1 Me ga’ar SOMOL ngak Moses, 2 “Mu ngongliy l’agruw i yabul ko silber ni kan amanag ni ngu’un pong girdi’ ngay ni nge mokun nga ta’bang nge ngiyal’ ni ngad piliged e pi Tent rodad nga but’ ni aram e ngad n’iged gil’dad. 3 Nap’an ni yira thoy fa gali yabul ni kan k’iyag lingan, ma aram e nge mu’ulung e girdi’ ngar cholongobiyed gur u langan e mab ko fare Tent u p’eowcheg. 4 Ma fa’anra ta’reb e yabul e kan thoy, ma aram e kemus ni pi mitethin ko yuke girdi’ e ngar mu’ulunggad ngar cholongobiyed gur. 5 Ma nap’an e yira thoy fa gali yabul nib yo’or yay mab ngoch lingan ma aram e fapi ganong ni kar n’ufed e Tent rorad u ley ni ngek fare Tent e yad e som’on ni ngranod. 6 Ma yay nl’agruw ni yira thoy fa gali yabul nib yo’or yay mab ngoch lingan, e fapi ganong ni kar n’ufed e pi Tent rorad u ley ni yimuch ko fare Tent e yad e migid ni ngranod. Ere lingan e yabul ni yibe thoy nib yo’or yay mab ngoch lingan e aram e ngan chuw. 7 Machane yira thoy e yabul nib k’iy lingan mab yo’or yay ma aram e nge mukun urngin yu Israel nga ta’bang. 8 Fapi pumo’on ni pifak Aron ni yad e prist e yad e maruwel rorad ni ngar thothey e yabul.

“Re motochiyel ni ba’aray e ngu’un rin’ e chiney i yan ngaram. 9 Nap’an nra yib e mael ngomed u lan tafenmed ni gimed be ayweged gimed rok e re to’ogor nike yib ni mael ngomed, migmed thoy e gali yabul ney ni pow riy ni keyib e mael. I Gag SOMOL ni Got romed e gu ra ayuwegmed u pa’ e pi to’ogor romed. 10 Ma ku er rogon e pi madnom ko felfelan’ — u ngilan’ e Madnom ko M’ug e Pul nge ku boch e madnom romed ko liyor — ma ngam thoyed fa gali yabul ko ngiyal’ ni ngam pi’ed e maligach romed ni mo’oruf nge maligach nma gapaseg thilin Got nge girdi’. Ma aram e gu ra ayuwegmed. I Gag SOMOL ni Got romed.”

11 Re rran ni rliw’ fen ngay ko bin l’agruw e pul u lan e bin l’agruw e duw nike chuw yu Israel u lan yu Egypt, me langlang fare gi manileng ngalang u daken fare Tent u p’eowchen SOMOL 12 me tabab piyu Israel ko milekag ni ngar chuwgad u lan fare gi ted u Sinai. Me yan fare gi manileng i gif nga daken e ted nu Paran.

13 Me yog SOMOL ngorad u l’ugun Moses ni ngar tabobgad ko milekag, 14 ma gubin ngiyal’ ni yad ra mithmith, ma yad beyan nikyad ba yaram. Pi’in bay u tan e flak ko fare raba’ i girdi’ ni be gafaliyrad fare ganong rok Judah e yad e som’on ko yan, ni yad be yan ni yu raba’, ni Nahshon nib mo’on ni fak Amminadab e ir e be gafaliyrad. 15 Me Nethanel nib mo’on ni fak Zuar e be gafaliy fare ganong rok Issakar, 16 me Eliab nib mo’on ni fak Helon e be gafaliy fare ganong rok Zebulun.

17 Ma aram min pilig fare Tent nga but’, ma fa gal ke girdi’ rok Gershon nge Merari ni yad e yad ma fek, e yad e som’on ni ngar feked ngranod.

