BABYOR NI
2 KRONICLES
Murung’agen e Re Ke Babyor Ney
Kaen ni l’agruw e Kronicles e tabab ko gin ni mus fa kaen ni m’on e Kronicles riy. Keanney e be weliy murung’agen e gagiyeg rok Solomon ni Pilung, nge murung’agen e togopoluw ni tay fapi genong ko ler ni lel’och e nam, ni Jeroboam e girengiy i yib nge togopluw nagrad ngak Rehoboam ni fak Solomon ni Pilung ni ir e ke fek loen Solomon. Ma ki ul ul nga chepin gil’ilungun e pilung nu Judah nge yani taw ko ngiyal’ nni kol yu Jerusalem ko duw ni 586 (B. C.) u m’on ndawori yib Kristus.
Gathon e Re Ke Babyor Ney
Gagiyeg rok Solomon 1:1—9:31
a. Pi Duw ni Somm’on 1:1–17
b. Tempel ni kani Toy 2:1—7:10
c. Pi Duw ni Yib nga Tomuren 7:11—9:31
Togopluw ni tay fapi Genong ko Ler ni Lel’och e Nam 10:1–19
Pi Pilung nu Judah 11:1—36:12
Jerusalem nni Kol 36:13–23
1
Solomon ni Pilung ni meybilnag e Gonop
(1 Kings 3:1–15)
Solomon ni be’ nib pagel ni fak David e i kol e thin ko nam nu Israel, ma SOMOL ni Got rok e fal’eg wa’athan me tay nrib gel gelngin.
I Solomon ni Pilung e yog e n’en nge rin’ gubin e pi tolang ko yu raba’ i salthaw ni yu biyu’ girdi’en nge yu ra’ay, nge gubin e pi tolang ko am, nge gubin pi lolgen e tabnaw, nge tin kabay e girdi’, ni be ta’chiylen ngorad ni ngar uned ngak ngranod ko gin tagil’ e meybil u Gibeon. Ranod e ngaram ya ireram e gin bay fare Tent u p’eowchen SOMOL riy, ni fa’ani toy Moses ni tapigpig rok SOMOL u daken e ted. ( Machane fare Kahol ko M’ag e yibe ayuweg u Jerusalem u lan fare tent ni n’uf David ni Pilung ngalang nnap’an ni yan i fek fare Kahol ko M’ag u Kiriath Jearim.) Fare altar ni bronze ni ngongliy Bezalel, nib mo’on ni fak Uri ma Hur e tutuw rok, e ki immoy u Gibeon u mit fare Tent u p’eowchen SOMOL. I Solomon ni Pilung nge gubin e girdi’ ni ur liyorgad ngak SOMOL u rom. U mit fare Tent e liyor e en pilung ngak SOMOL riy ni be pi’ e maligach u daken fare altar ni bronze; bbiyu’ e gamanman nli’ ngan urfiy ni polo’ u daken.
Re nep’ i n’em me m’ug Got ngak Solomon me fith ni ga’ar, “Mang e ga ba’adag ni nggu pi’ ngom?”
Me fulweg Solomon ni ga’ar, “Gubin ngiyal’ ni ga ma dag ngak e chitamag i David nrib t’uf rom, ma chiney e ka mu teg kug wan nga luwan ku gu mang pilung. SOMOL ni Got, mu tay nga tagil’ e n’en nim micheg ngak e chitamag. Ka mu teg ni gag e pilung rok bogi girdi’ ni yad ba yo’or ni dabkiyag i the’egrad, 10 ere mu pi’ e gonop nge tamilangan’ ngog, ya bt’uf rog ko gagiyeg ni nggu tay ngorad. Ya fa’anra dangay me’ere bu uw rogon me yag ni nggu gagiyegnag e pi girdi’ rom ney nike pag urunginrad?”
11 Me fulweg Got lungun Solomon ni ga’ar, “Bmat’aw e n’en ni kam mel’eg. Ya da muning e fla’ab ara tin ba tolang pulwon, ara sorok, ara pi to’ogor rom ni ngar mad’, ni mus ko yafos rom ma da muning ni nge n’uw nap’an, ka muning e gonop nge tamilangan’ ya nge yag ni mu gagiyegnag e girdi’ rog, ni ku gu tem ni gur e pilung rorad. 12 Bay gu pi’ e gonop nge tamilangan’ ngom. Ma bay kug puthuy ngay e fla’ab, nge tin ba tolang pulwon, me gil bugwam ndariy reb e tin kakrom e pilung nge tin chiney i yan ngaram nra ta’reb rogon ngom.”
Gelngin Solomon ni Pilung nge fla’ab rok
(1 Kings 10:26–29)
13 Aram me chuw Solomon ko fa gin tagil’ e meybil u Gibeon, ko gin bay fare Tent u p’eowchen SOMOL riy nge sul nga Jerusalem. Nu rom e i gagiyegnag yu Israel riy. 14 Me kunuy barba’ i salthaw ni 1,400 e chariot rorad nge 12,000 e os ni fan ko mael. Boch e pin’ey e tay u Jerusalem, ma tin ni aw e tay u boch e binaw i yan. 15 Nap’an e gagiyeg rok ma silber nge gol e ri yo’or u Jerusalem nike bod e malang u but’, nge gek’iy ni cedar ni ki yo’or nge bod e gek’iy ni sycamore u enggin e burey. 16 Pi’in tasiyobay rok fare pilung e yad e u ra gagiyeg niged e pi os ni un chuw’iy u Musri ngu Cilicia,* MUSRI NGU CILICIA: L’agruw i binaw ni bay ko yimuch ko nam nu Turkey ni aram e gin ni un chuguliy e pi os riy u nap’an Solomon. 17 nge pi chariot ni yima chuw’iy u Egypt. Yad ma pi’ ngak e pi pilung nu Hitt ngu Syria e pi os nge pi chariot ni chuway’, pi chariot e ra ta’reb ma 600 yang e salpiy ni silber, mra ta’reb e os ma 150 yang e salpiy ni silber.

*1:16 MUSRI NGU CILICIA: L’agruw i binaw ni bay ko yimuch ko nam nu Turkey ni aram e gin ni un chuguliy e pi os riy u nap’an Solomon.