119
Motochiyel rok SOMOL
1 Nge felan’ e pi’in yad ma par ndariy thibngirad,
ni pi’in yad ma fol ko motochiyel rok SOMOL.
2 Nge falan’ e pi’in yad ma folwok ko tin keyog,
ni pi’in yad ma fol rok u polo’ i lanin’rad.
3 Dariy e ngiyal ni yad ma rin’ e kireb;
yad ma yan u kanawo’en SOMOL.
4 SOMOL, gur e kam pi’ ngomad e pi motochiyel rom
ma kamog ngomad ni nggu yul’yul’gad ngay.
5 Ri gu be athapeg ni gomang e yuggu par ni gub yul’yul’
ko pi fanow rom.
6 Fa’anra gu tiyan’ug nga gubin e tin kamog,
ma aram e dab ni tamra’ nigeg.
7 Gu ra fil e tin kam turguy nib mat’aw,
ma bay gu pining e sorok ngom u lanin’ug nib machalbog.
8 Bay gu fol ko pi motochiyel rom;
are dab mu nigeg bi’id!
Fol ni ngan tay ko fare Motochiyel rok SOMOL
9 U rogon be’ ni ka ba pagel ni nge par e yafos rok nib machalbog?
Ngi i fol ko tin kamog ni ngan rin’.
10 Gu be gay rogon ni nggu pigpig ngom u polo’ i lanin’ug;
mu aywegeg nge dab gu pi’ keru’ug ko tin kamog ni ngan rin’.
11 Gu be chubgiliy e motochiyel rom u lan gumircha’eg,
ya nge dab gu denen nib togopluw ngom.
12 A SOMOL, gu be pining e sorok ngom;
mu fil ngog e pi kanawo’ rom.
13 Bay gu sul u daken
gubin e motochiyel rom ni ka mu pi’ nggu weliy nib ga’ lamag.
14 Gu ba felfelan’ ni gu be fol ko tin kamog ni ngan rin’,
ku gu ba’adag ko bin nge yo’or ban’en rog.
15 Gu be fil e pi fonow rom;
ma gu be fal’eg i yaliy e machib rom.
16 Gu ma felfelan’ ko pi motochiyel rom;
ma dab gu pag talin e tin ka mu ta’chiylen.
Felfelan’ u lan e Motochiyel rok SOMOL
17 Mu gol ngog i gag e tapigpig rom,
ya nge yag ni ug par mu gu be fol ko machib rom.
18 Mu bing owcheg, ya nge yag ni gguy
falngin e tin ba rriyul’ u lan e motochiyel rom.
19 I gag e gu bay u roy u fayleng ni boch ngiyal’;
dab mmithag e pi motochiyel rom rog.
20 Be amith lanin’ug ni kug’um ni bochan;
ni gu ba’adag ni nggu nang e tin ka mu tiriggiliy ni gubin ngiyal’.
21 Ga ma ginaeng e en nib tolngan’;
ma ga ma bucheg wa’athan e pi’in der fol ko tin kamog ni ngan rin’.
22 Mu pithigeg ko thin ni kireb nge moning rorad,
ni bochan e gu ma tay e pi motochiyel rom u gil’.
23 Pi tagagiyeg e ka ra mada’gad kar makathgad nib togopluw ngog,
machane bay gu fil e machib rom.
24 Pi fanow rom e ma pi e felfelan’ ngog;
ni ir e ma yal’uwegeg.
Ngan duwgiliy ni ngan folwok ko pi Motochiyel rok SOMOL
25 Ku gu aw nga fithik’ e ab ni ku gu waer;
mu fasegneg, ni bod ni kam micheg.
26 Kugog ngom urngin e tin gu rin’, ma ka mu fulweg lungug;
mu fil ngog e yu pa’ i kanawo’ rom.
27 Mu ayuwegneg nggu nangfan e pi motochiyel rom,
ma bay ug par ni gu be leamnag feni fel’ e pi machib rom.
28 Ke li’eg e kirban’;
mu pi’ gelngig, ni bod nim micheg.
29 Mu aywegeg ni dab gu wan ko wo’ ni kireb,
ma fanam manigil e ngam machib nigeg ko motochiyel rom.
30 Ku gu turguy ni nggu fol;
Kar gu l’eg owcheg ko tin ka mu tiriggiliy.
