1 Iwe, ämi chiechiei mi achengicheng, iei aruachön nei toropwe ngenikemi. Lon ekei ruochö toropwe üa sotuni ai üpwe amwökütü ekewe ekiek mi limöch lon letipemi ren ai achema ngenikemi ekei mettoch. 2 Üa mochen pwe oupwe chechemeni ekewe kapas ekewe soufos mi pin ra apasatä me lomlom, pwal ekewe allük me ren ach Samol me Chon Amanau nöümi kewe soukünö ra aronga ngenikemi. 3 Me mwen mettoch meinisin oupwe fokun weweöchiti pwe lon ekewe ränin lesopolan ekoch aramas repwe pwä, manauer a nonom fän nemenien püsin ar mocheniangau. Repwe takirikemi ✡Jut 18 4 o apasa, “A pwon pwe epwe liwinsefälito. Iwe, met, ia a nom ie? Semelapach kewe ra fen mäla, nge ekewe mettoch meinisin ra ususur we chök seni ewe fansoun Kot a föri fanüfan.” 5 Ra apasa ei pokiten ra mochen manlükala pwe ren än Kot kapas läng me fanüfan ra fis. Fanüfan a fis seni koluk o pwal ren koluk. ✡Ken 1.6-9 6 Iwe, pwal ren koluk, iei kolukun ewe noter, ewe fanüfan me lomlom a tala ren. ✡Ken 7.11 7 Nge ekewe läng me ei fanüfan mi nom iei ra iseis ren ewe chök kapasen Kot pwe repwe tala ren ekkei. Ra nonom tori ewe rän, lupwen ekewe aramas resap meniniti Kot repwe küna kapwüng me mäla.

8 Ämi chiechiei mi achengicheng, ousap manlükala ei mettoch! Esap wor sokofesenin eu rän me engeröü ier me ren ewe Samol, eu rän me engeröü ier ra wewefengen me ren. ✡Kölf 90.4 9 Ewe Samol esap mang le apwönüetä an pwon usun ekoch ra ekieki, pwe a mosonotam ngenikemi, pun esap mochen pwe eman epwe pöütmwälila, nge a fen mochen pwe meinisin repwe ekieksefäl.

10 Nge ränin ewe Samol epwe war usun eman chon solä. Lon ewe rän läng epwe morola ren püngün chopulap o minen läng repwe karala o tala, nge fanüfan me meinisin mine a nom lon resap chüen nom. ✡Mat 24.43; Luk 12.39; 1.Tes 5.2; Pwär 16.15 11 Pokiten ekei mettoch meinisin repwe tala lon ei lapalap, met sokun aramas oupwe usuni? Oupwe manaueni eu manau mi pin mi nonom fän nemenien Kot, 12 lupwen oua witiwiti ewe Ränin Kot o achocho ngeni tori epwe müttirito. Iei ewe Rän lupwen ekewe läng repwe karala o tala o minen läng repwe telila ren pwichikar. 13 Nge usun än Kot pwon sia witiwiti eu läng mi fö me eu fanüfan mi fö ia pwüng epwe chöchöla ie. ✡Ais 65.17; 66.22; Pwär 21.1

14 Iei mine, ämi chiechiei mi achengicheng, pokiten oua witiwiti ei Rän, oupwe fokun achocho ngeni pwe oupwe limöch, pwe esap wor ämi mwäl mwen mesen Kot, nge oupwe pwal nom lon kinamwe. 15 Oupwe ekieki usun ei, pwe ren mosonotamen ach Samol oua küna manau, usun chök pwiich we mi achengicheng Paulus a mak ngenikemi ren ewe tipachem Kot a fang ngeni. 16 Iei met a apasa lon makkean kewe toropwe meinisin, lupwen a makkei usun ekei mettoch. A wor ekoch mettoch lon an kewe toropwe ra weires pwe aramas repwe weweiti, pwe aramas mi tiparoch me tipewilikis ra awewemwäli. Iei usun mine ra pwal föri ren ekoch wokisin mi mak lon ekewe Toropwe mi Pin. Ren ei ra püsin atoto wor feiengau.

17 Iwe, ämi chiechiei mi achengicheng, oua fen silei ei. Iei mine oupwe mamasakemi, pwe ousap tokola ren ekewe afalafal mi mwäl än ekewe aramas mi ngau, ousap pwal tur seni leniemi mi nükünük. 18 Nge oupwe chök mämäritä lon än ach Samol me Chon Amanau Jesus Kraist ümöümöch me silelap. I epwe ling ikenai tori feilfeilachök. Amen.