NUMBERS
Murung’agen e Re Ke Babyor Ney
Kaen ney e babyor ni Numbers e bay riy chepin e girdi’ nu Israel ni tabab aram ko ngiyal’ ni ka ra chuwgad u Egypt. Be weliy salaprad nra chuwgad ko Burey ni Sinai nge tin i buch rorad u nap’an fare aningeg i ragag e duw ni yad be milekag i yan u lan e ted ni der tugil ban’en riy ni yad be lek yu Kanaan. Re ke babyor ney e kanog fithingan ni Numbers ni fan e “Mathe’eg” ni bochan e som’on e murung’agen Moses ni be mathe’eg girdi’ nu Israel, ni ngan nang ko uw urngin e girdi’ ni bay u reb e genong nge reb ko fa ragag nge l’agruw i genong.
Numbers e rayag i ki’eg nge dalip guruy. Guruy ni som’on e (1:1—10:10) e Somol e yog ngak Moses ni nge mathe’eg girdi’, miki yog ngak Moses rogon i yarmiy tagil’rad u but’ ko yungin nra ur talgad riy i yan nge rogon e maruwel ni nge pi’ ko pi Levite. Guruy ney e mus u murung’agen e girdi’ ni yad be madnomnag e Palukaf nge murung’agen e maligach ni yibe pi’ ngak Somol.
Ma gurruy ni l’agruw (10:11—21:20) e salpen e girdi’ nu Israel nge pin’en ni i buch rorad ko milekag nra ted i yan nga Moab, ni ba nam ni bay ko ngek ko Lul’ ni Jordan. Re milekag rok piyu Israel ney e rib gel feni momaw’ ngorad ko yan u lane ted ni desert i yan, ma yug yad be gun’gun’ ni mada’ ngak Moses miyad be togopluw ngak ma ku arita’ Got. Ra siyeged ni ngranod ngalan yu Kanaan u nap’an ni rrung’aged murung’agen e girdi’ nma par u rom. Ma aram me gechig nagrad Got nge tayrad u lane ted ni aningeg i ragag e duw. Guruy ney e yibi mus nga murung’agen ni karanod ra n’ufed e tent rorad nga Moab ni ba chugur ko Burey ni Pisgah.
Ma guruy ni dalip (21:21—36:13) e ku be weliy murung’agen piyu Israel ni karanod ra koled bang e binaw ni bay u ba’ ni ngek ko Lul’ ni Jordan, ni tabab ko mathil u Moab u lane yimuch nge yan i mada’ ko Lipath nu Galilee u lan e lel’och. Ma aram me cheal e pilung nu Moab nge pi’ puluwon Balaam ni profet ni be’ u yug reb e nam, ni nge yibilay yu Israel ni nge buch wa’athrad. Machane me yog Somol ngak Balaam ni nge fal’eg wa’athan piyu Israel, me fol Balaam riy.
Fapi girdi’ nu Israel e ra ngongliyed rogorad ni ngar th’abe e Lul’ ni Jordan nga barba’ ngar koled e nam nu Kanaan, ni yug aram rogon ni boch i yad e ra duwgiliyed ni ngar tafned e ba’ ni ngek ko Lul’ ni Jordan. Ma’aram mkuni the’eg uringrad ko yay ni l’agruw ngay, ma aram me duwgiliy Somol i Joshua ni ir e nge pow’iyrad. Miki mel’eg boch e girdi’ ni ngar ayweged Joshua i f’oth e binaw u pa’ fapi genong. Yib i mus e re ke babyor ney nga murung’agen Somol ni ku be pi’ ku boch e motochiyel ngak e girdi’ nu Israel.
Numbers e murung’agen e girdi’ ni ur togopluwgad, mi i mulan’rad, miyad siyeg ni nge riyul’ u wan’rad ni Somol e rayag rok ni ngi i aywegrad. Machane re babyor ney e ku be dag riy rogon e ayuw rok Somol ngorad ni i yororiy pa’ ngorad u fithik’ e mael, ma be pi’ e ggan nge ran ngorad u lan e ted ni desert. Somol e ba’adag ni nge nang piyu Israel ni ir e dabun ni ngan thang owcherad; Ir e ba’adag ni nge fal’eg wa’athrad, ni bod ni meybilnag Aron:
“I SOMOL e ngi i fal’eg wa’athmed ma be ayuwegmed;
I SOMOL e ngi i gol ngomed ma be runguymed;
I SOMOL e ngi i falan’ ngomed ma be pi’ e gapas nga laniyan’med” (6:24–26).
