BABYOR NI
HABAKKUK
Murung’agen e Re Ke Babyor Ney
Habakkuk ni profet e yoloy e thin ko re ke babyor ney ni gonapan 700 e duw u m’on ndawori yib Kristus ko ngiyal’ ni yu Babylonia e reb e nam nib gel. I kireban’ Habakkuk ni bochan e rib gel e kireb ni be tay yu Babylonia ngak e girdi’ ni kab yal’uw e ngongol rorad ngak yu Babylonia, me fith ngak Somol ni ga’ar, “Ke di’in ma ke yag ni mu kadan’um rok e pi girdi’ ney ndabiyag ni nge pagan’uy ngorad, ma yad ba kired? Lan owchem e kaygi Thothup ni nge guy e kireb ni yibe rin’, ma dabiyag ni ngam par ngu’um guy e girdi’ ni yad be ngongliy e tin de yal’uw. Ere mang ni kam th’ab gulungam kar pired ni yad be thang e pogofan rok e girdi’ ni kabgel e mat’aw rorad ngorad?” (1:13) Me fulweg Somol ni bayi rin’ e tin ke leamnag ko ngiyal’ nike duwgiliy, machane chiney nge mada’ ko ngiyal’nem e ga’ar, “Pi’in yad ba kireb e dab ra fosgad: ma pi’in yad bmat’aw e yad ra fos ni bochan e yad ba yul’yul’ ngak Got” (2:4).
Tin ni kabay ko Babyor ni Habakkuk e ba yi’iy ni gechig ni bay yib ngak e girdi’ nde mat’aw. Ma tungun e re babyor ney e ba meybil ni tay Habakkuk ni aram e be pining e sorok ngak Got, ma be yog ni yug be par nib pagan’ ngak Got nde mutrug e n’en nra buch.
Gathon e Re Ke Babyor Ney
Gun’gun’ ni i tay Habakkuk nge fulweg ni pi’ Somol 1:1—2:4
Gafgow ni aw ko pi’in dar mat’awgad 2:5–20
Ba meybil rok Habakkuk 3:1–19
1
1 Ba’aray e thin ni pi’ SOMOL ngak Habakkuk ni profet.
Habakkuk ni gun’gun’nag ngak SOMOL e tin de mat’aw
2 A SOMOL, uw n’umngin nap’an ni thingar gu ning e ayuw mfin mu rung’ag lungug, ngam chuwegmad u fithik’ e gafgow ni yibe tay ngomad? 3 Mangfan ni kam pageg ngguy e tiney e oloboch? Uw rogon ni ga be kadan’um ga be guy e pi kireb ney ni yibe rin’? Riya’ nge modyargal e ke liyegneg, ma cham nge tugthin e ke fanay ga’ngin yang. 4 Motochiyel e ke waer ma kem’ay fan, ma dakunir rin’ e tin nib yal’uw. Tin nib yal’uw e ka ni pingeg nga bang, ke yan i aw ni girdi’ ni kireb e kar gelgad ngak e pi’in yad ba mat’aw.
Fulweg ni pi’ SOMOL
5 Me ga’ar SOMOL ngak e tirok e girdi’, “Mu changargad ngak e pi nam ni yad bay u to’obmed i yan, mi gimed ra gin ko pin’en ni gimed ra guy. Bay gu rin’ ban’en ni gimed ra rung’ag murung’agen ma dabi riyul’ u wun’med. 6 Aram e nggu pi’ gelngin yu Babylon, ni yad e girdi’ ni tagan, ma yad ba’adag e cham. Bay ranod nga wuru’ e nam rorad ni ngar m’aged e mael ngak yugu boch e nam ngar koled. 7 Bay un rus ngorad, ma yad e bay ur sunmiyed e tirorad e motochiyel.
8 “Pi os rorad e bmachreg ko gamanman ni leopard, ma kabgel e damumuw rorad ko gamanman ni wolf nike yib e bilig ngorad. Pi girdi’en e yan u os rorad e rabad u bang nib orel; tungun ay e pi os rorad e be ker e but’. Yad be ngolol nga but’ ni bod e arche’ ni eagle ni nge og ko n’en ni nge longuy.
9 “Salthaw rorad e bay ur gelgad i yan, ra yad be yib ma gubin e girdi’ nike rus ngorad. Girdi’ ni bay ra koled e yad pire’ ni bod e yan’ ndabiyag i the’eg. 10 Bay ur darifan niged e pi pilung, ma yad be minmin ngak e pi tolang. Dariy ba yoror nib gel ni fan ko mael nrayag ni nge talegrad, ya yad ra ubung e but’ ko yoror riy ngar koled. 11 Yad ma wolguy daken e nam ni bod e nifeng mranod, pi pumo’on ney e gelingrad e kemang got rorad.”
Habakkuk niki gun’gun’ bayay ngak SOMOL
12 SOMOL, ka nap’an ko tabolngin ni ga be par ni gur e Got. Gur e Got rog, ni gab thothup ma bay um par ndariy n’umngin nap’am. SOMOL, ni Got rog nma yoror rog, kam mel’eg yu Babylon ma kam pi’ gelngirad ya nge yag nra gechig niged gamad. 13 Ke di’in ma ke yag ni mu k’adan’um rok e pi girdi’ ney ndabiyag ni nge pagan’uy ngorad ma yad ba kireb? Lan owchem e kaygi thothup ni nge guy e kireb ni yibe rin’, ma dabiyag ni ngam par ngu’um guy e girdi’ ni yad be ngongliy e tin nde yal’uw. Ere mang ni kam th’ab gulungam kar pired ni yad be thang e pogofan rok e girdi’ ni kab gel e mat’aw rorad ngorad?
14 Ra di’in ma ga tay e girdi’ ni yad bod e nig, ara ba ulung i chachangeg ni dariy be’ ni be pow’iyrad? 15 Girdi’ nu Babylon e yad ma kol e girdi’ ko lam ni bod rogon ni yima kol e nig. Yad ma kolrad ko nug, ma yad be garusnag e felfelan’ ni bochan e n’en ni kar koled ko nug! 16 Yad ma meybil ko pi nug rorad ma yad ma pi’ e gamanman ni maligach ni fan ngay, ya nug rorad e be yagnag ngorad urngin e pin’en nib th’abi fel’.
17 Mog, ga be finey ni ngu’ur maruwelgad ko saydon rorad ndariy n’umngin nap’an, ngu’ur thirifed e pi nam u but’ ma darir runguyed be’?
DRAFT VERSION — Proofreading in progress