1 SOMOL e non ngak Moses u tomuren nike yim’ fa gali pagel ni fak Aron ni fa’anra pi’ew ba nifiy nde thothup nib maligach ngak SOMOL. 2 I ga’ar, “Mog ngak Aron ni walagem ni fin ra taw nga nap’an me yan nga ba’ nem fa gi kateng ngalan fa Gin Th’abi Thothup, ya ireram e gin ni gu ma m’ug riy ni bangi manileng u puluwon upungen fare Kahol ko M’ag ngalang. Fa’anra dabi fol riy mra yim’.Heb 6:19 3 Ra fek ba garbaw ni pumo’on ni fan ko denen nge ba saf ni pumo’on ni fen e maligach ni mo’oruf, ma aram e fin rayag ni nge yan ngalan fa Gin Th’abi Thothup.”

4 Ma aram me pi’ SOMOL e pi gafal ney. U m’on ni nge yan Aron ngalan e Gin Th’abi Thothup, ma thangri maluk me yin’ madan e prist, ni fare wuru’ e mad nib wech, nge balay i zubong, me m’ag fare leed, me tay fare turban.

5 Girdi’ nu Israel e ngar feked i yib ngak Aron l’agruw i kaming ni pumo’on ni fen e maligach ko denen, nge ba saf ni pumo’on ni fen e maligach ni mo’oruf. 6 Som’on e nge pi’ Aron ba garbaw ni pumo’on nge mang maligach ni nge chuweg e denen rok nge denen ko girdi’ nu tabinaw rok. 7 Me fek fa gali kaming nga langan e mab ko fare Tent u p’eowchen SOMOL. 8 U rom e nge girengiy e pow u l’agruw i malang, ni reb e bay e pow riy ni “fen SOMOL” ma reb e “fen Azazel.”*AZAZEL: De gagyel fan e re bbugithin ney ni Hebrew; sana fithingan ba kan nu ted. 9 Aron e thangri li’ fare kaming nike duwgil ko pow nike girengiy ni fan ngak SOMOL nge pi’ ni maligach ko denen. 10 Fare kaming nni mel’eg ni fan ngak Azazel e thingar ni pi’ ngak SOMOL ni kabfos mi ni pag nge yan nga daken e ted ngak Azazel nike fek e denen ko girdi’ nga palog.

11 Nap’an nra li’ Aron fare garbaw ni pumo’on ni maligach ko denen rok nge girdi’ ko tabinaw rok, 12 ma nge fek baraba’ i fen e nifiy nib sug ko kol ni be yik’ nni fek u altar nge l’agruw gogow i incense nge fek i yan ngalan fa Gin Th’abi Thothup. 13 Mu rom u p’eowchen SOMOL e nge tay fapi incense riy nga daken fapi kol ni be yik’ nge yan e ath riy i ing upungen fare Kahol ko M’ag, ya ri guy Aron nge yim’. 14 Me fek boch racha’en fare garbaw nge lthag bugul i pa’ nga fithik’ nge atngiy nga daken upungen fare Kahol ko M’ag, me atngiy boch riy nga m’on ko Kahol ko M’ag ni medlip yay.

15 Me migid me li’ fare kaming ni maligach ko denen ko girdi’, me fek e racha’ riy i yan ngalan fa Gin Th’abi Thothup, me wereg nga daken upungen fare Kahol ko M’ag nge nga m’on riy, ni bod ni rin’ nga racha’en fare garbaw ni pumo’on. 16 Ara’ rogon ni nge machalbognag e Gin Th’abi Thothup ni bochan e ke alitnag e denen rok e girdi’ nu Israel. Thangri rin’ e ren’ey ko fare Tent, ni bochan fare Tent e bay u lukngun e gin be par piyu Israel riy u fithik’rad ni dar machalboggad. 17 Ngiyal’ ni ba’aram ni nge yan Aron nga langgin fa Gin Th’abi Thothup ni nge bangbengnag rogon e be’ech nge mada’ ko ngiyal’ ni nge sul nga wean, e thangri dabi par be’ u lan fare Tent. Nap’an nra bangbengnag rogon ni nge be’ech, nge gathon e tabnaw rok, nge yu Israel ni ga’ngin, 18 ma thingari yan ko fare altar ni fen e maligach ni mo’oruf nge machalbognag. Thangri fek boch racha’en fare garbaw ni pumo’on nge boch racha’en fare kaming nge thiy ko fa aningeg i gagey ko tabthung ko fare altar. 19 Ma bbuguli pa’ e nge atngiy boch fare racha’ ngay nga daken fare altar ni medlip yay, ara’ rogon ni nge machalbognag fare altar ni fan ko denen rok e girdi’ nu Israel, nge par nib thothup.