31 SOMOL, gu ma folwok ko pi fanow rom,
dab mu pageg ngan tamra nigeg.
32 Rug ra fol ko tin kam ta’chiylen nib pasigan’ug ngay,
ni bochan e bay mu gelnag e tamilngan’ rog.
Ba meybil ko tamilangan’
33 SOMOL, mu fil ngog fan e pi motochiyel rom,
mu gu fol riy ni gubin ngiyal’.
34 Mu tamilang nigeg ko motochiyel rom, mu gu fol riy;
ma bay gu cha’riy u polo’ i gumircha’eg.
35 Mu yol’uwegeg ngu’ug fol ko tin kamog ni ngan rin’,
ya fithik’ e pin’em e gu ma pir’eg e felfelan’ riy.
36 Mu pi’ chogowen ngog ni nggu fol ko pi motochiyel rom
ma gathi nge yo’or ban’en rog.
37 Mu talegneg ni dabki lagan’ug ko n’en ndariy gam’ingin;
mu gol ngog, ni bod nim micheg.
38 Mu tay u gil’ e n’en nim micheg ngog, I gag e tapigpig rom,
ni fare michmich ni mu tay ko pi’in yad ma fol rom.
39 Mu ayuwegneg ko thin ni kireb ni gu ma rus ngay;
rib fel’ e pin’en ni ka mu tiriggiliy.
40 Gu ba’adag ni nggu fol ko tin kamog ni ngan rin’;
mu pi’ e yafos nib be’ech ngog, ni fan e gab mat’aw.
Nge pagan’uy ko Motochiyel rok SOMOL
41 SOMOL, mu dag ngog gelngin ni gub t’uf rom,
ma ga aywegeg nrogon nim micheg.
42 Ma aram e rayag ni nggu fulweg lungun e pi’in yad be gar nigeg
ni bochan e bpagan’ug ko thin rom.
43 Mu pi’ gelngig ni tin riyul’ e ngi i yib u langag ni gubin ngiyal’,
ni bochan e be lagan’ug ko tin ka mu tiriggiliy.
44 Bay ug fol ni gubin ngiyal’ ko motochiyel rom,
ni manechibog ko pichibog.
45 Bay gu par ni rib puf rogog,
ni bochan e gu ma athamagiliy ni nggu fol ko pi machib rom.
46 Bay gu weliy e tin kamog ni ngan rin’ ko pi pilung
ni dab gu tamra ngay.
47 Ku gu pir’eg e felfelan’ u fithik’ e fol ni gu be tay ko tin kamog ni ngan rin’,
ni bochan e rib t’uf rog e tin kamog.
48 Gu ma tay fan ma ba t’uf rog e pi motochiyel rom;
bay ug leamleamnag e pi fanow rom.
Nge pagan’uy ko Motochiyel rok SOMOL
49 Mu leamnag e michmich ni mu tay ngog, I gag e tapigpig rom;
ya ke pi’ e lagan’ ngog.
50 Mus u fithik’ e gafgow rog mab aw e gapas u lanin’ug
ni bochan e n’en ni mmicheg e ke pi’ e yafos ngog.
51 Pi tolngan’ e gubin ngiyal’ ni yad ma moning nigeg,
machane dawor gu digey e motochiyel rom.
52 Ke yib woran ngan’ug e tin mu tiriggiliy kakrom,
nma pi’ e pagan’ ngog, A SOMOL.
53 Nap’an ni gu ra guy e pi’in kireb ni th’ab e motochiyel rom,
mu gu sug ko damumuw.
54 Nap’an e par rog u roy u fayleng nib ngoch nap’an
e gu be tunguy e pi tang ni murung’agen e tin kamog ni ngan rin’.
55 A SOMOL, ra nep’ mu gu leam nigem,
mu ug leamnag murung’agen e motochiyel rom.
56 Gu ma pir’eg e felfelan’ rog
ni gu ma fol ko tin kamog ni ngan rin’.
Ngan liyor ko Motochiyel rok SOMOL
57 A SOMOL, urngin e tin bt’uf rog e gur;
ku gu micheg ni nggu fol ko motochiyel rom.
58 Gu be ning ngom u polo’ i lanin’ug
ni nge wurengan’um ngog, ni bod nim micheg.
59 Kug leamnag rogon pangig,
ma ku gu micheg ni nggu falwok ko pi fanow rom.
