1 Me yib boch e pumo’on u Judea nga Antiok miyad tabab i machibnag ngak e pi’in girdi’en Kristus ni be lungurad, “Fa’anra dab ni maad’ad nagmed ni bod rogon nike yog e Motochiyel rok Moses ma dabiyag ni ngam thapgad ngak Got.” 2 Me baraba’ Paul nge Barnabas ngar lulu’aged e pi cha’nem e thin nib gel u murung’agen e re bugithin ney, miyad be puluwnag urngin ban’en ni nge yan i m’ug e bin ni ir; ma aram min turguy ni Paul nge Barnabas nge boch fa pi’inem ni yad bay u Antiok e ngranod nga Jerusalem ngar guyed e pi apostel nge pi’in pi’ilal u murung’agen e re bugithin ney.

3 Miyad yan ni girdi’en e galesiya e ke l’oegrad, ma nap’an nranod u lan yu Fonicia nge yu Samaria miyad weliy ngak girdi’en e galesiya ko gali yang i nug nem rogon nike thap e pi’in gathi yad piyu Israel ngak Got; ma re bugithin ney e ba ga’ ba felfelan’ ni pi’ ngak urngin e tin ni ba’aram i girdi’en Kristus ni kar rung’aged. 4 Ma nap’an nra tawgad nga Jerusalem me felfelan’ girdi’en e galesiya ngorad ni karbad, ma ku errogon e pi apostel nge pi’in pi’ilal ko galesiya, ni ireray e picha’ nrogned ngorad murung’agen urngin ban’en ni ngongliy Got u pa’rad. 5 Ma boch e Farise ni kar piggad ke mich Jesus u wun’rad e ra sak’iygad nge lungurad, nganog ngak e pi cha’nem ndabisiy ni ngan maad’ad ni bod ni yog e motochiyel rok Moses ma nganog ngorad ni ngar folgad ko Motochiyel rok Moses.

6 Fapi apostel nge pi’in pi’ilal ko galesiya e ra mu’ulunggad ngar puruy’niged murung’agen e re bugithin ney. 7 Ba n’uw nap’an nra puruy’gad me sak’iy Peter me ga’ar, “Gimed pi walageg, gimed manang ni turguyeg Got u fithik’med ko som’on ni nggu machibnag ngak e pi’in gathi yad piyu Israel e Thin Ni Bfel’ ni yib rok Got, ni fan e ngar rung’aged me mich u wun’rad. 8 Mi Got, ni ir e manang laniyan’ urngin e girdi’ e dag ni bfel’ e pi’in gathi yad piyu Israel u wan’, ni fan e pi’ e Kan Nthothup rok ngorad, ni bod rogon nike pi’ ngodad. 9 De taydad ni gadad ba thil rorad; ya n’ag fan e denen rorad ni fan e mich Jesus u wun’rad. 10 Ere mang ni gimed be finey ni ngam sikeng niged e gumaen’ rok Got e chiney ni fan e kam fineyed ni ngam ted ban’en nib tomal nga daken keru’ e pi’in ke mich Jesus Kristus u wun’rad, ni ban’en ni mus ngak e pi chitamangidad nge gadad ma de taw rodad. 11 Danga’! I mich Jesus u wun’dad Me thapegdad Somol Jesus ngak Got ni bochan e be runguydad, ni bod rogon e tin ni ba’aram e girdi’ ni gathi yad piyu Israel.”

12 Me par girdi’en fare ulung ndaki non be’ nnap’an ni yad be motoyil ngak Barnabas nge Paul, ni aram e yow be weliy urngin e pin’en nni ngat ngay nge pi maang’ang ni ngongliy Got u pa’row u fithik’ e pi’in gathi yad piyu Israel. 13 Ma fa’anra mu’gow ko numon, me non James ni ga’ar, “Pi walageg, mmotoyilgad ngog! 14 I Simon e ka fini mu’ i weliy rok murung’agen rogon nike dag Got nib t’uf rok e pi’in gathi yad piyu Israel, ni fan e ke fek e girdi’ u fithik’rad ni ngar manged girdi’en, ni ireram e som’on riy. 15 Thin rok e pi profet e kari ta’reb ko re bugithin ney. Ni bod rogon ni be weliy e babyor nib thothup ni be ga’ar:

19 Me ga’ar James, “Tafinay rog e dab kud magawonniged e pi’in gathi yad piyu Israel ni yad be yib ngak Got. 20 Machane ngad pi’ed e babyor nge yan ngorad, ni nga dogned ngorad ndab ra ked e ggan nde klin ni fan e kan pi’ ni maligach ko liyos nma meybil boch e girdi’ ngay; ma ngar ayuweged yad nge dab ra pired be’ ni gathi mabgol rorad; ma dab ra longuyed e gamanman nni uchuluy k’angan nge yim’, ara ra ked e racha’. 21 Ya Motochiyel rok Moses e ke n’uw nap’an ni kan be’eg u lan tafen e mu’ulung i yan ni gubin e Sabbath, ma thin rok e kan machibnag u lan urngin e binaw.”