18 Ma pi’in migid ni ngranod e pi’in ni bay u tan e flak ko fare raba’ i girdi’ ni be gafaliyrad fare ganong rok Ruben, ni yad be yan ni yu raba’, ni Elizur nib mo’on ni fak Shedeur e be gafaliyrad. 19 I Shelumiel nib mo’on ni fak Zurishaddai e be gafaliy fare ganong rok Simeon, 20 me Eliasaf nib mo’on ni fak Deuel e be gafaliy e ganong rok Gad.

21 Me migid ma fare ke girdi’ rok Kohath ni yib ko ganong rok Levi ni yad be fek fa pin’em nib thothup e yad ra yan. Nap’an ni yad ra taw ko gin ni migid ni ngar pired riy ma fare Tent e kem’ay i n’uf ngalang.

22 Ma pi’in migid ni yad ra yan e pi’in ni bay u tan e flak ko fare raba’ i girdi’ ni be gafaliyrad fare ganong rok Efraim, ni yad be yan ni yu raba’, ni Elishama nib mo’on ni fak Ammihud e be gafaliyrad. 23 I Gamaliel nib mo’on ni fak Pedahzur e be gafaliy e ganong rok Manasseh, 24 me Abidan nib mo’on ni fak Gideoni e be gafaliy e ganong rok Benjamin.

25 Ma pi’in nth’abi tomur ni yad ra yan e pi’in ni bay u tan e flak ko fare raba’ i girdi’ ni be gafaliyrad fare ganong rok Dan. Maruwel rorad e yad e matnag u wuryal ko gubin fa yu raba’ i girdi’. Mranod ni yu raba’ ni Ahiezer nib mo’on ni fak Ammishaddai e be gafaliyrad. 26 Me Pagiel nib mo’on ni fak Okran e be gafaliy fare ganong rok Asher, 27 me Ahira nib mo’on ni fak Enan e be gafaliy fare ganong rok Naftali. 28 Aram e irera’ yarmen e yan ni i tay e girdi’ nu Israel ni gubin ngiyal’ ni ngar chuwgad ma yad be yan ni yu raba’.

29 Me ga’ar Moses ngak Hobab nib mo’on ni fak Jethro nu Midian ma le’engin be’ ni bpin ni walagen Moses, “Chiney e aram e ke chugur ni nggu chuwgad u roy nggu warod ko fare gin’en nike yog SOMOL ni bayi pi’ ngomad. Ke micheg SOMOL nra tow’athnag yu Israel nge fel’ rograd, ere mu’un ngomad, ma tin nra fel’ rogomad riy e gamad ra pi’ boch ngom.”

30 Me fulweg Hobab ni ga’ar, “Dangay, ya nggu sul ko binaw rog.”

31 Me ga’ar Moses, “Wenig ngom dab mu pagmad. Gamnang e gin nrayag ni nggu n’ufed e Tent romad riy u daken e ted, mra yag ni ngu’um pow’iymad. 32 Ma fa’an gara un ngomad, ma gubin e pi tow’ath nra pi’ SOMOL ngomad ma gamad ra pi’ boch ngom.”

33 Fa’ani chuw piyu Israel u Sinai, ni fare burey nib thothup, miyad milekag ni dalip e rran, min m’oneg rorad fare Kahol ko M’ag rok SOMOL ni nge turguy e gin ni ngar n’ufed e Tent rorad riy.

34 Yad ra pug e Tent rorad ni rran ni aram e ngar milekaggad, ma bay fa gi manileng rok SOMOL u puluwrad ngalang.

35 Ma nap’an ni yira fek fare Kahol ko M’ag nni yan, me ga’ar Moses, “SOMOL, mu’un ngomad ngam wereg e pi to’ogor rom, ma ga gagiyegnag e pi’in ni fanenikarad gur ngar milgad!”Psa 68:1 36 Ma nap’an ni yira gifeg fare Kahol ko M’ag nga but’ me ga’ar Moses, “SOMOL, mu sul ngam par rok piyu Israel ni yad bo’or e biyu’.”