1 Gafgow gimed! Ya gimed be ngongliy bogi motochiyel nde mat’aw ni be gafgownag e girdi’ rog. 2 Aray rogon ni gimed ma taleg e pi’in gafgow u mat’awrad nge tin bfel’ ngorad. Ma arogon ni gimed ma leag e gayog rok e pi’in ke yim’ figirngirad nge pi’in kanim’ rorad. 3 Mang e gimed ra rin’ ko ngiyal’ ni nge gechig nagmed Got? Ma ba mang e gimed ra rin’ ko ngiyal’ nra girengiy e riya’ u reb e nam nga dakenmed? U uw e gimed ra mil ngay ni ngam pir’egged e ayuw riy? Ma uw e gin gimed ra mithag talinmed ngay? 4 Bay ni li’med ngam m’ad u fithik’ e mael ara ni girngiymed i yan ni gimed ba kalbus. Ma damumuw rok SOMOL e daworimus; ma pa’ e bayi par ni ka ba k’iy ni nge gechig.

5 I SOMOL e ga’ar, “Gu tay yu Assyria nib dumow rog ni nggu gechegnag e pi’in ku gu damumuw ngak. 6 Gu l’oeg yu Assyria ni ngar maelgad ngak e nam ndarir liyorgad ngak Got, ni girdi’ ni yad ma k’aring e damumuw ngog. Gu l’oegrad ni ngar feked u yargel e chugom miyad mororo’ miyad yotyot e girdi’ nga but’ ni bod rogon e rungdu’ u lan e kanawo’.”

7 Machane emperor nu Assyria e bay e n’en nike tanomnag u lanyan’ nib almarin. Ke mu’ i leamnag rok ni nge gathay bo’or e nam. 8 Ya i ufanthin ni ga’ar, “Gubin e ga’ ko salthaw rog ma ba pilung! 9 Kug kol e pi nug nu Kalno nge Karkemish, nge pi binaw nu Hamath nge Arpad. Kug kol yu Samaria ngu Damaskus. 10 Kug ganam ni nggu gechignag fapi nam ni yad ma tayfan e liyos, liyos nib yo’or ko tinu Jerusalem ngu Samaria. 11 Kug gothogthay yu Samaria nge urngin e liyos riy, ma ku aray rogon ni gu ra rin’ nga Jerusalem nge ya’an bogi ban’en ni kan toy ni yima tayfan u rom.”

12 Machane Somol e ga’ar, “Nap’an ni gu ra mu’nag e n’en gu be rin’ ko Burey ni Zion ngu lan yu Jerusalem, ma bay gu gechignag e emperor nu Assyria ni bochan e ufanthin nge tolngan’ rok.”

13  Emperor nu Assyria e ufanthin nge ga’ar, “Yigo’ gag e ku gu ngongliy urngin e pin’ey. Ya gub madangdang ni gub gonop ma gub llowan’. Ku gu thirif ke chuw e pi mathil u thilin e pi nam ma kug fek e pi chugom rorad. Kug yot’yotrad nga but’ ni bod ba garbaw ni pumo’on e pi’in yad ma par u rom. 14 Pi nam u fayleng e yad bod rogon ba tafen e arche’, ku gu kunkunuy e pi fla’ab rorad ni bod feni mom i kunuy e tamango ko arche’. Dariy ba pon e arche ni furfuruy ni gu tamdag ngay; dariy reb e arche’ ni fal l’ugun ni nge tolul ngog.”

15 Machane me ga’ar SOMOL, “Rayag ni nge ga’ar bang i tow i ir e ba ga’ boch ko en nma maruwel ngay? Ba ga’fan ba glayoch ko en nma glayoch? Dar ma chibiy baley i gul be’ ngalang, ya en nma maruwel ngay e ma chibiy ngalang.”