60 Yug nap’an ni ga ra non
mu gu rin’ e n’en kamog.
61 Pi’in kireb e yad ma tay e wup ni fan ngog,
machane dagur pagtilin e motochiyel rom.
62 Ra lukngun e nep’ mu gu od
nggu pining e sorok ngom nga feni mat’aw rogon e pi tiriggil rom.
63 I gag e fager rok urngin e pi’in yad ma pigpig ngom,
ni gubin e pi’in yad ma fol ko pi motochiyel rom.
64 SOMOL, fayleng e ke sugnag e t’ufeg rom ni dabimus;
mu fil ngog e pi motochiyel rom.
Feni ga’ fan fare Motochiyel rok SOMOL
65 SOMOL, michmich rom e kam tay u gil’,
ma gab gol ngog, I gag e tapigpig rom.
66 Mu pi’ ngog e gonop nge llowan’,
ni bochan e ba pagan’ug ko tin kam ta’chiylen.
67 Ug denen ko ngiyal’ ni dawor mu gechig nageg,
ma chiney e gu be fol ko thin rom.
68 Rigab manigil — ma gab gol!
Mu fil ngog e tin kamog ni ngan rin’.
69 Pi’in tolngan’ e yad be ban u murung’ageg
machane gu be fol ko fanow rom u polo’ i lanin’ug.
70 Pi cha’ney e dariy ban’en ni yad manang fan,
machane gag e gu be pir’eg e felfelan’ u lan e motochiyel rom.
71 Gechig rog e ba manigil ngog,
ya ke yag ni gu fil riy e tin kamog ni ngan rin’.
72 Fare mmotochiyel ni mu pi’ ngog e ba ga’ fan u lanin’ug
ko urngin e salpiy u lan e re fayleng ney.
Feni mat’aw fare Motochiyel rok SOMOL
73 I gur e mu sunmiyeg, ma ga aywegeg ni de buch ban’en rog;
mu pi’ ngog e tamilngan’, ya nge yag ni mit ngog e pi motochiyel rom.
74 Picha’ ni yad ma liyor ngom e yad ra guyeg ma yad ma felan’,
ni bochan e ma pagan’ug ko n’en nim micheg.
75 SOMOL, gumnang ni tiriggil rom e go’ bmat’aw,
ma ka mu gechig nigeg ni bochan e ga ba yul’yul’.
76 Mu pag e t’ufeg rom ni dabimus nge fal’eg lanin’ug,
ni bod nim micheg ngog, I gag e tapigpig rom.
77 Mu rungyeg, mu gu par ni gub fos
ni bochan e ke yag e felfelan’ ngog ko motochiyel rom.
78 Mang e yigi tamra’ e pi’in tolngan’ ko thin ni ur tar’ed nga dakenag;
ma gag, e bay gu par ngu’ug leamnag e pi fanow rom.
79 Mang e yigi yib e pi’in yad ma liyor ngom ngog —
ni gubin e pi’in manang e tin ka mu ta’chiylen.
80 Mang e yigi fel’ rogon ni ngu’ug fol ko pi motochiyel rom
ya nge dab gu tamra’ ko me’waer rog.
Ba meybil ni ngan mat’aw nigey
81 SOMOL, ke aw parwog ni gu be son nagem ni ngam ayuwegneg;
ku gu tay e pagan’ rog ko thin rom.
82 Lan owcheg e ke magaf i changarnag e n’en kam micheg,
ni gu be fith ni gu be ga’ar, “Wi’in e ga ra aywegeg?”
83 Dakriy ban’en ni gu bfel’ ngay kug bod ba tafen e wayin ni kann’ag;
ni yug aram rogon ma dawor gu pagtalin e tin kamog ni ngan rin’.
84 Uw n’umngin nap’an ni thingar kug son?
Mingyal’ e bay mu gechignag e pi’in yad be gafgow nigeg?
85 Pi’in tolngan’, ni darir folgad ko motochiyel rom,
e kar fu’oged e low ni nggu mul nga langgin.
86 Gubin e motochiyel rom mra pagan’nuy ngay;
girdi’ e yad be gafgow nigeg ko sasalap l’ugun — mu ayuwegneg!
87 Kari chugur ni ngar feked e pogofan rog,
machane dawor gu pag e tin kam ta’chiylen.
