1 Mathil ko yimuch ko fare gi binaw nni pi’ ngak e pi’in owchen Josef e tabab ko Jordan nib chugur nga Jeriko u bangi m’uth ni bay ko ngek ko fapi alublub nu Jeriko, me yan u rom ngalan e ted ni desert. Me yan u Jeriko nga talang ko binaw ni go’ burey nge yan nge taw nga Bethel. 2 Me yan u Bethel nga Luz, me yan u rom nga Ataroth Addar, ko gin ni i par e pi Archite riy. 3 Ma aram me yan u rom ko ngal ko fare gin’en ni tafen yu Jaflet, ni yan nge taw ko fa gin ba sobut’ u Beth Horon. Me yan u rom nga Gezer nge yan i mus ko fare gi Day ni Mediterranean.

4 Pi’in owchen Josef ni aram e fagali ganong rok Efraim nge ley ni Ngal e Manasseh, e ni pi’ e re gi binaw ney ngorad ni ngar tafned.

5 Irera’ e gin tafen e pi tabnaw rok yu Efraim: mathil rorad e yan u Ataroth Addar ko ngek nge yan nga Talang u Beth Horon, 6 me yan u rom ko fare gi Day ni Mediterranean. Bay yu Michmethath nga ba’ nlel’och rorad. Ma ko ngek riy e yan e re mathil nem riy nge chiygog nge sor i yan nga Taanath Shiloh me yan nge pag e ba’ ni ngek riy nge yan nga Janoah. 7 Ma aram me yan nga p’ening u Janoah nga Ataroth nge Naarah, nge mada’ nga Jeriko me yan i mus ko Jordan. 8 Me yan fare mathil u Tappuah ko ngal nge yan ko fachipa’ i lul’ ni Kanah nge yan i mada’ ko fare gi Day ni Mediterranean. Irera’ e re gi binaw nni pi’ ngak fapi tabnaw u lane ganong rok Efraim ni ngar tafned, 9 nib mu’un boch e binaw nge yuchi binaw ngay ni immoy u lan fare mathil rok Manasseh, machane ni pi’ ngak pi Efraim. 10 Ma dar tulufed piyu Kanaan ni ur pired u Gezer, ere ke par piyu Kanaan u fithik’ e pi Efraim ke mada’ ko bin daba’ e rran, machane nni tayrad ni yad e sib.Jdg 1:29