20 Nap’an nra mu’ Aron i bangbengnag rogon ni nge machalbognag fa Gin Th’abi Thothup, nge fare Tent u p’eowchen SOMOL nge fare altar, ma nge fek fare kaming i yib ngak SOMOL ni kabfos nni mel’eg ni fan ngak Azazel.†AZAZEL: ku arrogon ni bay ko 16:8. 21 Ma nge tay pa’ nruw raba’ nga daken lolugen me weliy urngin e kireb, nge denen, nge togopluw ni be tay yu Israel, ni aram e ke chuweg u dakenrad ke tay nga daken lolugen e re kaming nem. Ma aram e ngan tuluf fare kaming i yan ngalan e ted ni desert ni be’ ni kan duwgiliy e ir e nge tuluf e re kaming nem. 22 Re kaming nem e bayi fek urngin e denen rorad nge yan nga bang nder par e girdi’ riy.

23 Ma aram me yan Aron ngalan fare Tent, nge luf madan e prist ni chuw ngay u m’on ndawori yan ngalan fa Gin Th’abi Thothup, me pag u rom. 24 Ma thangri yan i maluk ngabang nib tabgul me chuw ko mad rok. Me yan nga wean nge urfiy fare gamanman ni fan ko denen rok nge fa binem ni fan ko denen rok e girdi’ nu Israel. 25 Me urfiy u daken e altar e mam ko fare gamanman ni maligach ni fan ko denen. 26 Fare mo’on ni tuluf fare kaming i yan nga ngalan e ted ni desert ngak Azazel e thingari maluknag e mad rok me maluk u m’on ni nge sul ko gin be par piyu Israel riy. 27 Fare garbaw nge fare kaming nni pi’ ni fan ko denen, ma racha’ riy e ni fek i yan ngalan fa Gin Th’abi Thothup ni fan e nge chuweg e denen, e ngan fek nga wuru’ e gin be par piyu Israel riy ngan urfiy, nib mu’un e biyach nge ufin nge gil’iggan ngay.Heb 13:11 28 En ni nge urfiy e thingari maluknag e mad rok, me maluk u m’on ndawori sul ko gin be par piyu Israel riy.

29 Pi gafal ney e nge par ni ngu’un fol riy i yan ngaram. Rofen ni ragag ko pul ni medlip e urngin yu Israel nge girdi’en yug boch e nam ni be par u fithik’rad e thingar ra paged e abich ma dab ra marwelgad. 30 Rofen nem e ngan bangbengnag rogon ni ngar machalboggad ko urngin e denen rorad, ya ngar pired ni kar be’echgad. 31 Rofen nem e nge par ni reb e rran nrib thothup ni nge pag e girdi’ e abich ma dab ra maruwelgad. Pi gafal ney e nge par riy ni aray rogon e chiney i yan ngaram. 32 Re Prist ni Th’abi Ga’ ni kan gapgepnag, ni aram e ke tabgul ni ir e nge yan nga luwan e chitamngin, e ir e nge bangbengnag rogon e machalbog. Thangri chuw nga madan e prist 33 me bangbengnag rogon ni nge machalbog fa Gin Th’abi Thothup, nge fare Tent u p’eowchen SOMOL, nge fare altar, nge pi prist, nge girdi’ nu Israel ni urngin. 34 Pi gafal ney e nge par ni ngu’un fol riy e chiney i yan ngaram. Ren’ey e ra reb e duw ma ta’ab yay ni ngan rin’, nge machalbognag e girdi’ nu Israel ko urngin e denen rorad.

Me rin’ Moses ni bod nike yog SOMOL.