BABYOR NI
MIKAH
Murung’agen e Re Ke Babyor Ney
I Mikah ni profet e i maruwel ko ngiyal’ ni i maruwel Isaiah ni profet, mi Mikah e be’ u reb e binaw ni ba’ u lan yu Judah, ni aram e ley ni yimuch e nam. Ma ke mich u wan’ ni bay yib e gafgow nga Judah ni ta’reb rogon ko gafgow ni yi’iynag Amos ni bay yib nga ley ni lel’och e nam nu Israel, ya bayi gechignag Got e girdi’ ko nam nu Judah ni bochan e de yal’uw e tin ni yad be rin’. Machane thin rok Got ni i machibnag Mikah e pire’ boch e thin riy nib tamilang ni i pi’ e pagan’ nge athamgil nga laniyan’ e girdi’ ni fan ko tin ni bay yib e rran nga m’on.
Boch e thin ni weliy Mikah nri ba ga’fan e gapas ni bay yib nga fayleng mi Got e bayi par ni ir e pilung ma be fol e girdi’ rok (4:1–4); nge yi’iy ni bay yib be’ ko ganong rok David ni ir e bayi fek e gapas i yib ko pi nam nu fayleng (5:2–5a). Ku ba’ riy e thin ni bay ko machib rok e pi profet nu Israel ni ga’ar, “Ba’aray e n’en ni be yog ni ngan rin’: mu rin’ed e n’en nib yal’uw, mi gimed par nib t’uf Got romed nge girdi’, mi gimed fol rok Got u fithik’ e sobut’an” (6:8).
Gathon e Re Ke Babyor Ney
Gechig nga daken yu Israel ngu Judah 1:1—3:12
Sul nga rogoy nge gapas 4:1—5:15
Ba ginaeng nge n’en ni nge lagan’uy ngay 6:1—7:20
1
Ba’aray e thin rok SOMOL ni yib ngak Mikah nu Moresheth ko ngiyal’ ni ba’aram ni i pilung Jotham, nge Ahaz, nge Hezekiah u Judah, nra chuw bagayad me yib bagayad nga luwan. Me dag SOMOL ngak Mikah e pin’en ni bay yib nga Samaria nge nga Jerusalem.
Dolo’loy ni fan ngak yu Samaria nge yu Jerusalem
Gimed urngin e girdi’ ko pi nam, mu telmed;
gimed gubin e girdi’ nu fayleng, mu telmed!
I SOMOL ni Th’abi Tolang e nge micheg bbugithin nib togopluw ngomed.
Mu telmed! Be non u lan e Tempel rok u tharmiy.
I SOMOL e ke chuw u tagil’ nib thothup;
bay yib nga but’, ngi i yan u p’ebugul e pi burey.
Ma bay i ranran e burey u tan e rifrif u ay
ni bod e kindel u mit e nifiy;
ni map’ ngalan e pi loway
ni bod e ran ni be lul’ u daken e burey.
 
Urngin e pin’ey ni bay yib ya girdi’ nu Israel e kar denen gad ma kar togopluwgad ngak Got. I mini’ e ba kireb e rok ko togopluw ni be tay piyu Israel? Yu Samaria, ni aram e tochuch ko fare gi nam. I mini’ e kireb rok ni yibe tayfan e liyos u Judah? Yu Jerusalem! Ere be ga’ar SOMOL, “Bay gu tay yu Samaria ni bod yu ulung i dow u lan e tafelfel’, nge par ni bangi ban’en ni ngu’un yung e woldug ni grape riy. Bay gu pu’og chachabungen e mogoth ko re binaw nem nga pe’ning ngalan e loway, nge m’ug e def nni toy re binaw nem nga daken. Urngin e pi liyos nri ba t’uf rorad e bayi m’ingm’ing nge nochiyang, gubin ban’en nni pi’ ngak e ppin ni yad ma chuway’ ngorad u tempel e bay ni kirebnag ko nifiy. Gubin fapi liyos e bayi par ni bu’lung i dow. Pin’ey e yag ngak piyu Samaria ko meybil ni man yong’ol ni ur ted, ere chiney e pi to’ogor rorad e ngar feked ngar pi’ed ngak yugboch e ppin ni yad ma falchuway’ ngorad ulan reb e tempel u bang.”
Me ga’ar Mikah, “Bay gu yor mu gu dololoy’ ni bochan e ren’ey. Bay ug wan ndab ku gon’ e sus ma dariy e mad u dakenag, ngan nang gelngin e kireban’ ni kug tay. Bay ug yor ni bod ba gamanman ni jackal mu ug dololoy’ ni bod ba arche’ ni ostrich. Ya maad’ad nike tay yu Samaria e dabkiyag ni nge fos. Yu Judah e aram e nge yib e mit i maad’ad nem ngorad; ma mogothgoth e ke taw ko pi garog nu Jerusalem, ni aram e gin be par e girdi’ rog riy.”
Mael ni yib nga Jerusalem
10 Dab mu weliyed ngak e pi to’ogor rodad nu Gath murung’agdad ni kad waer gad ko mael, ngam guyed rogon nge dab ra guyed gimed ni gimed be yor. Gimed e girdi’ nu Beth Leafra, mu leapgad u fithik’ e fiyath ngam daged ni kari kireban’med. 11 Gimed e girdi’ nu Shafir, mmarod nga reb e nam ngam pired riy ni gimed e kalbus, ni ngam marod ndariy e mad u dakenmed ma kam tamra’gad. Pi’in yad be par u lan yu Zaanan e dariy bagayad nra thay. Nap’an ni gimed ra rung’ag laman e girdi’ nu Bethezel ni yad be dololoy’, ma aram e kam nanged ndariy bang u rom ni yira mith ngay. 12 Girdi’ nu Maroth e dakurir ayalgad nga but’ i sonnag e yal’uw, ya SOMOL e ke fek e gafgow nrib gel i yib nga charen yu Jerusalem. 13 Gimed e girdi’ ni gimed be par u lan yu Lakish, mm’aged e pi os romed ko pi chariot. Ya kam folwok gad ko denen ni i ngongliy piyu Israel, ere aram tapgin ma ke denen yu Jerusalem. 14 Gimed e girdi’ nu Judah, chiney e ngam fingichiyed e binaw nu Moresheth Gath. Pi pilung nu Israel e dabi pi’ e binaw nu Akzib e ayuw ngorad.
15 Gimed e girdi’ nu Mareshah, e be yog SOMOL ni bayi pi’med nga pa’ ba to’ogor romed, ni yad e bay rkoled e binaw romed. Pi’in yad be yog e thin u Israel e bay ranod ra mith gad ngalan fare yiy ni bay u Adullam. 16 Gimed e girdi’ nu Judah, mu th’abed piyan lolugmed ngam yor niged pifakmed nib t’uf romed. Mmudro’ niged gimed ni bod e arche’ ni vulture, ya bay ni fek pifakmed nga wuru’ e nam ni kalbus.