11
Ba nam nib gapas
1 Pi’in owchen David ni uranod nga luwan nguur pilunggad e yad bod ba ke gek’iy ni kan toy; machane rogon ba noef ni thay ko ley nike magey u fithik’ e but’, e aram rogon ba pilung ni bay yib u fithik’ e pi’in owchen David. Rev 5:5; 22:16
2 Fare kan nthothup rok SOMOL e bayi pi’ e gonop ngak,
nge llowan’ nge salap ni nge maruwel ngay ngi i gagiyegnag e tirok e girdi’ ngay.
Bayi nang e tin nib m’agan’ SOMOL ngay mi i par ni bay madgun u wan’,
3 mi i felan’ ko pigpig ni be tay ni be fol rok.
Dabiyag ni turguy e n’en ni ngan rin’ ngak be’ ni bochan usun fa’anem ara tin ke rung’ag ni murung’agen;
4 ra pithig e oloboch rok e pi’in gafgow nrogon nib mat’aw
me n’ufeg mat’wun e pi’in dariy ban’en nrayag rorad.
Yug ra pag lungun min gechignag e pi nam,
me yim’ e pi’in kireb.
5 Bayi gagiyegnag e tirok e girdi’ nrogon nib mat’aw ma ba yal’uw.
6 Pi gamanman ni wolf nge saf e bay ur pired ni bfel’ thilrad,
ma gamanman ni leopard e bay ra paged yad nga but’ u fithik’ pifak e kaming.
Pifak e garbaw nge pifak e layon e bay ur abichgad u ta’bang,
ma bbitir ni ka ba’achig e bay i chathowoliyrad.
7 Garbaw nge gamanman ni bear e bay ur abichgad u ta’bang,
ma pifakrad e bay ur pired u ta’bang ni bfel’ thilrad.
Pi layon e bay ur ked e pan ni bod e garbaw.
8 Mus ko bitir ni ka ba’achig ndabi buch ban’en rok
ni fa’anra i fafal nib chugur ngak ba porchoyog ni bay e yub u l’ugun.
9 Zion, burey nib thothup rok Got
e ra par ndariy e kireb riy ara ban’en nra maad’ad ngak be’.
Ma girdi’ ko nam e ri bayi tamilangan’rad u murung’agen SOMOL
ni bod rogon lan e yungi day nib sug ko day.
Girdi’ ni kalbus u wuru’ e nam nra sul
10 Ra taw nga reb e rran me yib be’ nib pilung ko ganong rok Davib nib be’ech ni nge mang pow ngak e pi nam. Yad ra mu’ulung ngalan fare binaw ni pilung ngar tedfan. Rom 15:12 11 Rofen nem, e ra maruwel Somol nga gelngin nge fulweg e girdi’ rok nga tabinaw, ni pi’in nra magachgad u Assyria ngu Egypt, u lan fare nam nu Pathros ngu Sudan, ngu Elam, ngu Babylonia, ngu Hamath, nge pi binaw u charen e day nge pi donguch u lan e day. 12 I Somol e bay i n’uf bang i flak ngalang ni nge dag ko pi nam ni be kunkunuy bayay nga ta’bang fapi girdi’ nu Israel ngu Judah nra werwergad ko fa aningeg i tabthung ko fayleng. 13 Fare nam nu Israel e bay dabki awanrad ngak yu Judah, ma yu Judah e bayi par ni gathi kuyad e to’ogor rok yu Israel. 14 Ma bay ra chagil gow ngar togopluwgow ngak yu Filistia ko ngal miyad fek u yargal e chugom ko girdi’ nma par ko ngek. Miyow gal ko girdi’ nu Edom ngu Moab, me par e girdi’ nu Ammon ni yad be fol rorow. 15 Bayi mliknag SOMOL lan fare Nguy ni Suez, ma ra pi’ e nifeng nib guwal nge mliknag e lul’ ni Eufrates, kemus ni medlip pa’ e lul’ nib achig e pag nrayag ni nge yan be’ u barba’ nga barba’. 16 Ra sum bpa’ i kanawo’ nib k’iy u Assyria ni fan ngak e girdi’ rok nu Israel nra magachgad u rom, ni ku bod fare pa’ i kanawo’ nib k’iy ni fan ngak e pi chitamangirad nap’an rchuwgad u Egypt.
DRAFT VERSION — Proofreading in progress