1 “Fare ganong rok Levi ni prist e dariy reb e f’oth nrayag ngorad ko binaw nu Israel; ya pi tow’ath nge pi maligach ni yi be pi’ ngak SOMOL e bay e f’oth rorad riy. 2 Dabi milfan bang e binaw ngorad, ni bod e tin ba’aram e ganong; f’oth rorad e aram mat’awrad ni kar manged prist rok SOMOL, ni bod nike micheg SOMOL.

3 “Nap’an ni yira maligachnag e garbaw fa saf, ma ngan pi lik’ipon, yadodan, nge yal rok fare gamanman ngak fapi prist. 4 Ma yad e ngan pi’ ngorad e tin ba nga’an ko grain, wayin, nge gapgep ni olive, nge tin nsom’on u bunu’en e saf. 5 Ya SOMOL e mel’eg fare ganong rok Levi u fithik’ e pi ganong romed ni ngar manged prist ngar pigpiggad ngak ni manemus.

6 “Ma demturug e re Levite u reb e binaw u lan yu Israel ni ba’adag mrayag ni nge yib ko fa ta’gin’en tagil’ e liyor 7 nge pigpig u rom ni prist rok SOMOL ni Got rok, ni bod e tin ba’aram e Levite ni yad be pigpig u rom. 8 Ma nge yag e ggan ngak ni ta’reb urngin ko tin kan pi’ ngak fatinef e prist, ma rayag ni nge par rok e tin ke pi’ chon e tabnaw rok ke yib ngak.

9 “Nap’an ni gimed ra thap ngalan fare nam ni nge pi’ SOMOL ni Got romed ngomed, ma dab mu’uned ko ngongol ni sonogor nma rin’ girdi’en fapi nam ni yad bay u rom. 10 Dab mu maligach niged pifakmed u fithik’ e nifiy u daken e altar romed; ma dab mu paged e girdi’ romed ngar uned ko bey ara chib; ara ur motokangad; 11 ara ra fanayed falayin e fl’egyan’ fa adag; ara pong thagith. 12 Ya SOMOL ni Got romed e ba fananikan e girdi’ nma ngongliy e mitney e ngongol nib sonogor, ya aram fan ni be tuluf SOMOL fa pi nam nga wuru’ e gin gimed be yan ngay. 13 Ngu’um pired ni gimed ba yul’yul’ ngak SOMOL.” Mat 5:48

14 Ma aram me ga’ar Moses, “U lan fare nam ni aram e nge milfan ngomed, e girdi’ riy e yad ma falwok ko pi’in yad ma ngongol ni tamerong ma yad ma changarnag e pow ko tin bayib ara bayi buch ban’en, machane SOMOL ni Got romed e dabi pagmed ni ngam rin’ed e tiney. 15 Ye SOMOL ni Got romed e bayi pi’ ba profet ngomed ni bod gag ni bayib i sum u fithik’ e tiromed e girdi’, ma ngu’um folgad rok.Act 3:22; 7:37

16 “Fa rofen nim mu’ulunggad ko burey ni Sinai e mu weniggad ni nge dab kum rung’aged bayay laman SOMOL ni nge non, ara mu guyed fare daramram ni aram ir, ni bochan e gimed be rus ni gimed ra yim’. 17 Ma aram me ga’ar SOMOL ngog, ‘Bfel’ e tin kar wenig niged. 18 Bay gu pi’ ngorad ba profet ni bod gur ni bayi sum u fithik’ e tirorad e girdi’; bay gog ngak e thin ni nge weliy ngorad, ma bayi weliy ngorad urngin e tin kugog ni ngar rin’ed. 19 Ra non u fithingag, ma gu ra gechignag e en nra siyeg ni nge fol rok. 20 Re profet nra tunguy e thin nge weliy ngak e girdi’ me yog ni thin rog ma gathi gag e gog ngak ni nge rin’, e thingar nli’ ngem’, ma ku er rogon ba profet ni weliy e thin rok yugu boch e kan.’

21 “Sana bay um leam niged ko uw rogon mi gimed nang ni thin nike weliy reb e profet e gathi SOMOL e yib rok. 22 Ngiyal’ nra weliy ba profet ngomed bbugithin me yog ni SOMOL e yib rok ma de yib i m’ug nrogon nike weliy, ma aram e gathi SOMOL e yib rok. Ma re profet nem e i ir e thin rok e binem e thin, ma dab mu rusgad ngak.