16 I SOMOL ni Gubin ma Rayag Rok e nge pi’ e m’ar ni nge gechignag e salthaw rok, ni gowalngin e gowal u dakenrad e be yik’. 17 Got, ni fare tamilang rok yu Israel, e bayi ngal’ ni nifiy. Got nthothup nu Israel e bayi ngal’ ni daramram, nu lan ta’reb e rran me urfiy urngin ban’en, ni mus ko rachngal nge pan ni makankan. 18 Pi loway nib chap ko gek’iy nge yungi milay’ nib yong’ol e bayi mogothgoth, nib ta’reb rogon ko m’ar ni ubchiya’ nma thangey. 19 In kaen e gek’iy e ra magach ni mus ngab bitir nrayag ni nge the’eg.

20 Bayi taw nga bangiyal’ ni girdi’ nu Israel ni magach nib fos e bay dab ku ra toergad ko fare nam ni chugur ni nge thang owcharad. Bayi mang SOMOL e lagan’ rorad, ni fare Got nthothup nu Israel. 21 Bochu’uw e girdi’ nu Israel nra sul ngak e Got rorad nib gel gelngin. 22 Ni yug aram rogon ni chiney ni gathi blich e girdi’ nu Israel ni bod e yan’ u pe’lay, ma buchu’uw i yad e bayi sul. Riya’ e kan ayuweg ni fan ko girdi’, nri bay tapgin ni nge aw ngorad. 10:22–23 Rom 9:27 23 Aram rogon, ga’ngin yang e re nam nem, ma SOMOL ni Th’abi Tolang ni Gubin ma Rayag Rok e ra fek e riya’ i yib ngay, nri bod rogon ni yog nra rin’.

24 I SOMOL ni Th’abi Tolang ni Gubin ma Rayag Rok e be ga’ar ko girdi’ rok ni yad ma par u Zion, “Dab mu dugowgad ngak yu Assyria, ni yug aram rogon ni yad be gafgow nagmed ni bod ni i rin’ yu Egypt. 25 Dabki n’uw nap’an ma bay gu lebuguy e gechig romed, ma aram e bay gu thirifrad u but’. 26 I Gag, SOMOL ni Gubin ma Rayag Rok, e bay gu toyrad ko dumow rog ni bod rogon ni gu rin’ ko girdi’ nu Midian ko fare War nu Oreb. Gu ra gechignag yu Assyria ni bod ni gu gechignag yu Egypt. 27 Ra taw ko chingiyal’nem, ma gu ra pithigmed u tan gelngin yu Assyria, ma mat’ rorad e dabki tomal nga pomed.”

28 Meb e salthaw ni to’ogor rorad ngar koled e binaw nu Ai. Ranod u lan yu Migron, miyad cha’riy e chugom rorod u Mikmash! 29 Ra thumurgad ko fare wo’ ni wa’ich’ich miyad toffan reb e nep’ u Geba. Ma girdi’ nu lan fachi binaw nu Ramah e rrusgad, ma girdi’ nu lan e binaw rok i Saul ni Pilung u Gibeah e ra milgad. 30 Me tolul e girdi’ nu Gallim! Me mmotoyil e girdi’ nu Laishah! Me fulweg e girdi’ nu Anathoth! 31 Girdi’ nu Madmenah nge yu Gebim e ra milgad ni ka ra feked e pogofan rorad nga pa’rad. 32 Ma daba’ e pi to’ogor e yad bay u lan fachi binaw nu Nob, nu rom e yad be furuy e tug rorad ko Burey ni Zion ni bay ko binaw nu Jerusalem.

33 I SOMOL ni Gubin ma Rayag Rok e bayi pirdi’iyrad nga but’ ni bod papa’ngin e gek’iy nthab u lang. Yu kan nth’abi tolang ma th’abi uf uf e bay ni th’ab nga but’ ngan sobut’nag. 34 I SOMOL e ra th’abrad nga but’ ni bod e gak’iy u lukngun e loway nni th’ab ko tow, ni ta’reb rogon ko pi gak’iy thabi fel’usun u Lebanon ni thig nga but’.