88 Mu gol ngog ni bochan e t’ufeg rom ni dabimus,
ya nge yag ni gu fol ko motochiyel rom.
Michan’ ko Motochiyel rok SOMOL
89 SOMOL, thin rom e dariy n’umngin nap’an;
ma ba manemus u tharmiy.
90 Fanam yul’yul’ e ra par manechibog;
I gur e mu ayliy e fayleng nga tagil’, me par.
91 Urngin ban’en ma kabay u gil’ ke mada’ ko bin dab’ e rran ni bochan e gur e mog,
ma bochan e yad e tapigpig rom ni yad gubin.
92 Fa’an manga gathi motochiyel rom e ir e enggin e felfelan’ rog,
ma kugum’ nriyul’ u fithik’ e gafgow rog.
93 Dab gu pag e fanow rom,
ni bochan e ir e ke teg ni gub fos.
94 Ba milfag ngom — mu aywegeg!
Kug guy rogon ni nggu fol ko tin mog ni ngan rin’.
95 Girdi’ nib kireb e yad be son ni ngar thanged e pogofan rog,
machane bay ug leamnag e motochiyel rom.
96 Kugnang ni urngin ban’en ma bay folen;
machane motochiyel rom e dariy thibngin.
Ngan t’ufeg e Motochiyel rok SOMOL
97 Rib t’uf rog e motochiyel rom!
Gu ma par ni gu ma leamnag ni polo’ e rran.
98 Tin kamog ni ngan rin’ e be par u wun’ug ni gubin ngiyal’,
be ga’nag e gonop rog ngak e pi to’ogor rog.
99 Ba gel e tamilangan’ rog ngak urngin e pi sensey rog,
ya gu ma leamnag e pi fonow rom.
100 Ka ba ga’ e gonop rog ngak e pi’in kar pi’lalgad,
ya gu be fol ko tin kamog ni ngan rin’.
101 Kug gilaf ko urngin e ngongol nib kireb,
ya gu ba’adag ni nggu fol ko thin rom.
102 Dawor gu pi’ keru’ug ko fonow rom,
ya gur e tamchib rog.
103 Rib athib lamen e thin rom ni ku gu ri’;
kab athib ko honey!
104 Pi motochiyel rom e yagnag e gonop ngog,
ma aram mu gu fanenikay urngin e ngongol nib kireb.
Tamilang nma pi’ e Motochiyel rok SOMOL
105 Thin rom e ba magal ni be pow’iyeg,
ma tamilang ko kanawo’ rog.
106 Bay gu tay nga tagil’ e tin ku gu micheg
ni ngu’ug fol ko pi fonow rom nrib mat’aw.
107 SOMOL, gafgow rog e rriyul’ nrib gel;
mu teg ni gubfos, ni bod ni kam micheg!
108 A SOMOL, nge fel’ u wun’um e meybil rog ni gu be pining e magaer ngom,
ma ga fil ngog e tin kamog ni ngan rin’.
109 Ya gubin ngiyal’ ni kug fal’eg rogog kug kol e pogofan rog nga pa’ag;
ma motochiyel rom e dawor gu pag talin.
110 Girdi’ nib kireb e kar ted e wup ni nggu aw ngay,
machane dawor gu pi’ keru’ug ko tin ni kamog ni ngan rin’.
111 Pi motochiyel rom e fanag ndariy n’umngin nap’an,
nma pi’ e felfelan’ ngalan gumircha’eg.
112 Kug duwgiliy u wun’ug ni nggu fol ko pi motochiyel rom,
nge mada’ ko rofen ni bay gum’.
U lan e Motochiyel rok SOMOL e dariy ban’en nra buch rog riy
113 Gu be fananikay e pi’in der gaman e yul’yul’ ni yad be tay ngom,
ya gag e ba t’uf rog e motochiyel rom.
114 I gur e manaf rog nge rungrung rog;
nike lagan’ug ko n’en kam micheg.
115 Gimed e girdi’ ni tadenen, mu pired u palog rog.
Ya bay ug fol ko tin ke tay e Got rog chiylen.
116 Mu pi’ gelngig, ni bod nim micheg, mu gu par ni gubfos;
dab mu pageg nge mulan’ug ko tin ke lagan’ug ngay!
117 Mu chubiyeg ngalang, nggu par ni dabi buch ban’en rog,
ma gubin ngiyal’ ni bay ug tiyan’ug ko tin kamog ni ngan rin’.
