1 I Naaman ni pilungen e salthaw nu Syria e ri ma tay e pilung nu Syria fan ma ku bfel’ u wan’, ye maruwel SOMOL ngak Naaman nge gel e salthaw nu Syria ko mael. Ir reb e salthaw nib gilbuguwan, machane ba daraw. 2 Me ba yay nranod ko mael nga Israel me fek e salthaw nu Syria bochi pin nu Israel nge mang ba tapigpig ko ppin rok Naaman. 3 Me reb e rran me ga’ar e chi pin nem ngak fare pin ni masta rok, “Fa’an mang e ra yan e masta rog i guy fare profet nu Samaria ma ra chuweg e daraw rok.” 4 Fa’ani rung’ag Naaman ni aram rogon me yan ngak e en ni pilung me weliy ngak e tin keyog fachi pin. 5 Me ga’ar fare pilung ngak, “Mfek e re gi babyor ney ngam man mpi’ ko pilung nu Israel.”

Me yan Naaman nike fek ragag e biyu’ yang e silber, nge nel biyu’ yang e gol, nge ragag madan e madnom. 6 Ma thin ni bay ko fa gi babyor e be ga’ar: “Ba’aray e tapigpig rog i Naaman ni ngam golnag ko m’ar rok.”

7 Fa’ani be’eg fare pilung nu Israel fa gi babyor me ri gin ngay me guchthuy e mad rok me ga’ar, “Uw rogon nike yog e pilung nu Syria ni nggu golnag e re m’ar ney? Gur be leamnag ni gag Got ni bay gelngig nra gu pi’ e pogofan ara gu fek e pogofan? Rib gagiyel ni be guy rogon ni nge yib tapgin ni nge kireb thilmow!”

8 Faani rung’ag Elisa ni profet ni aram rogon me pi’ e thin nge yan ngak fare pilung nu Israel ni be ga’ar ngak: “Mangfan ni kam rus? Mol’og e re mo’on nir ngeb ngog me nang ni bay reb e profet u roy u Israel!”

9 Me yan Naaman u karrow rok ni be girengiy e os, me yib i tal nga langan e mab ko naun rok Elisa. 10 Me l’oeg Elisa ba tapigpig nge yog ngak Naaman ni nge yan i maluk ngalan e lul’ ni Jordan ni medlip yay, me chuw e daraw u downgin nge sul nga rogon. 11 Me yan Naaman nike damumuw ni be ga’ar, “Gu leamnag ni bay yib ngog nga wean nge meybil ngak SOMOL ni Got rok me rupoy pa’ ko yung ni bay e m’ar riy u dowag nge chuw! 12 Gathi kabfel’ e ran ko lul’ ni Abana nge Farpar ni bay u Damaskus ko urngin e lul’ nu roy u Israel? Manga gumnang ma kug maluk u lan reb kug gol!”

13 Me yib fapi tapigpig rok ngak me lungurad, “Chitamangimad, fa’an mang e keyog e re profet nem ngom ni ngam rin’ ban’en nib mo’maw’ ma rib mudugil ni ga ra rin’. Ere mangfan ndab mmaluk ni bod rogon nike yog ngom ngam gol?” 14 Me yan Naaman ko lul’ ni Jordan me lith ni medlip yay ni bod rogon ni yog Elisa ngak, me chuw e daraw rok nge par downgin ni gowa downgin bochi tir. 15 Me sul ngak Elisa ni yad e pi’in nra uned ngak me ga’ar, “Chiney e kug nang ndariy yugu reb e got nga bang, ya kemus ni Got nu Israel e bay; ere wenig ngom, mfek e tow’ath rom ni kug pi’.”

16 Me ga’ar Elisa, “Rogon feni riyul’ ni bay SOMOL ni ir e gu be pigpig ngak, e dab gu fek e re tow’ath nir.” Me tay Naaman ir ngak ni nge fek, machane me ga’ar dabi fek. 17 Me ga’ar Naaman ngak, “Fa’anra dab mfek e tow’ath ni kug pi’ ngom, me ere mpi’ ngog boch e but’ u roy nrayag ni nge fek l’agruw i gamanman ni mule nggu fek ko nam rog,*BUT’ NI NGGU FEK KO NAM ROG: Re ngiyal’ i n’em e i leamnag e girdi’ nra reb e got ma kemus nu daken e nam rok e yira pi’ e maligach riy ngak. ya chiney i yan ngaram e dab kug pi’ e maligach ara gamanman ni maligach ni mo’oruf ngak yugu reb e got, ya kemus ni SOMOL e nggu pi’ ngak. 18 Mi SOMOL e nge runguyeg nge n’agfan rog e ngiyal’ nra yan e pilung rog riy nga tempel rok Rimmon, ni fare got nu Syria, ni nge tayfan, mma todong nga paag, ma gu ma un ko siro’ u lan e re tempel rok Rimmon nem. I SOMOL e nge n’ag fan rog e binem e ngongol.”

19 Me ga’ar Elisa, “Mman u fithik’ e gapas.” Me yan Naaman.

Dawori n’uw yang nike yan Naaman riy, 20 me ga’ar Gehazi ni tapigpig rok Elisa u wan’, “Masta rog e ke pag Naaman ke yan nde fek ban’en ni puluwon rok! Susun e nge fek e n’en nike pi’ fa en nu Syria ngak. Rogon feni riyul’ ni bay SOMOL e nggu lol’oeg nggu fek ban’en rok.” 21 Me lek Gehazi Naaman. Fa’ani guy Naaman nike yib be’ ni be lol’oeg, me log u chariot rok nga but’ ni nge nang fan, me fith ngak ni ga’ar, “Mog, ke buch ban’en?”

22 Me ga’ar Gehazi, “Dangay, masta rog e ke l’ugeg ni nggog ngom ni ka fini yigi taw l’agruw i chonggin e pi profet ni yad ma par u Efraim ni go’ burey. Ba’adag Elisa ni ngam pi’ dalip e biyu’ yang e silber nge ruw wu’ e mad ni bfel’ ngorow.”

23 Me fulweg Naaman ni ga’ar, “Wenig ngom, ngam fek nnel’ biyu’.” Me wenig Naaman ngak ni ngari fek, me tay fapi silber ngalan l’agruw i tutuw me chagiy l’agruw wu’ i mad ni bfel’ ngay, me pi’ ngak l’agruw i tapigpig rok ngar fekew ngranow ni yow be m’on ma be lay Gehazi. 24 Ma fa’anra tawgad ko fare burey ko gin be par Elisa riy me fek Gehazi fa gal tutuw nge yan i tay nga naun. Me yog ngak fa gal tapigpig rok Naaman ni ngar sulow. 25 Me sul nga naun, me fith Elisa ngak ni ga’ar, “Gehazi, uw e ka mub riy?”

Me ga’ar Gehazi, “Dawor gub u bang.”

26 Me ga’ar Elisa ngak, “Lanin’ug e immoy u rom ko fa ngiyal’nem ni log fare mo’on u chariot rok nga but’ ni ngam nonow. Gathi irera’ ngal’an ni ngan fek e salpiy, nge mad, nge yungi woldug ni olive nge yungi woldug ni grape, nge saf, nge garbaw, ara tapigpig. 27 Ma daraw rok Naaman e bay yib ngom nge pi’in ni owchem ni dariy n’umngin nap’an.”

Me chuw Gehazi u p’eowchen Elisa nike daraw, nge yan ni kari wechwech downgin ni bod ra’en e ayis nma mul u lang nga but’.