TANG KO PITANG
Murung’agen e Re Ke Babyor Ney
Fare ke Babyor ni Tang Ko Pitang e bogi tang ni tangin e gamar, tin yo’or riy e thin rok be’ nib mo’on ngak be’ nib pin ni gamaren, nge thin rok fare pin ngak fare mo’on ni gamaren. Ku yima yog fithingan e re ke babyor ney ni Tang ku Solomon, ni bochan e aram fithingan ni Hebrew.
Pi tang ney u lanyan’ e girdi’ ni Jew e be dag rogon e tha’ u thilin Got nge girdi’ rok, ma lanyan’ e Kristiano e be dag rogon e tha’ u thilin Kristus nge Galasiya rok.
Gathon e Re Ke Babyor Ney
Bin m’on e Tang 1:1—2:7
Bin l’agruw e Tang 2:8—3:5
Bin dalip e Tang 3:6—5:1
Bin aningeg e Tang 5:2—6:3
Bin lal e Tang 6:4—8:4
Bin n’el e Tang 8:5–14
1
1 Bin th’abi fel’ e tang rok Solomon.
Bin m’on e tang
Fare Pin
2 Dep’ilugnam e ke tharayeg ko kiss;
adag rom e kabfel’ ko wayin.
3 Gasliw ni fel’, er bon dugum;
ra nog fithingam me yib ngan’uy.
Dariy reb e ppin nrayag rok ni tel ir ndabi adagem.
4 Mu fekeg nggu un ngom, ngad milgow nga darow;
ngam mmang pilung rog ma ga fekeg nga senggil rom.
Gadow ra felfelan’ u ta’bang,
ngad unumew ngad talubgow nga aer, ngad li’ew gadow ko adag.
Arfan ngay ni urngin e ppin ma ba adagem!
5 Pi’in ppin nu Jerusalem, gu ba lumor machane gub pidorang,
ni gub lumor ni bod e pi tent u daken e ted u Kedar,
machane fel’ngig e bod e kateng ko naun rok Solomon ni tafen e pilung.
6 Dab mu lik’ath ngog ni bochan rama’eg,
ya yal’ e ke butbut’ nigeg.
Pi pumo’on ni walageg e ra damumuwgad ngog
ra tedgag ko maruwel u milay’.
Ni dakriy e ngiyal’ ni nggu aywegneg.
7 Adag rog, mog ngog,
Bu uw e gin ni ngam waliy e gamanman rom ngay ngar abichgad?
Uw e gin yad ra gif ngay ko yal’ ni msiw’?
Mang ni ngar gu changar nigem u
fithik’ e yu ran’ i gamanman rok boch e tagafal gamanman?
Fare Mo’on
8 Th’abi pidorang u fithik’ e ppin, mog damnang ko uw?
Mman ngam lek fa ran’ i gamanman;
ngam pir’eg e gin nge abich e kaming rom riy
u charen fapi tent ko pi tagafal gamanman.
9 Gur, adag rog, e gama pug e fan ko pi pumo’on
ni bod ba os ni bpin nma tu’langnag e pi os ni pumo’on
nma girengiy e chariot rok Farao.
10 Piyan lolgem e rib fel’usun u daken linglingim
ma ke puf nga daken bilel’ugnam ni bod e churwo’.
11 Machane bay da ngongoliyew bikiyi chen ni fakam nib gol
ni bay e nunuw riy ni silber.
Fare Pin
12 Pilung rog e kethig nga daken e sofa rok,
ma florida rog e ke sugnag fithik’ e nifeng ko fel’ bon.
13 Adag rog e bfel’ bon dugun ni bod e myrrh
nib thig nga daken ngarngoreg.
14 En ni adag rog e bod e floras u mapan
ni be puf u lan e milay’ ni grape u Engedi.
Fare Mo’on
15 Adag rog, ri gab pidorang;
be gal ra’en e adag u lan marwam!
Fare Pin
16 Gamareg to’, ri gab picho’ay;
ni ri gama felfelan’ nigeg!
Pan ni galunglung e nge mang tagil’dow;
17 cedar e bay i mang ren e naun rodow,
ma gek’iy ni cypress e nge mang tenjo riy.
DRAFT VERSION — Proofreading in progress