9
Got ni m’ug bayay ngak Solomon
(2 Kronicles 7:11–22)
Tomuren nike mu’ Solomon i toy fare Tempel nge naun rok ni tafen e pilung, nge urngin e naun ni leamnag ni nge toy, me m’ug SOMOL ngak bayay ni bod ni m’ug ngak u Gibeon. Me ga’ar SOMOL ngak, “Ku gu rung’ag e meybil rom. Re Tempel ney ni kam toy e ku gu tay nike mang Tempel rog ni ngu’un meybil ngog riy ndariy n’umngin nap’an. Bay ug matanagiy ma gu be yoror riy ni gubin ngiyal’. Fa’anra um pigpig ngog ni bod ni i rin’ e chitamam i David, ni i par nib yul’yul’, ma ba yal’uw, ma ga be rin’ urngin e tin kugog ngom ni ngu’um rin’, ma ga be fol ko pi motochiyel rog, ma gu ra tay nga tagil’ e tin gu micheg ngak e chitamam i David ni fa’an gog ngak ni gubin ngiyal’ ni pi’in owchen e bay u ra gagiyeggad u Israel. Machane gur fa pi’in owchem e fa’an gimed ra tal i lekeg, nge dab kum folgad ko pi motochiyel rog nge tin kugog ni ngu’um rin’ed, mu’um ted fan yugu boch e got, ma aram e nggu chuweg yu Israel ni girdi’ rog ko re nam ney ni gag e kug pi’ ngorad. Ma kug ra n’ag e re Tempel ney ni gag e kug thothupnag ni aram e gin ni ngu’un liyor ngog riy, ma girdi’ u gubin yang e bay ur moninggad ngak yu Israel ma yad be darifan nagrad. Ma bayi par e re Tempel ney nib puth, ma urngin e girdi’ ni bay urbad u charen ngranod e yad ra gin ngay me lungurad, ‘Mang nike yodoro’nag SOMOL e re nam ney nge re Tempel ney?’ Ma bayi fulweg boch e girdi’ ni nge lungrad, ‘Bochan e n’ag e girdi’ ko re nam ney SOMOL ni Got rorad, ni ir e fek pi chitamangirad ni kakrom nga wuru’ e nam nu Egypt. Ra chelgad ngak yugu boch e got ngu ur ted farad ma yad be pigpig ngorad. Aram fan nike girengiy SOMOL e re riya’ ney nga dakenrad.’ ”
Tha’ u thilil Solomon nge Hiram
(2 Kronicles 8:1–2)
10 Rliw’ e duw ni toy Solomon fare Tempel nge fare naun rok ni tafen e pilung. 11 Me Hiram ni Pilung nu Tyre e ke pi’ urngin e gek’iy ni cedar nge pine nge urngin e gol ni ba’adag Solomon ni nge fanay ko re maruwel rok ney. Ma nap’an ni m’ay fare maruwel, me pi’ Solomon ni Pilung rliw’ e yuchi binaw u lan e nug nu Galilee ngak Hiram. 12 Me yan Hiram ni nge guy fa yuchi binaw, ma dabun. 13 Ma aram me ga’ar ngak Solomon, “Walageg, mog, irera’ e yuchi binaw ni kam pi’ ngog!” Aramfan ni rengi n’em e ka yima yog fithingan ni Kabul.* KABUL: Kabul e gowa lingan fare bugithin ni Hebrew ni “Dabibung.” 14 Ma ke chugur i gaman lal e ton e gol nike pi’ Hiram ngak Solomon.
Ku boch e tin ni thagnag Solomon
(2 Kronicles 8:3–18)
15 Solomon ni Pilung e maruwel ko pi sib ngar toyed fare Tempel nge fare naun ni tafen e pilung, miyad suguy bang e binaw nga ba’ ni ngek ko fare binaw, miyad ngongliy e yaror nge liyeg fare binaw nu Jerusalem. Miki maruwel ngorad ngar ngongliyed bayay fapi binaw nu Hazor, Megiddo, nge Gezer. ( 16 Fare pilung nu Egypt e ke mael nga Gezer ke kol, me thang e fan rok urngin e girdi’ riy me tay e nifiy ko fare binaw. Ma aram me pi’ nib tow’ath ngak fare bpin ni fak ko ngiyal’ nra mabgol gow Solomon, 17 me ngongliy Solomon bayay fare binaw.) Miki maruwel Solomon ko sib ngkur ngongliyed bayay yu Beth Horon, 18 ngu Baalath, ngu Tamar u daken e ted u Judah, 19 nge fapi binaw nma cha’riy Solomon urngin e chugom rok riy, nge pi binaw ni fan ko os nge chariot rok, nge urngin e tin kabay ni ba’adag ni nge ngongliy u Jerusalem, ngu Lebanon, nge gubin yang u lan e gin ni be gagiyeg riy. 20-21 Picha’ ni yad e sib ni i maruwel Solomon ngorad e pi’in owchen yu Kanaan ni fapi cha’ ni de thang piyu Israel e pogofan rorad nap’an nra koled fare nam ngar pired ngay. Picha’ ney e bmu’un piyu Ammor ngorad, nge pi Hittite, Perizzite, Hivite, nge Jebusite, ni pi’in owcherad e kar pired ni yad bogi sib ke mada’ ko ngiyal’ney. 22 Me Solomon e de tay piyu Israel ni ngar manged sib; ya yad e ra manged salthaw rok, nge pi tolang ko salthaw, nge tagafaliy e yu raba’ i salthaw, nge pi’in ma yannag e pi chariot, nge girdi’en e yan u os.
23 Immoy 550 e tolang ko salthaw ni yad e yad ma gonpiy rogon e yu guruy i maruwel ni ngan ngongliy rok Solomon.
24 Me ubung Solomon bang e binaw u ba’ ni ngek fare binaw, nga tomuren nike chuw le’engin ko fare Binaw rok David ke yan ko fare tafen e pilung ni toy Solomon ni tafen re bpin nem ni fak fare pilung nu Egypt.
25 Ma dalip yay u reb e duw nma pi’ Solomon e maligach ni mo’oruf nge maligach nma gapaseg thilin Got nge girdi’ u daken fare altar nike toy ni fen SOMOL. Ma ku ma urfiy e incense ngak SOMOL. Ma aram me mu’nag i toy fare Tempel.
26 Miki toy Solomon ni Pilung bu’lung i barkow u Eziongeber, nib chugur nga Elath u dap’el’ay ko fare Nguy ni Aqaba fithingan, u lan fare nam nu Edom. 27 Me pi’ Hiram ni Pilung boch e sala ko fapi barkow rok ni kar salapgad ko malwel ni ngar marwelgad e tirok Solomon e sala. 28 Mar taraggad ngranod ko fare nam nu Ofir ngar feked e gol u rom, nib ba chugur i ragag nge nel’ e ton tomalngin; ngar sulweged ngak Solomon.

*9:13 KABUL: Kabul e gowa lingan fare bugithin ni Hebrew ni “Dabibung.”