BABYOR NI
MALAKI
Murung’agen e Re Ke Babyor Ney
Fare Babyor ni Malaki e ni yoloy nga tomuren ni kan toy fare Tempel bayay, ko duw ni gonapan 500 u m’on ndawori yib Kristus. I weliy Malaki ni profet ngak e pi prist nge girdi’ ni ngar ted bayay nga tagil’ ferad yul’yul’ ko fare m’ag ni ngongliy Got u thilrad. Ya i par e girdi’ rok Got nib kireb pangirad ma bkireb rogon e pigpig rorad ngak Got. Pi prist nge girdi’ e ur ban niged Got ni bochan e da ur pi’ed ngak e pin’en ni susun e ngu’ur pi’ed ngak, ma da ur folgad ko thin rok. I Somol e bayi gechignag e girdi’ rok me mat’aw nagrad ngak, ma u m’on ni nge yib ma bayi pi’ e mol’og rok nge fal’eg rogon e kanawo’ me weliy ngak e girdi’ murung’agen e m’ag rok Somol.
Gathon e Re Ke Babyor Ney
Pi denen rok yu Israel 1:1—2:16
Pufthin rok Got nge wurengan’ 2:17—4:6
1
Ba’aray e thin ni pi’ SOMOL ngak Malaki ni nge weliy ngak piyu Israel.
T’ufeg rok SOMOL ni fen yu Israel
Be ga’ar SOMOL, “Gubin ngiyal ni gimed bt’uf rog.”
Miyad fulweg nra ga’ar gad, “U rogon ni kam dag ngomad ni gamad bt’uf rom?”
Me fulweg SOMOL ni ga’ar, “I Esau nge Jakob e ruw i walag ni pumo’on, machane ba t’uf Jakob rog nge pi’in owchen, ma dabug Esau nge pi’in owchen. Kug kirebnag e binaw rok Esau ni go’ burey kug pi’ e gi binaw nem ngak e gamanman ni malboch.”
Yu Edom, ni yad e pi’in owchen Esau, e fa’anra lungurad, “Pi binaw rodad e ka ni kirebnag, machane bay da ngongliyed nge sul nga rogon,” machane fulweg rok SOMOL ngorad e be ga’ar, “Ngani pagrad ngar muruwliyed, ya bay gu sul ngay nggu kirebnag bayay. Ma bayi yog e girdi’ fithingan e pi binaw nem ni Binaw Nib Kireb, ma ku bay ntunguy fithingrad ni, ‘Fare nam ni bay i par SOMOL nib damumuw ngorad ndariy n’umngin nap’an.’ ”
Girdi’ nu Israel e yad ra guy e ran’ey nga owcharad, ma bay ra ga’argad, “I SOMOL e rib gel gelngin ma ku errogon u wuru’ e nam nu Israel!”
SOMOL ni puwan’ ngak e pi prist
I SOMOL ni Gubin ma Rayag Rok e be ga’ar ngak e pi prist, “Pi’in bitir e yad ma liyor ko gal labthir rorad, nge pi tapigpig e yad ma liyor ko pi masta rorad. I gag e chitamangimed, ere mangfan ni damur liyorgad ngog? Dubmed gag, ma ke chiney ma gimed be fith ngog ni gimed be ga’ar, ‘Uw rogon ni dubmad gur?’ Ba’aray rogon, bochan e gimed be maligachnag e ggan nde fel’ u daken e altar rog. Ma aram e gimed be fith ni be lungmed, ‘Uw rogon ni dagur ted fam?’ Bay gog ngomed ni be m’ug e fananikan romed ko altar rog. Ngiyal’ ni gimed ra fek i yib ba gamanman nib malmit ara ba m’ar ara ba mugutgut ni ngam maligach niged ngog, ere gimed be leamnag ni dariy ban’en nib kireb riy? Ere mpi’ed ba gamanman ni aram rogon ngak governor ngam guyed! Gur ra felfelan’ ngomed me gol ngomed?”
Gimed e pi prist, mu fithed Got ni nge gol ngodad ngam guyed. Ya dabi fulweg taban e meybil romed, ma gimed e kireb romed. 10 I SOMOL ni Gubin ma Rayag Rok e be ga’ar, “Gu be athapeg ni mang e ning bigmed mban e Tempel, ya nge dab kumu k’oreged e nifiy nib mm’ay fan u daken e altar rog. Ya kam kirebgad u wun’ug; dabi fel’ u wun’ug e pi maligach ni gimed be fek i yib ngog. 11 Girdi’ u gubin yang u fayleng e yad be liyor ngog. Gubin yang ni yad be urfiy e incense riy ngar pi’ed ngog ma yad be pi’ e tin ni bfel’ e maligach. Yad gubin ni yad be liyor ngog! 12 Machane gimed e dakumur liyorgad ngog, ya ka mogned ndariy fan e altar rog, ma kigmed be pi’ e tin ndubmed e ggan u daken. 13 Ke lungumed, ‘Ke chalabdad ko pin’ey ni urngin!’ Ma gimed be tartareg lechngen p’ethungmed ngog. Gimed ra maligach ngog me pi’ bigimed ba gamanman ngog ni iring, ara reb nib marwoth ara bm’ar. Gimed be finey nra fel’ u wun’ug e pin’nir? 14 Nge kireb wa’athan e en nra sasaliyeb nge li’ ba gamanman ni gathi rib fel’ nge pi’ ngog ni maligach, ma bay reb e gamanman ni bfel’ u fithik’ e gamanman rok nike micheg ngog ni nge pi’ ngog. Ya gag e pilung ni ga’, girdi’ nu gubin e nam e bay madgug u wun’rad.”