22
Tangin e gel ko mael ni tay David
(Psalm 18)
1 Irera’ fare tang ni yin’ David ngak SOMOL ko fa ngiyal’nem ni ayuweg SOMOL David u pa’ Saul ngu pa’ yugu boch e pi to’ogor rok. I ga’ar:
2 I SOMOL e ma ayuweg e pogofan rog;
i ir e naun rog ni kan yororiy ni fan ko mael.
3 Got rog e ir e manaf rog,
gu be par rok ndabi buch ban’en rog;
ma yoror rog ni bod bangi shield nma fek e salthaw ngu’ur mithgad nga fon ko mael;
ma par rog ndabi buch ban’en rog.
Ir e ma ayuweg e pogofan rog;
ma ayuwegneg ko ngiyal’ nike yib e cham ngog.
4 Kug non ngak SOMOL,
ma ke ayuwegneg rok e pi to’ogor rog.
Nga ni pining e sorok ngak SOMOL!
5 Yam’ e longobiyeg ni bod e n’ew,
riya’ e yib nga dakenag ni bod e n’ew.
6 Yam’ e chichi’iy e gaf rok nga lukngug,
ma low ko yam’ e tay e wup rok ni nggu aw ngay.
7 Gu non ngak SOMOL u fithik’ e gafgow ni yib ngog;
gu non ngak e Got rog ni nge ayuwegneg.
Me rung’ag lungug u tempel rok;
i motoyil nga lungug ni gu wenig ngak ni nge ayuwegneg.
8 Ma aram me durru’ e but’ ngi i rur;
me rur lanelang ngi i da’da’,
ya ke damumuw Got!
9 Me po’ e ath u lan p’ethungun nga but’,
me yib e daramram nge kol ni be gabulbul e nifiy riy u l’ugun nga but’.
10 Me guchuthuy lanelang nge mab nge yib riy nga but’
nib sak’iy nga daken bangi manileng nib talumor.
11 I changeg u lang nga but’ ni bay u daken keru’ e kerubim;
i yan nib machreg nike af nga daken pon e nifeng.
12 Ma ke ing ir ko lumor;
manileng nib dub’ag nib sug ko ran e ke yib i ing;
13 be gabulbul e pi achaffin ni be thethay ko uluch ni be mat u p’eowchen.
14 Me gagiyegnag SOMOL ngi i chub e dirra’ u lanelang,
min rung’ag laman Got nib Th’abi Tolang.
15 I pag gan e gat’ing nge wereg e pi to’ogor rok;
me gagiyegnag nge matmat e uluch miyad mil.
16 Me m’ug t’ay e regur,
me chuw e upong u daken e pi def ko fayleng
nap’an nra puwan’ SOMOL ngak e pi to’ogor rok
me non ngorad ni ba ga’ laman u fithik’ e damumuw.
17 I SOMOL e k’iyag pa’ u tharmiy nge koleg;
me girngiyeg nge chuwegneg u fithik’ e ran nib to’ar.
18 I chuwegneg u pa’ e pi’in yad be fanenikayeg,
ngu pa’ e pi to’ogor rog nib thil gelngimad ni yad ba gel ngog!
19 Nap’an ni yib e gafgow ngog miyad og ngog,
machane SOMOL e i yororiyeg.
20 I ayuwegneg nggu chuw u fithik’ e riya’;
i chuwegneg u fithik’ e riya’ ya gub fel’ u wan’.
21 I SOMOL e ke pi’ puluwog ya gub mat’aw;
be ayuwegneg ya dawor gu bucheg ban’en.
22 Kug fol ko motochiyel rok SOMOL;
dawor gu togopluw ngak e Got rog.
23 Urngin e pi motochiyel rok ni gu be tay nga tagil’;
dariy bingyal’ ni ku gu pag ni dag fol ko tin keyog ni ngan rin’.
24 Manang ndariy e kireb ni kug rin’,
ma kug teg u urel ko kireb.
25 Ere ke pi’ puluwog ya gub mat’aw,
ya manang ndawor gu bucheg ban’en.
26 SOMOL, i gur e ga ma yul’yul’ ngak e pi’in yad ba yul’yul’ ngom,
ma ri gab gol ngak e pi’in yad ba yal’uw.
27 Pi’in nib machalbog e gab thothup u wun’rad,
ma pi’in kireb e ga be par ndar fel’gad u wun’um.
