BABYOR NI YAN NGAK GIRDI’EN KRISTUS NI GIRDI’ NU ISRAEL
HEBREWS
Fare babyor ni yan ngak girdi’en Kristus ni girdi’ nu Israel e ka ni yoloy ngorad ya richey me waer e michan’ rorad ngak Kristus ni bochan e togopluw ni yibe tay ngorad e be gel i yan. En ni yoloy e re babyor ney e be pi’ e athamgil nga lanin’rad ya be dag ngorad ni Jesus Kristus e ir fare kanawo’ ni dag Got ni ngan thap riy ngak. Dalip ban’en ni ba ga’ fan ni bay ko re babyor ney: (1) I Jesus e Fak Got, machane me fil rogon ni ngi i fol rok Got u daken e gafgow ni i tay. I Jesus e ba tolang ngak e pi profet ko bin Kakrom e M’ag, nge ngak e pi engel, nge mus ngak Moses, ni bochan e ir e Fak Got. (2) Ke ga’ar Got i Jesus e ba prist ni be par ndariy n’umngin nap’an ma ba tolang ngak e pi prist ko bin Kakrom e M’ag. (3) U daken Jesus e ke n’ag Got fan e denen rok e pi’in ke mich Jesus u wun’rad, ma ke chuw e tamdag rorad ni bochan e kar chuwgad u tan pa’ e yam’. I Jesus e fare Prist ni Th’abi Ga’ nrayag ni nge thapeg e girdi’ ngak Got. Urngin e maligach ni gamanman ni un urfiy nga yugu bmit e maligach ni i pi’ e girdi’ nu Israel ngak Got e go’ i yip’ fan Jesus.
U lan e guruy ni 11 e ni yoloy ngay murung’agen e pi’in nib gilbuguwrad u daken e michan’ rorad ngak Got, ya ra pi’ e athamgil nga laniyan’ e pi’in yad ra be’eg. Guruy ni 12 e bay riy e thin nma ayuweg girdi’en Kristus nge dab ra paged yad ko tin nib mo’maw’ nma yib ngorad ni bochan Kristus, ya ngar sapgad ngak Jesus nge yag nra pired ni yad ba yul’yul’ nge mada’ ko tomur. Bin tomur e guruy ko babyor ni Hebrews e be weliy rogon ni ngan kol ayuw.
Tin ni bay riy
U daken Kristus e be dag Got riy rogon e leam rok 1:1–3
I Kristus e ba tolang ko engel 1:4—2:18
I Kristus e ba tolang ngak Moses nge Joshua 3:1—4:13
Maruwel rok Kristus nrogon e prist e bfel’ nga urngin e maruwel ni i tay urngin e prist 4:14—7:28
Bin be’ech e m’ag ni ngongliy Kristus e ba ga’ fan ko bin kakrom e m’ag ni ngongliy Got u daken e Motochiyel ni pi’ 8:1—9:28
Rogon ni pi’ Kristus ir u daken e kuruth ni maligach e ka ba ga’ fan nga urngin e maligach 10:1–31
Ba ga’ fan e michan’ 11:1—12:25
Fonow nge tin tomur e thin 13:1–25
1
Thin rok Got ni en ni Fak e fek i yib ngodad
1 Kakrom e bo’or yay ni i non Got ngak pi chitamangidad ni bo’or kanawo’en ni i non ngorad u l’ugun e pi profet, 2 machane tiney e rran ni ir e tomuren e rran e ke non ngodad u l’ugun e en ni Fak. Ir fa’anem ni pa’ e maruwel Got ngay nge sunumeg e fayleng nge urngin ban’en ni bay riy, me ir fa’anem ni Got e ke duwgiliy ni nge mil suwon urngin ban’en ngak ko tomur. 3 Ir e be galgal ram’en Got rok nrib galgal; i ir e ri ta’reb rogorow Got, me ir e be dunubiy e gin’en ni bay urngin ban’en u lanelang riy nib mu’un e fayleng ngay, ni be dunubiy ko thin rok nib gel gelngin. Tomuren nike be’echnag e girdi’ ko denen rorad me yan i par nga but’ u tharmiy u ba’ ni mat’aw rok Got, ni ir e Th’abi Tolang.
En ni Fak Got e kab tolang ngak e pi engel
4 Ya en ni Fak Got e Got e tay ni ir e ba tolang ngak e pi engel, ni bod rogon fare ngachal ni pi’ Got ngak ni ku ba tolang nga fithingan e pi engel. 5 Ya Got e dawori yog ngak reb e engel rok ni ga’ar,
“I gur e Fakag gur,
daba’ e kug mang Chitamam.”
Ma ku de weliy Got murung’agen reb e engel ni ga’ar,
“Bay gu mang Chitamngin,
ma bayi mang Fakag.”
6 Ma fa’ani taw nga nap’an ni nge pi’ Got e bin som’on i Fak nga fayleng, miki yog ni ga’ar,
“Urngin e engel rok Got ma thingari liyor ngak.”
7 Ba’aray e n’en ni yog Got ni murung’agen e pi engel ni ga’ar:
“Ngongliy Got e pi engel rok ni yad bod e nifeng,
me ngongliy e pi tapigpig rok ni yad bod e daramram ko nifiy.”
8 Machane en Fak e yog ni ga’ar:
“Tagil’im, i gur Got, e bayi par ni dariy n’umngin nap’an!
Ma bay um gagiyegnag e girdi’ rom u fithik’ e mat’aw.
9 Ma ngongol nib mat’aw e ir e ba t’uf rom ma fanenikam e ngongol nde mat’aw,
ireray fan ni Got, ni ir e Got rom, e ke mel’igem,
ma tayfan nike tay ngom e ri ka ba ga’ e felfelan’ nike yib riy ngom
ko felfelan’ nike pi’ ngak e pi’in yad be un ngom.”
10 Miki yog ni ga’ar:
“I gur, Somol, e mu sunumiy e fayleng ko tabolngin,
ma pa’am e ir e mu ngongliy e pi tharmiy ngay.
11 Ni urngin ni bayi chuw, me gur e bay mpar.
Ma gubin ni bayi kaday ni bod yungi mad.
12 Ma bay mu bichibichiy ni bod rogon ba ke mad,
ma bay nthiliyeg.
Mi gur e bay um par ni karrogom,
ni yafos rom e dariy e ngiyal’ nra mus.”
13 Mi Got e ri dawori yog ngak reb e pi engel rok ni ga’ar:
“Mpar iray nga ba’ ni mat’aw rog,
nge yan i mada’ ko ngiyal’ ni bay gu tay e pi to’ogor rom
nga tan e rifrif u em ni nge mang tagil’ e magif ko rifrif u em.”
14 Ma pi engel e yad e mang? Yad e pi kan ni yad ma pigpig ngak Got nma l’oegrad ngar ayuweged e pi’in ni ngar thapgad ngak Got.
DRAFT VERSION — Proofreading in progress