1 Irera’ e thin ni murung’agen yu Babylon, ni pi’ Got ngak Isaiah ni fak Amoz.

2 U p’ebgul e burey nib tamilang mag girengiy e flak ko mael ngalang! Ma ga tolul ko pi salthaw ni kam tining pa’am ngalang ni pow ni ngar oggad ko garog ko fare binaw nib tolngan’ e girdi’ riy. 3 I SOMOL e pining e salthaw rok nib falu’ ma ba m’uthan’rad ni ngar chamgad ko fare mael nib thothup ngar gechig naged e pi’in ba damumuw ngorad.

4 Motoyil ko mayngar u p’ebgul e pi burey — ni laman e girdi’ nib yo’or, lungun e pi nam nge pi pilung ni be mokun. I SOMOL ko yu raba’ i salthaw e be t’ar madilen e yu raba’ i salthaw rok ni ngan mael. 5 Yad be yib u bogi nam nib palog u tungun e fayleng. SOMOL e be yib u fithik’ e damumuw rok ni nge gathay e nam ni ga’ngin.

6 Mu gel’gel’ naged e amith! Ya rran rok SOMOL e ke chugur, rofen ni En ni Gubin ma Rayag Rok e nge girengiy e riya’ i yib. 7 Ra m’ay gelngin pa’ gubin e girdi’ me lul’ laniyan’rad. 8 Yad gubin ni yad ra rus miyad yim’ ko amith, ni bod e amith rok be’ ni bpin ni nge gargel. Bay ra changargad ngorad u fithik’ e marus, ma owcharad e bay i yik ko tamra’. 9 Rran rok SOMOL e nge anog — ni yaran e gafgow ko damumuw rok nib gel. Bayi par e fayleng ni dakuriy waton, ma gubin e pi tadenen e yira thang mit. 10 Gubin e t’uf nge pin’en nma mat ra’en e ra m’ay ra’en ndabki mat, ra lumor ra’en e yal’ ni nge yib ngalang, ma m’ay ra’en e pul.Mat 24:29; Mrk 13:24; Rev 6:12; 8:12

11 I SOMOL e ga’ar, “Bay ggirngiy e riya’ nga daken e fayleng nggu gechignag gubin e pi’in kireb ni bochan e denen rorad. Bay gu sobut’nag e pi’in yad ba tolngan’ mu gu gechignag e pi’in nib ufanthin ma yad buchan’. 12 Ma pi’in nra magach ni kabfos e ke mom’aw ni ngan piri’egrad boch ko ngan pir’eg e gol. 13 Bay gu rurug e pi tharmiy, me durru’ e fayleng nge chuw u tagil’ ko rofen ni ba’aram ni gu ra dag e damumuw rog, I Gag SOMOL ni Gubin ma Rayag Rok.

14 “Ma pi’in yad ma par u Babylon ni gathi yad girdi’en e bay ra milgad ngranod ko pi nam nrabad riy, yad ra wear ni bod e gamanman ni deer ni yad be mil ko pi takol gamanman, ni bod rogon e pi saf ni dariy be’ ni be gafaliyrad. 15 Arorad ni yira kol e ran rugoy e saydon ngak nge math e pogofan rok. 16 Ngiyal’ ni yad be changar ni dariy ban’en nrayag ni ngar rin’ed, mi ni pirdi’iy pi bitir rorad ngarm’ad, mi ni gochowriy gathon e naun rorad u yargal, mi ni kol pi le’engirad u gelngiy.

17 I SOMOL e ga’ar, “Bay gu k’aring piyu Medes ni ngar maelgad nga Babylon. Dariy fan e silber u wan’rad ma dabi unan’rad ko gol. 18 Gan e gat’ing nge gat’ing rorad e bay ra li’ed e pi’in pagel ngay. Ma dab rrungyed e bitir ni kab madway ara pi bitir. 19 U Babylonia e th’abi fel’usun u fithik’ e pi gagiyeg ni bay ufan u daken e pi girdi’ rok. Machane, I Gag SOMOL, e gu ra gathay yu Babylon ni bod ni gu rin’ nga Sodom ngu Gomorrah! 20 Dariy be’ nrayag ni ngki par u rom. Dakriy reb e Arab i yug be yan ni ku ra n’uf e tent rok u rom, ma aram rogon e pi tagafaliy e gamanman ni dakriy bagyad nra gafaliy e gamanman rok u rom. 21 Bayi par ni bang i ban’en ni gamanman nu ted e bay i par riy nge arche ni owl e bay ur toyed taferad riy. Arche ni ostrich e kubay i yib i par ngaram, nge kaming ni malboch e bay i og og u fithik’ e tin ke mogoth u rom.Rev 18:2 22 Pi wulyang nge pi naun ni tafen e pilung e bay i kumong lungun e gowol ko gamanman ni hyenas nge jackal riy. Ketaw ko rran rok yu Babylon! Pi rran rok e nge thumur.”