1 I yog SOMOL ngak Moses 2 ni nge yog ngak e girdi’ nu Israel ni nge ga’ar, “Demturug bigimed ara be’ u reb e nam ni be par u fithik’med nra pi’ reb i pifak ngak fare got ni Molek e thangri malangnag piyu Israel facha’ nge yim’. 3 Fa’anra pi’ be’ reb i fak ngak Molek, ma aram e ke alitnag e Tent rog nib thothup ma ke dariy fannag fithingag nib thothup, ma bay gu cheal nggu togopluw ngak ma dakuriy e n’en nra rin’ mu gu leamnag ni ir reb e girdi’ rog. 4 Ma fa’anra sabalbalyangnag yu Israel yad rok facha’ nike pi’ fak ngak Molek ndar li’ed facha’ nge yim’, 5 me gag rog e bay gu cheal nggu togopluw ngak facha’ nge tabnaw rok, nge urngin e pi’in kar’uned ngak yad be tayfan Molek ni da ku rir yul’yul’gad ngog. Dakuriy bi’id ni gu ra leam nagrad ni yad e girdi’ rog.

6 “Fa’anra yan be’ ni be ning e ayuw ngak e girdi’ nma non ko pi thagith, ma bay gu cheal nggu togopluw ngak ma dakriy bangyal’ ni gu ra leamnag ni ir reb e girdi’ rog. 7 Mu pi’ed gimed ngalan pa’ag mi gimed par ni gimed ba thothup ni bochan e Gag SOMOL e Got romed. 8 Kug mel’egmed ni ngam manged girdi’eg, ma gu be sap ngomed ni ngam ted e motochiyel rog u gil’.” 9 Me pi’ SOMOL e pi gafal ni ba’aray. Fa’an ga ra yibil ni nge buch wa’athan e chitamam fa chitinam, ma yira thang e fan rom, ni gur tapgin e yam’ ni ngam tay.Exo 21:17; Mat 15:4; Mrk 7:10

10 Fa’anra par be’ nib mo’on nge be’ ni bpin ni le’engin be’ nu Israel, ma yow l’agruw ni yira thang e fan rorow.Exo 20:14; Lev 18:20; Deu 5:18 11 Ra par reb e mo’on nge reb i le’engin e chitamngin ma ke dariy fannag e chitamngin, ma aram e yira thang e fan rorow fare pin. Yow tapgin e yam’ ni kartew.Lev 18:8; Deu 22:30; 7:20 12 Fa’anra par be’ nib mo’on nge be’ ni bpin ni le’engin fak, ma yow l’agruw ni yira thang e pogofan rorow. Yow tapgin e yam’ ni kartew.Lev 18:15 13 Fa’anra par be’ ni pumo’on nge ku reb e pumo’on, ma kar ngongliyew ban’en nib sonogor; yow l’agruw ni yira thang e fan rorow. Yow tapgin e yam’ ni kartew.Lev 18:22 14 Fa’anra le’engiy be’ nib mo’on be’ ni bpin nge chitinngin fare pin, ma yad gubin ni yira urfiyrad ngarm’ad ni bochan e rib kireb e tin kar rin’en; mitney e ngongol e thingar dab ni pag nge buch u fithik’med.Lev 18:17; Deu 27:23 15 Fa’anra par be’ nib mo’on nge ba gamanman, ma yira thang e fan rok facha’ nge fare gamanman.Exo 22:19; Lev 18:23; Deu 27:21 16 Fa’anra guy be’ ni bpin rogon ni ngar pirew ba gamanman, ma yira thang e pogofan rok nge fare gamanman. Yow tapgin e yam’ ni kartew.

17 Fa’anra le’engiy be’ nib mo’on be’ ni bpin nri walagen fa be’ ni bpin ni kemus ni chitamangirow fa chitinngirow e ba ta’reb, ma nganog row u mit e girdi’ ni gubin ni kar rin’ew ban’en nib kireb mi ni tuluf row ngar chuwgow u fithik’ piyu Israel. Ke par fare mo’on nge walagen ni bpin ere thingar ni gafgow nagrow ni wenegan e kireb rorow.Lev 18:9; Deu 27:22 18 Fa’anra par be’ nib mo’on nge be’ ni bpin ko ngiyal’ nike luw fare bpin, ma yow l’agruw ni yira tuluf row ngar chuwgow u fithik’ piyu Israel, ya kar th’abew fapi gafal ni murung’agen rogon ni ngan par ni yib be’ech u mit Got.Lev 18:19 19 Fa’anra par be’ nib mo’on nge be’ ni bpin ni walagen e chitamngin ara chitiningin, ma yow ra gafgow u wenegan nra yib ngorow ya kar pirew ma yow tabnaw.Lev 18:12–14 20 Fa’anra par be’ nib mo’on nge be’ ni bpin ni le’engin be’ nib mo’on ni walagen e chitamngin ara chitiningin, ma be dariyfannag fare mo’on ni walagen e chitamngin ara chitiningin, ma fare mo’on nge fare bpin e yow ra afmachan; ndariy bagyow nra fakay e bitir. 21 Fa’anra fek be’ nib mo’on le’engin walagen, ma yow ra yim’ ndariy fakrow. Ke rin’ ban’en nib alit ke dariyfannag walagen.Lev 18:16

22 Ke ga’ar SOMOL, “Mu folgad ko urngin e pi motochiyel rog nge tin kugog ni ngam rin’ed, ya nge dab i sul’ugun nagmed fare nam ni ku gu fekmed ngay. 23 Dab mu’uned nga yalen e girdi’ ni yad ma par u rom; bay gu tuluf e pi girdi’ nem ya nge yag ni mmarod ngalan fare nam. Ya kar k’aringed e sonogor ngog nga urngin e ngongol rorad nib kireb. 24 Machane re nam nem nib yong’ol ma ba madnom e kug micheg ni bay mu tafnayed, e bay gu pi’ ngomed. I Gag SOMOL ni Got romed, e kug faelmed nga bang u fithik’ e pi nam. 25 Ere arfan ni thingar mu gagyel niged e tin be’ech e gamanman rok e tin ba alit, nge tin alit e arche’ rok e tin be’ech. Dab mu longuyed e gamanman nge pi arche’ nib alit. Ke m’ay i yog rog ni yad ba alit, are gimed ra languy miki gimed alit. 26 Ngam pired ni gimed ba thothup ni kemus ni Gag e bmil famed ngog, ni bochan e Gag SOMOL e gub thothup. Kug faelmed nga bang u fithik’ gubin e pi nam ya kemus ni Gag e nge milfamed ngog.

27 “Demturug e re mo’on ara re bpin nra ning e ayuw ngak e pi thagith ma yira malangnag nge yim’; aromed nra yodroy e ir tapgin e yam’ nra tay.”