e girdi’ dakenrad, ma yibe finey ndariy rogorad, ni fan e nge darifannag e tin be finey e girdi’ nu fayleng ni ir e ba ga’ fan. 29 Fan e re bugithin ney e dariy ta’abe’ nrayag rok ni nge ufanthin u p’eowchen Got. 30 Machane Got e ke fekmed ke ta’ab girdi’nagmed Kristus Jesus, ma ke tay Got Kristus ni ir e kemang e birodad e gonop; nu daken Kristus e ke mat’aw nagdad Got riy ngak, kad manged e tirok’ Got e girdi’ nib thothup, ma ke pithigdad u gelngin mo’onyan’. 31 Aram fan ni “En ni ba’adag ni nge weliy murung’agen e n’en nike ngongliy Somol, me mang ir e uf ngay,” ni bod rogon ni be yog e babyor nib thothup.

*1:13 Ere kan wereg Kristus; boch e babyor e bay riy ni Kristus e dabyag ni ngan wereg.