118 Ga ma fek owchem rok urngin e pi’in ndarir falwokgad ko motochiyel rom;
pi sasaliyab rorad e ba m’ay fan.
119 Ga ma tay urngin e pi’in kireb ni bod e dow,
aram fan nib t’uf rog e fanow rom.
120 Gu be rus ni bocham;
ma ke sug nigeg e marus ni bochan e pufthin rom.
Falwok ko Motochiyel rok SOMOL
121 Kug rin’ e n’en ni bfel’ ma ba manigil;
dab mu pi’eg nga pa’ e pi to’ogor rog!
122 Mmicheg ni ga ra ayweg e tapigpig rom;
dab mu pag e pi tolngan’ ngar gafgow nigedgag!
123 Ke magaf owcheg i changarnag e ayuw rom,
ni fare ayuw nim micheg.
124 Mu ayuwegneg ni rogon fare t’ufeg rom ni dabimus,
ma ga fil ngog e tin kamog ni ngan rin’.
125 I gag e tapigpig rom; mu pi’ ngog e tamilangan’,
ya nge yag ni gu nang e machib rom.
126 SOMOL, ke taw ko ngiyal’ ni ngam mithmith,
ya dakir fol e girdi’ ko motochiyel rom.
127 Ba t’uf rog e tin kam ta’chiylen ko gol,
bfel’ u wun’ug ko tin th’abi fel’ e gol.
128 Ere gag e rug ma falwok u gubin e fanow rom;
gu ma fananikay urngin wo’en e kireb.
Chogowen ni nga ni fol ko Motochiyel rok SOMOL
129 Pin’en ni ga be machibnag e ir e ba th’abi fel’;
gu be fol riy u polo’ i lanin’ug.
130 Ra i tamilangan’uy ko machib rom ma ra pi’ e tamilang
nge gonop ngak e pi’in ndawor ni sukul nagrad.
131 Rogon be’ ni yib e belel ngak nib gel me yim’ ni bochan e ran,
e aram rogog ni gu be yim’ ni bochan e thin rom.
132 Mu sap ngog ngam runguyeg
ni bod ni ga be rin’ ngak e pi’in ga ba t’uf rorad.
133 Mu teg ndab gu mul, ni bod rogon ni kam micheg;
dab mpageg nge gel e kireb ngog.
134 Mu ayuwegneg rok e pi’in yad be gafgow nigeg,
nge yag ni gu folwok ko tin kamog ni ngan rin’.
135 Moy, mu par ngog ni ka mu fal’eg wa’athag
ma ga fil ngog e pi motochiyel rom.
136 Lu’ rog e be map’ nga but’ ni bod ba lul’,
ni bochan e der fol e girdi’ ko motochiyel rom.
Ba mat’aw e Motochiyel rok SOMOL
137 SOMOL, gur e ga ba mat’aw,
ma pi motochiyel rom e ba mat’aw.
138 Tin ni kam duwgiliy u lan e motochiyel rom ni ngan rin’
e rib yal’uw ma ba mat’aw.
139 Damumuw rog e be yik’ u fithik’ag ni bod ba nifiy,
ni bochan e pi to’ogor rog e darir leam niged e tin kamog ni ngan rin’.
140 Ri dabi thil e n’en ni kam micheg!
Rib t’uf rog!
141 I gag e dariy rogog ma dariy fag u wun’uy,
machane dagur pag e pi machib rom.
142 Rogon ni ga ba mat’aw e bayi par ndariy n’umngin nap’an,
ma motochiyel rom e gubin ngiyal’ nib riyul’!
143 Ke suguy e gafgow nge magafan’ lanin’ug,
machane pi motochiyel rom e ma felfelan’ nigeg.
144 Fonow rom e bayi par ni gubin ngiyal’ nib mat’aw;
mu tamilang nigeg, mu gu par ni gubfos.
Meybil ni ngan thap
145 Gu be piningem u polo’ i lanin’ug;
SOMOL, mu fulweg lamag, ma bay gu fol ko tin kam ta’chiylen!
146 Gu be piningem;
mu ayuwegneg, ma bay gu ayweg e pi motochiyel rom.
147 U m’on ni nge m’ug e y’al mu gu piningem ni ngam ayuwegneg;
kug pag e taga’ ko n’en ni mu micheg.
