1 Ma ngiyal’nem me pining Elisa ni profet reb fa tin kab pagel e profet me ga’ar ngak, “Mu fal’eg rogom ngam man nga Ramoth u Gilead. Mu fek e re malor i gapgep ney ni olive nge un ngom, 2 ma nap’an ni ga ra taw ngaram mag changarnag i Jehu, nib mo’on ni fak Jehoshafat ni Nimshi e tutuw rok. Mag fek nga reb e senggil ni yigo’ gimew ndabi un e pi’in yad ngomew, 3 mag pu’og e re gapgep ney ni olive nga daken lolgen, me lungum, ‘Keyog SOMOL nike gapgep nigem ni ngam mang pilung nu Israel.’ Ma aram mag chuw u rom ni ka chingiyal’ nem.”

4 Ma aram me yan fare profet ni kab pagel nga Ramoth, 5 ko gin ni pir’eg fapi tolang ko salthaw riy ni yad be muulung. Me ga’ar, “Siro’, bay bbugithin ni ngog ngom.”

Me fith Jehu ni ga’ar, “Mini’ romad e ga be non ngak?”

Me fulweg ni ga’ar, “Siro’, I gur.” 6 Ma aram mranow ni yow l’agruw ngalan e senggil, me pu’og fare profet ni kab pagel fare gapgep ni olive nga daken lolgen Jehu me ga’ar ngak, “I SOMOL, ni Got nu Israel, e be ga’ar: ‘Gu be gapgep nagem ni ngam mang pilung rok e girdi’ rog ni piyu Israel. 7 Gur e ngam li’ nge yim’ fare masta rom ni fare pilung, fare mo’on ni fak Ahab, ya nggu gechignag Jezebel ni bochan e ke thang e fan rok e pi profet rog nge ku boch e pi tapigpig rog. 8 Urngin i chon e tabnaw rok Ahab nge pi’in owchen e ngarm’ad; bay gu thang mit urngin e pumo’on u lane tabnaw rok, nge bitir nge pilbithir ni ta’reb rogon. 9 Bay gu rin’ ngak e tabnaw rok ni bod ni kug rin’ ngak e pi tabnaw rok Jeroboam ni Pilung nu Israel nge Baasha ni Pilung nu Israel. 10 Me Jezebel e dab ni k’eyag; downgin e bayi longuy e pilis u lan e gin tafen Jezreel.’ ” Ma nap’an ni mu’ i yog e biney, me chuw fare profet ni kab pagel u lan fare senggil me mil nge yan.

11 Me sul Jehu ngak fa pi’in yad ni pi tolang ko salthaw, miyad fith ni lungurad, “Mog kabfel’ rogon urngin ban’en? Mang e ba’adag fare mo’on nib aliliy ni ngam rin’?”

Me fulweg Jehu ni ga’ar, “Gimed manang ko mang e ba’adag.”

12 Miyad fulweg ni lungurad, “Dangay’, dagnanged! Mog ngomad ko mang e keyog!”

“Keyog ngog ni be ga’ar SOMOL: ‘Kug gapgep nigem ni ngam mang pilung nu Israel.’ ”

13 Ma ka ngiyal’nem me filath e pi tolang ko salthaw ni yad Jehu e pi wuru’ e mad rorad nga daken e tawo’ ni nge sak’iy Jehu nga daken, miyad thoy e pi rappa, miyad tolul ni be lungurad, “I Jehu e pilung!”

14-15 Ma aram me makath i Jehu nib togopluw ngak Joram ni Pilung, ni immoy u Jezreel, ni gin ni yan ngay ni nge gol ko maad’ad ni tay u fithik’ fare mael u Ramoth nib togopluw ngak Hazael ni Pilung nu Syria. Aram me yog Jehu ko pi’in yad ni pi tolang ko salthaw ni ga’ar, “Fa’anra gadad ngabang, ma ngam gonpiyed ni dariy be’ ni nge lu’or nga wuru’ yu Ramoth nge kuruf e thin ngak e girdi’ nu Jezreel.” 16 Ma aram me af Jehu ngalan e chariot rok nge yan nga Jezreel. Ma ka dawori fel’ rogon Joram ko maad’ad ni tay, ma bay Ahaziah ni Pilung nu Judah u rom ni be nang salpen.

17 Me guy ba tamatnag ni ir e be maruwel ni bay u lan fare wulyang ntagil’ e damit u Jezreel i Jehu nge pi salthaw rok ni yad be yib i yib. Me tolul ni be ga’ar, “Gu be guy bogi pumo’on ni yad be yib u os i yib!”

Me fulweg Joram ni ga’ar, “Mu l’oeg reb i girdi’en e yan u os nge nang fan ko yad bogi fager fa bogi to’ogor.”

18 Me yan fare mol’og u daken e os i yan ngak Jehu me ga’ar ngak, “En ni pilung e ba’adag ni nge nang ko kamub ni fager fa dangay.”

Me fulweg Jehu ni ga’ar, “Dariy rogom ko tiney! Mman nga tomur ngam lekeg.”

Me yog fare tamatnag nu p’ebugul fare wulyang ko damit nike taw fare mol’og ko fare ulung i girdi’ machane da kisul. 19 Mu kun pi’ reb e mol’og nge yan, ma ku ta’ab n’en e fith ngak Jehu. Miki fulweg Jehu ni ga’ar, “Dariy rogom ko tiney! Mman nga tomur ngam lekeg.”