Gathon e Re Ke Babyor Ney
Girdi’ nu Israel nthe’egrad 1:1—4:49
Pi motochiyel nge piyu Levi nni yibleyrad 5:1—8:26
Palukaf nni Madnomnag nge fare gi manileng ni upnguy fare Tent nib Thothup 9:1–23
Fapi girdi’ nra tabolngin niged e milekag rorad 10:1–36
Fapi girdi’ nra gun’gun’gad 11:1–35
I Miriam nge Aron ni awan’row ngak Moses 12:1–16
Fa ragag nge l’agruw i pumo’on nl’ograd ngranod ngalan yu Kanaan 13:1–33
Fapi girdi’ nra togopluwgad min gechig nagrad 14:1–45
Pi motochiyel nge pi Gechig 15:1–41
Girdi’ ni togopluw 16:1—17:13
Pi Prist nge pi Levite 18:1–32
Machalbog nta’ 19:1–22
Milekag i yan nga Moab 20:1—21:35
Pi thin ni yib ngak Balaam 22:1—24:25
Girdi’ ni da ki yul’yul’ 25:1–18
Girdi’ nu Israel nni the’egrad ko yay ni l’agruw 26:1–65
Ppin ni pifak Zelofehad nni pi’ taferad binaw 27:1–11
I Joshua nmel’eg ni nge pow’iy yu Israel 27:12–23
Ku boch e Motochiyel nge Maligach ni fan ko pi madnom rok yu Israel 28:1—30:16
Israel ni gel ngak yu Midian me felfel’eg rogon ni nge th’ab e Lul’ nu Jordan nga barba’ 31:1—36:13
1
Yu Israel Nthe’egrad
1 Bin m’on e rran ko pul nl’agruw ko re duw ni l’agruw nga tomuren nike chuw e girdi’ nu Israel u Egypt, me non SOMOL ngak Moses u rom u lan fare Tent u p’eowchen u lan fa gi ted ni desert u Sinai. Ni ga’ar,Num 26:1–51 2 “Gur nge Aron e ngam the’egew e girdi’ nu Israel ni yuke girdi’ nge pi tabnaw. Mu yoloyew fithingan urngin e pumo’on 3 ni rliw’ e duw yangren ngalang nrayag ni ngar uned ko mael. 4 Mog ko pi mitethin u ba kaen e girdi’ u reb e ganong ngu reb ngar ayuweged gimew.” 5-16 Irera’ e pi pumo’on, ni mitethin u lan e pi ganong rorad, ni kan mel’egrad ko mitney e maruwel:
| Ganong | Mitethin ko yuke girdi’ |
| Ruben | Elizur nib mo’on ni fak Shedeur |
| Simeon | Shelumiel nib mo’on ni fak Zurishaddai |
| Judah | Nahshon nib mo’on ni fak Amminadab |
| Issakar | Nethanel nib mo’on ni fak Zuar |
| Zebulun | Eliab nib mo’on ni fak Helon |
| Efraim | Elishama nib mo’on ni fak Ammihud |
| Manasseh | Gamaliel nib mo’on ni fak Pedahzur |
| Benjamin | Abidan nib mo’on ni fak Gideoni |
| Dan | Ahiezer mo’on ni fak Ammishaddai |
| Asher | Pagiel nib mo’on ni fak Okran |
| Gad | Eliasaf nib mo’on ni fak Deuel |
| Naftali | Ahira nib mo’on ni fak Enan |
17 Re ragag nge l’agruw i pumo’on ney e ra pi’ed e ayuw ngak Moses nge Aron 18 ngar pininged gubin e girdi’ nga ta’bang ko rofen nsom’on ko pul ni l’agruw ngar ngongliyed babyoren urngin kaen e girdi’ nge urngin e tabnaw. Urngin fithingan e pumo’on ni rliw’ e duw rorad ngalang e ni the’egrad ngan yoloy nga but’, 19 ni bod rogon ni yog SOMOL. Ere u rom u lan fa gi ted ni desert u Sinai, e ir e gin ni ngongliy Moses babyoren fapi girdi’ riy. 20-46 Pi’in pumo’on ni rliw’ e duw rorad ngalang nrayag ni ngar uned ko mael e ni ngongliy babyorenrad nrogon fithingrad ko yuke girdi’ nge tabnaw nrabad riy, ni tabab ko fare ganong rok Ruben, ni bin nth’abi nganni’ e pumo’on u fak Jakob. Urunginrad u gubin e ba’aray:
| Ganong | Urngin e girdi’ |
| Ruben | 46,500 |
| Simeon | 59,300 |
| Gad | 45,650 |
| Judah | 74,600 |
| Issakar | 54,400 |
| Zebulun | 57,400 |
| Efraim | 40,500 |
| Manasseh | 32,200 |
| Benjamin | 35,400 |
| Dan | 62,700 |
| Asher | 41,500 |
| Naftali | 53,400 |
| Urnginrad u gubin: | 603,550 |
47 Pi Levite e dan uneg babyoren rad ko fa tin ba’aram e ganong, 48 ni bochan e ga’ar SOMOL ngak Moses, 49 “Nap’an ni ga ra the’eg e pi pumo’on nrayag ni ngar uned ko mael, ma dab mu’uneg fare ke girdi’ rok Levi ngay. 50 Ya ngam tay e pi Levite ni yad e ngar maruwelgad ko Tent u p’eowcheg nge gubin tatalin e maruwel riy. Yad e bay urfeked i yan nge urngin tatalin e maruwel riy, ma bay ur pigpiggad riy, ma bay ra n’ufed e pi Tent rorad ngalang nib liyeg fare Tent. 51 Gubin ngiyal’ ni gimed ra deg ni ngam marod, ma pi Levite e yad e ngar piliged nga but’ fare Tent ma ku yad e yad ra n’uf ngalang bayay ko gin ni kam turguyed ni aram e gin ngam pired riy e ngiyal’nem. Ma yug be’ ni nge chugur nga charen fare Tent e yira thang e fan rok. 52 Mfini yib e tin kabay e girdi’ nu Israel ngar n’ufed e Tent rorad ngalang, ni yu ulung, ra reb fapi pumo’on ma bay u tan e girok e flak ni yad e birok e ulung. 53 Machane pi girdi’ ko ganong rok Levi e yad ra n’uf e pi Tent rorad nib liyeg fare Tent rog ngu’ur matnagiyed, ya nge dabi chugur yug be’ ngay ya ri mang tapgin e damumuw rog ni nge aw ngak yu Israel ni ga’ngin.” 54 Aram me rin’ e girdi’ nu Israel gubin ban’en nike yog SOMOL ngak Moses.
DRAFT VERSION — Proofreading in progress