1 “Tomuren gubin e yu medlip e duw ma ngam thanged u babyor e malfith rok e pi’in bay e salpiy ni yad ra sulweg ngomed. 2 Ba’aray rogon ni ngan rin’. En ke pi’ e salpiy ni malfith ngak reb e girdi’ nu Israel e nge pag fare malfith; dabki guy rogon ni nge fulweg fare salpiy rok fa’anem; ni bochan e SOMOL e ir rok e keyog nike math fare malfith. 3 Rayag ni ngam feked e salpiy nike malfithnag be’ u reb e nam ngomed, machane ri dab mu feked e salpiy nike malfithnag reb e tiromed e girdi’ ngomed.

4 “I SOMOL ni Got romed e bayi fal’eg wa’athmed u lan fare nam ni nge pi’ ngomed. Dariy ta’abe’ u fithik’ e pi girdi’ romed nra gafgow 5 ni fa’anra gimed ra fol rok mi gimed kol ‘ayuwen e tin gu be taychilen ngomed e daba’. 6 I SOMOL e bayi fal’eg wa’athamed, ni bod nike micheg nra rin’. Bay mu pi’ed e salpiy ni malfith ngak bo’or e nam, machane gimed e dab mu ninged e salpiy ni malfith ngak reb e nam. Mab pire’ e nam ni bay um gagiyeg niged, machane dariy reb e nam ni nge gagiyeg nagmed.

7 “Fa’anra bay be’ ni ku reb e girdi’ nu Israeli nib gafgow u lan reb fapi binaw nu lan fare nam ni nge pi’ SOMOL ni Got romed ngomed, ma dab mu si’in gad ngak ngam paged ni dab mu ayuweged. 8 Ya ngu’um golgad ngak mi gimed pi’ ngak ni malfith yo’oren nib t’uf rok. 9 Dab mu siyeged ni ngam pi’ed ban’en ngak ni malfith, ni bochan e ke chugur ko fare duw nra math e malfith riy. Dab mu paged ba leam ni aray feni kireb nge aw nga laniyan’med. Ya fa’an gimed ra siyeg ni ngam pi’ed’ e malfith ngak, mra yor ngalang ngak SOMOL nib togopluw ngom, mra mang gur e buch e rom. 10 Mu pithiged pa’med riy ngam pi’ed ngak ni bfel’ u wun’umed, ma aram e ra fal’eg SOMOL wa’athamed ko urngin e tin gimed ra rin’. 11 Gubin ngiyal’ ma dabisiy ni bay boch e girdi’ nu Israel nib gafgow ni bay e tin ba t’uf ni nge yag ngorad, ere gu be taychiylen ngomed ni ngu’um golgad ngorad.

12 “Fa’anra be’ nu Israel, ni be’ nib pumo’on fa be’ ni bpin, nike pi’ ir ni chuway’ ni nge mang sib rom, mra pigpig rom u n’el e duw. Ma nap’an nra yan ngalan e bin medlip e duw, ma dabisiy ni ngam pag nge yan nike puf matwon.Lev 25:39–46 13 Nap’an ni ga ra pag ni nge yan ma dab mu digey nge yan ni dariy ban’en u pa’. 14 Mu pi’ ngak boch nib yo’or ko tin ke fal’eg SOMOL wa’atham riy — saf, grain, nge wayin. 15 Thingar mu ted u wun’med ni ummed ni gimed e sib u Egypt me pagmed SOMOL ni Got romed ngam marod nike puf rogomed; aram fan e chiney ni gu be taychilen e re bugithin ney ngomed.

16 “Machane rayag ni fare sib rom e dabun ni nge chuw rom; ni bochan e gab t’uf rok nge chon e tabnaw rom ere ba’adag ni nge par rom. 17 Ma aram e ngam fek i yan nga langan e mab ko naun rom mag kuruf tel u rom; ma aram e ke mang sib rom u n’umngin nap’an e yafos rok. Ma ku aray rogon e n’en ni ga ra rin’ ngak ba sib rom ni bpin. 18 Dabi tomal u wun’um ni ngam pag fare sib nge yan nike puf rogon; dab mu pag talin, ni nga n’el e duw nike pigpig ngom ma puluwon ni kam pi’ e kemus ni baley u puluwon be’ nma pigpig ngu’un pi’ puluwon. Um rin’ed ni aray rogon, ma fare SOMOL ni Got romed e ra fal’eg wa’athmed u gubin ban’en ni gimed be rin’.

19 “Mu ki’egned ngabang urngin e tin pumo’on ni nganni’ u pifak e garbaw nge saf romed ni fan ngak SOMOL ni Got romed; dab mu maruwelgad ngak e pi garbaw ney ma ku dab mu th’abed bunu’en reb e pi saf ney.Exo 13:12 20 Ra reb e duw ma gimed nge chon e tabnaw romed e ngam koyed e ufin ko pi gamanman ney u p’eowchen SOMOL ko ta’gin’en ni tagil’ e liyor. 21 Machane fa’anra bay ban’en nib buch ko fapi gamanman, ni fa’anra ba yaf ara ba ma’ew, ara bbuch ban’en rok, ma ri dab mu pi’ed ni maligach ngak SOMOL ni Got romed. 22 Pi gamanman ni aray rogon e rayag ni mu ked u tabnaw romed. Gimed gubin ndemturug ko gimed bbe’ech ara gimed ba ta’ay, ma rayag ni ngam ked, ni bod rogon ni gimed ma kay e gamanman ni deer nge antelope. 23 Machane dab mu ked e racha’ riy; ya thingar mu pu’oged nga daken e but’ ni bod e ran.