20 Miki yog fare matnag bayay nike taw fare mol’og ko fare ulung machane daki sul. Miki ga’ar, “En ni be gagiyegnag fare ulung e be yib u daken e chariot rok ni gowa ba aliliy, nri bod Jehu!”

21 Me yog Joram ni Pilung ni ga’ar, “Ngan fal’eg rogon e chariot rog.” Min rin’, miyow yan i Ahaziah ni Pilung i yan, ra bagyow ma bay u langgin e birok e chariot, ni ngar mada’ nigew Jehu. Marbad ra mada’gad nga daken fare gi flang rok Naboth. 22 Me fith Joram i Jehu ni ga’ar, “Mog, ga be yib u fithik’ e gapas?”

Me fulweg Jehu ni ga’ar, “Bu uw rogon me aw e gapas, ni go’ kabay rodad gubin e pig nge meybil ngak yug boch e got ni tababnag e chitinam i Jezebel?”

23 Me tolul Joram ni aram e ke cheleg e chariot rok u but’ ni nge mil, ni ga’ar, “Ahaziah, ba wup ni ngan li’ dow!” 24 Me girengiy Jehu e gat’ing rok, me pag ba gan e gat’ing ni kari mus gelngin me yan ni rog nga daken keru’ Joram nge kuruf gumircha’en. Me thig Joram u lan e chariot rok nike yim’, 25 me ga’ar Jehu ngak Bidkar ni ta’ayuw rok, “Mu fek e ldow rok nga mun’ nga daken fare gi flang rok Naboth. Kagmanang nnap’an ni u darow u os u ta’bang u keru’ e chitamngin Joram ni Pilung ni aram Ahab, me yog SOMOL e pi thin ni ba’aray nib togopluw ngak Ahab ni ga’ar: 26 ‘Kug guy e cham ntay ngak Naboth nge fapi pumo’on ni pifak fowap. Mu gu micheg ni ku roy u lane rengi flang ney e gu ra gechig nigem riy.’ ” Me ga’ar Jehu ngak fare ta’ayuw rok, “Ere mu fek e ldow rok Joram, nga mun’ nga daken fare gi flang rok Naboth, ya nge yani aw e tin keyog SOMOL nga tagil.”

27 Me guy Ahaziah ni Pilung e n’en ke buch, ma aram me mil u chariot rok i yan ko fachi binaw nu Beth Haggan, ni be tuluf Jehu. Me yog Jehu ngak e pi salthaw rok ni ga’ar, “Kum thanged e fan rok!” Miyad maad’ad ngak ni be yan u chariot rok u kanawo’ i yan nga talang nga Gur, u to’oben fachi binaw nu Ibleam. Machane mri athmagil nge yan nge taw ko fare binaw nu Megiddo, ni aram e gin ni yim’ riy. 28 Me fek e pi tolang ko salthaw e ldow rok u lan e chariot ngar fulweged nga Jerusalem miyad k’eyag ngalan fapi low ko yam’ rok e pilung u lan fare Binaw rok David.

29 I Ahaziah e mang pilung nu Judah ko re duw ni gaman e ragag nge ta’reb e duw ngay nike mang Joram nib mo’on ni fak Ahab e pilung nu Israel.

30 Me taw Jehu nga Jezreel. Ma ke rung’ag Jezebel e n’en nike buch, me yan i achey owchen, me fal’eg rogon piyan lolugen, me yan i sak’iy ngi i sap nga kanawo’ u langan e winda ko fare naun ni tafen e pilung. 31 Ma nap’an ni yib Jehu u langan e garog, me tolul ngak ni ga’ar, “Gur Zimri!*ZIMRI: Be’ nib tolang ko salthaw u Israel ni li’ e pilung nu Israel (ku arrogon ni bay ko 1 Ki 16:8–12). I gur e re tathang pogofan! Mangfan ni kamub ngaray?”

32 Me sap Jehu ngalang me tolul ni ga’ar, “Mini e bay u ba’ rog?” Ma l’agruw fa dalip e pi tolang ko salthaw nu lan fare naun rok e en pilung e ra sapgad ngak nga but’ u ba winda, 33 me ga’ar Jehu ngorad, “Mun’ed e re bpin nir nga but’!” Miyad yin’ fare pin nga but’, me wear e racha’ rok ngadow e rungrung nge nga daken e pi os. Me yannag Jehu e pi os nge chariot rok u daken fare ldow, 34 me yan ngalan fare naun ko pilung nge yan i abich. Fin ni mu’ me ga’ar, “Mu feked e re bpin nem ni kani gechignag ngam k’eyaged; ya go’ gadad manang nib fak e pilung.” 35 Machane fapi pumo’on nranod nga wean ni ngar k’eyaged fare pin e kemus ni lo’ u lolugen nge yilen i rifrifen pa’ nge rifrifen ay e ra piri’egged. 36 Ma nap’an nrogned e biney ngak Jehu, me ga’ar, “Irera’ e n’en ni yog SOMOL nra buch nnap’an ni non u daken fare tapigpig rok i Elijah: ‘Pilis e yad ra longuy e ldow ku Jezebel u lan yu Jezreel. 37 Ma tin nra magey ko fare ldow e bayi wagey u rom u but’ ni bod t’ay e gamanman, ya nge dakuriy be’ nra poy ni ir Jezebel.’ ”