22 Ma aram me cheag e pi apostel nge pi’in pi’ilal ko galesiya, nge girdi’en e galesiya ni polo’ miyad turguy ngar mel’eged boch e girdi’ rorad ngar l’oeged yad ngranod nga Antiok ni yad Paul nge Barnabas. Miyad duwgiliy Judas, ni ku yima pining ni Barsabbas, nge Silas ni l’agruw ni’ nma tay urngin girdi’en Kristus farow. 23 Miyad pi’ e babyor ngorad ngar feked ni ba’aray e thin riy.

“Gamad e pi apostel nge pi’in pi’ilal, ni er walagmed, e be lungumad e nge felan’ Got ngak urngin pi walagmad ni pi’in nni gargelegrad ma gathi yad piyu Israel, ni yad be par u lan yu Antiok ngu Syria, ngu Cilicia. 24 Kug rung’aged ni bay boch e girdi’ ko biromad e ulung ni karbad e nger yad be magawonnagmed ma yad be pi’ e magafan’ nga lanin’med ko thin ni yad be yog; machane da gogned ngorad ni ngar rin’ed e re bugithin nir. 25 Ere kug puruy’gad ma gamad gubin nike ta’reban’mad ni nggu dugliyed boch e girdi’ u fithik’mad ni nga nol’oegrad ngarbad ngomed ni ngar feked e thin romad i yib ngomed, ni bay ra uned ngak e tafager rodad nib t’uf rodad ni er Barnabas nge Paul ngarbad, 26 ni kar dowgow ko pogofan rorow ko pigpig ni yow be tay ngak e Somol rodad i Jesus Kristus. 27 Ere kug l’oeged Judas nge Silas ngomed, ni yow e ku bay ra weliyew ngomed e pin’en ni ba’aray ni kug yoloyed nga babyor. 28 Ya fare Kan Nthothup nge gamad e ke ta’reban’mad ndab kun tay ban’en nib tomal nga dakenmed nge cheag ko tin ni ba’aray e motochiyel ni bay, 29 ni aram e dab mu ked e ggan ni kan pi’ ni maligach ko liyos nma meybil boch e girdi’ ngay; ma dab mu ked e racha’; ma dab mu longuyed e gamanman nni uchuluy k’angan nge yim’; mi gimed ayuwegmed ndab mu pired be’ ni gathi mabgol romed. Gimed ra rin’ e tin nib mat’aw ni fa’an gimed ra par ni dab mu rin’ed e pin’ey. Ere kefel’.”

30 Mi nol’oeg fa pi’inem ngranod nga Antiok, mranod ra kunuyed urngin e pi’in ke mich Jesus u wun’rad nge mu’ miyad pi’ fare gi babyor ngorad. 31 Ma fa’ani poy fapi girdi’ fare gi babyor, miyad felfelan’ ko thin ni bay riy ni be pi’ e athamgil nga lanin’rad. 32 Mi Judas nge Silas, ni yow l’agruw ma profet, e ba n’uw nap’an nra welthingow ngak e pi cha’nem ni ku yad boch e walag ni girdi’en Kristus, ni yow be pi’ e athamgil nga lanin’rad ma yow be pi’ gelngirad. 33 Miyow par boch u rom, miyad fangich e tin ni bay u rom e walag ni girdi’en Kristus, nge mu’ miyow sul ngak e pi’in nra l’oeged yow. 34 [temp]*Boch e babyor e ka ni puthuy ngay e verse 34: Machane me turguy Silas ni nge par u rom.

35 Mi Paul nge Barnabas e ra pirew boch u Antiok. Miyow cheag ngak bo’or e girdi’, ngu’ur filed ko girdi’ ma yad be machibnag e thin rok Somol ngorad.

36 Me yan in e rran nga tomuren me ga’ar Paul ngak Barnabas, “Ngad sulow ngad guyew pi walagdow ni girdi’en Kristus u lan urngin e binaw nda machib nigew e thin rok Somol riy, ngad nangew rogorad.” 37 Ma ba’adag Barnabas ni ngar fekew Mark nge un ngorow, 38 machane de finey Paul nib mat’aw ni ngar fekew nge un ngorow, ni fan e de par rorow ngar mu’ niged e tin nnol’oegrad ni ngar rin’ed u yugu ba yay e milekag, ni bochan e pagrow u Pamfylia nge sul. 39 Miyow lu’ag nib el merin murung’agen e re bugithin ney, ma aram miyow dar ni milekag. Me fek Barnabas Mark ngar afgow nga barkow ngar milekaggow nga Cyprus, 40 me duwgiliy Paul Silas ni nge un ngak, ma pi walagrow ni aram girdi’en Kristus e ra yibiliyed yow ngak Got ni nge ayuwegrow nge mu’ miyow yan. 41 Miyow yan u lan yu Syria ngu Cilicia, ni be pi’ Paul e athamgil nga laniyan’ girdi’en e pi galesiya ni bay riy.