148 N’umngin e nep’ ni der mol owcheg,
ni yuggu be leamnag e fanow rom.
149 A SOMOL mu rung’ag lamag ni bochan e t’ufeg rom ni dabimus;
mu dag e wurngan’ rom, ma ga teg ni gubfos!
150 Pi kireb ni tama’adaw rog e karbad ni kar chuchugurgad,
ni girdi’ ni dariy e ngiyal’ ni yad ma tay e motochiyel rom u gil’.
151 Machane gur, SOMOL, e ga bay u chireg
ma gubin e tin mog ni ngan rin’ e dabi m’ay bi’id.
152 Ke kakrom ni ku gu fil murung’agen e fanow rom;
ni mu ngongliy ni nge par ndariy n’umngin nap’an.
Ba Wenig ni fan ko Ayuw
153 Mu sap ko gafgow rog, ngam aywegeg,
ni bochan e dawor gu n’ag e motochiyel rom.
154 Mu rungrunguyeg ko oloboch rog, ngam pithig u puluwog;
mu ayuweg e pogofan rog, ni bod nim micheg.
155 Rogon ni ngan mat’aw e ba palog rok e pi’in kireb e leam rorad,
ni fan e darir folgad ko motochiyel rom.
156 Machane runguy rom, SOMOL, e rib ga’;
mu dag e kirban’ rom ngam aywegeg!
157 I gag e ba yo’or e to’ogor rog nge pi’in yad ma gafgow nigeg,
machane dagur pag i fol ko motochiyel rom.
158 Nap’an ni gu ra changar ko pi sasalap nem, mu gu sonogor,
ni bochan e darir rin’ed e tin ni kam ta’chiylen.
159 SOMOL, mu guy feni rib t’uf rog e fanow rom.
T’ufeg rom e der thil, ere mu ayuwegneg!
160 Yul’yul’ e ir e def ko motochiyel rom,
ma gubin e tin nib mat’aw ni ga be tiriggiliy e dariy n’umngin nap’an.
Fol ko Motochiyel rok SOMOL
161 Pi’in tolang e yad be cham ngog ni dariy tapgin,
machane gag e gu be tayfan e motochiyel rom.
162 Kar gu felfelan’ ni bochan e tin kam micheg,
ni felfelan’ ni bod be’ nike pir’eg e machaf.
163 Gub fananikay ma dabug urngin e sasalap,
machane motochiyel rom e ba t’uf rog.
164 Medlip yay u reb e rran ni gu ma pining e magaer ngom
ni fan ko tiriggil rom nib mat’aw.
165 Pi’in nib t’uf e motochiyel rom rorad e yad bay u lan e yoror ni dabi buch ban’en rorad,
ma dariy ban’en nrayag ni nge mulegrad.
166 SOMOL, gu be son nigem ni ngam mat’aw nigeg,
ma gu be rin’ e n’en kamog.
167 Gu be fol ko pi machib rom;
nib t’uf rog u polo’ i lanin’ug.
168 Gu be fol ko tin ka mu turguy nge fanow rom;
ga be guy urngin e tin gu be rin’.
Ba meybil ni man Ayuw
169 SOMOL, mu pag e meyor ni man ayuw rog nge yib ngom!
Ma ga pi’ ngog fare tamilngan’, ni bod nim micheg.
170 Mmotoyil ko meybil rog,
ma ga mat’aw nigeg ni rogon ni mu micheg.
171 Bay ug pining e sorok ngom ni gubin ngiyal’,
ni bochan e ga be fil ngog e pi motochiyel rom.
172 Bay u tangnag murung’agen e pi motochiyel rom,
ni bochan e tin mu turguy e go’ ba mat’aw.
173 Gubin ngiyal’ ma kam fal’eg rogom ni ngam ayuwegneg,
ni bochan e gu be folwok ko tin kamog.
174 A SOMOL, kargum’ ni bochan ni ngam mat’aw nigeg!
Gu be pir’eg e felfelan’ u lan e motochiyel rom.
175 Mu pi’ e yafos ngog, me yag nu gu pining e sorok ngom;
mang e ayuwegneg e fanow rom.
176 Gu be deraw ni bod ba saf nike malog;
are moy ngam changar nigeg, i gag e tapigpig rom,
ni bochan e dawor gu n’ag e motochiyel rom.
DRAFT VERSION — Proofreading in progress