28 Pi’in ba sobut’an’rad e ga ma chuwegrad u fithik’ e gafgow,
ma ga ma sobut’nag e pi’in nib tolangan’rad.
29 SOMOL, i gur e tamilang rog;
gur e kam chuweg e lumor ni ug par u fithik’.
30 Gur e ga ma pi’ gelngig ni nggu og ngak e pi to’ogor rog,
ma ga ma pi’ gelngig nggu t’ar e yoror rorad nga dakenrad.
31 Re Got ney e rib yal’uw e ngongol rok,
thin rok e rayag ni ngan toer ngay ya der ma thil!
Ir e bod bang i shield nma pilig e salthaw e pi talin e cham ngay,
be par ni aray rogon u puluwon urngin e pi’in yad ma mil ngak ni nge yoror rorad.
32 Kemus ni SOMOL e ir e Got;
kemus ni Got e ir e yoror rodad.
33 I Got e ba manaf nib gel ni gu ma naf ngay,
ma gagiyeg nigeg u daken e kanawo’ ni gu be yan riy ni nge dabi buch ban’en rog.
34 Ma gagiyegnag e rifrif u eg nggu wan gu tay nib mudugil ni bod e rifrif u ay ba gamanman ni dir;
ma gagiyegnag nge dabi buch ban’en rog u daken e pi burey.
35 Ma sukul nigeg ni fan ko mael,
ya nge yag ni gu maruwel ko bin th’abi gel e gat’ing.
36 SOMOL, mu yoror rog ma ga be ayuweg e pogofan rog;
ayuw ni kam tay ngog e ke gilnag buguwag.
37 Kam gagiyegnag gu be par ndawor gu yag rok e pi to’ogor rog,
ma dawor gu waer.
38 Gu ma lol’oeg e pi to’ogor rog nggu li’rad;
dagur ma tal nge mada’ ko ngiyal’ ni kug gel ngorad.
39 Gu ra li’rad, ma dabkiyag ni ngar sak’iygad;
miyad par u but’ u to’oben e rifrif rog ni kar waergad.
40 Ga ma pi’ gelngig ni fan ko mael,
ma ga ma gagiyegnag ngug gel ngak e pi to’ogor rog.
41 Ga ma gagiyegnag e pi to’ogor rog ngar milgad rog;
mu gu li’ e pi’in yad be fanenikayeg.
42 Yad be gayiy e ayuw, ma dariy be’ nrayag rok ni nge ayuwegrad;
yad be non ngak SOMOL, machane der fulweg lungurad.
43 Kug pirdi’iyrad kar pired ni yad bod e fiyath;
gu be yit’yit’rad nga but’ ni bod e rungdu’ u daken e kanawo’.
44 Kam ayuwegneg u pa’ e girdi’ ko nam rog nra togopluwgad ngog,
kam teg ni gag e gu be gagiyegnag e pi nam;
girdi’ ni ug par nda gu nang owcherad e gag e gu be gagiyeg nagrad e chiney.
45 Girdi’ nu bang e yad be siro’ u p’eowcheg;
yad ra rung’ag e tin kugog miyad fol riy.
46 Ke mulan’rad,
kar paged e yungi n’en nra yororiyed ni fan ko mael karbad ni yad be t’on ko marus.
47 I SOMOL e be par nib fos! Nga ni pining e sorok ngak e en ni be yoror rog!
Got e be’ nib gel ni be ayuweg e pogofan rog! Nga ni weliy ngak e girdi’ feni sorok!
48 Ma gagiyeg nigeg ngug gel ngak e pi to’ogor rog;
ma tay e girdi’ nga tan pa’ag ngu’ug gagiyeg nagrad,
49 ma chuwegneg u pa’ e pi to’ogor rog.
SOMOL, i gur e ga ma gagiyeg nigeg ngug gel ngak e pi to’ogor rog,
ma ga ma yororiyeg rok e pi’in yad ma cham ngog.
50 Ere bay ug pining e sorok ngom u fithik’ e pi nam;
bay ug tang nigem ni gu be pining e sorok ngom.Rom 15:9
51 En ni Got e turguy ni nge mang pilung e Got e be gagiyegnag be gel ko to’ogor rok;
be dag ngak e en ni ir e turguy ni be par e t’ufeg rok u daken ndabi thil,
ni be dag ngak David nge pi’in ni owchen ndariy n’umngin nap’an.
DRAFT VERSION — Proofreading in progress