1 “Iwe, ämi nöün ewe Samol mi Lapalap ämi we Kot. Iei mine ousap nekelekelei inisimi ika reipöpöla möküremi, lupwen oua letipeta ren eman mi mäla. ✡Lif 19.28; 21.5 2 Pun ämi eu mwichen aramas mi pin fän iten ewe Samol mi Lapalap ämi we Kot. I a afilikemi me lein ekewe mwichen aramas meinisin mi nom won fanüfan, pwe oupwe nöün aramas.” ✡Eks 19.5-6; Tut 4.20; 7.6; 26.18; Tit 2.14; 1.Pet 2.9

3 “Iwe, ousap ochoch man mi anioput me ren ewe Samol mi Lapalap. 4 Ikkei ekewe man oua tongeni ochoch: Kow, sip me kuuch, 5 chia me sokopaten chia iter kasele me ropak, kuuch mi mwacho, pwal sokun kuuch mi mwacho itan ipeks, ewe man itan antelop me sip mi nom won chuk. 6 Iteiten man meinisin mi keang kün pachapacher, ra pwal lülüsefäli ener, oupwe ochoch. 7 Nge seni me lein ekewe man mi lülüsefäli ener ika keang kün pachapacher ousap ochoch: kamel, üsangi, ewe man itan pacher mi nom won achau. Pokiten ra lülüsefäli ener, nge esap keang kün pachapacher, repwe limengau ngenikemi. 8 Iwe, ewe pik epwe pwal limengau ngenikemi, pokiten a keang kün pachapachan, nge esap lülüsefäli anan. Ousap ochoch fituker, ousap pwal atapa ekewe man, lupwen ra mäla.

9 Iwe, ekewe ik meinisin mi nom lon koluk ika leset a wor ililir me töröüner oua tongeni mongö. 10 Nge ekewe mönümanau meinisin esap wor ililir me töröüner ousap mongö, pun repwe limengau ngenikemi.

11 Oua tongeni ochoch machang meinisin mi limöch. 12 Nge ikkei ir ekewe machang ousap ochoch: Ikel me sokopaten ikel iter wolcher me osprei, 13 ekewe machang iter pusar me sokopaten machang iter falkon, 14 iteiten sokopaten ängä, 15 ewe machang itan ostrich, kawakawen lepwin, nipöüwanei me sokopaten kawakaw, 16 kükün fuküro me watten fuküro, niaüpinik, 17 ekewe machang iter pelikan, karion, wolcher me kormoran mi usun chök niwanök, 18 öröpwech pwal sokopaten örö, ewe machang itan hupo me pöüte. 19 Iwe, ekewe kükün man meinisin mi äkkäs repwe limengau ngenikemi. Ousap fokun ocheer. 20 Nge ekewe kükün man mi limöch oua tongeni ocheer meinisin.

21 Iwe, ousap ochoch man mi püsin mäla. Oua tongeni ngeni ewe chon ekis mi nom lon ämi kewe telinimw pwe ochan. Oua pwal tongeni amömö ngeni eman chon siamü. Pun ämi eu mwichen aramas mi pin fän iten ewe Samol mi Lapalap ämi we Kot.

Iwe, ousap kukuw eman apanen kuuch lon chönün oupwun ewe inelap.” ✡Eks 23.19; 34.26

22 “Iwe, oupwe aimwüela eu leengolun uän fotämi irä meinisin iteiten ier. 23 Mürin oupwe feila ren ewe leni ewe Samol mi Lapalap ämi we Kot epwe filätä pwe aramas repwe fel ngeni ie. Ikenan oupwe mongö ewe eu leengolun uän fotämi wiich o ünümi ewe eu leengolun ünümemi wain. Oupwe pwal eäni ewe eu leengolun ämi apüra o ochei mweinöün nöümi kow me sip fän mesan. Iei usun oupwe kaiö pwe oupwe meniniti ewe Samol mi Lapalap ämi we Kot iteiten fansoun. 24 Iwe, lupwen ewe Samol mi Lapalap a afeiöchükemi, nge esap ki ngenikemi le uwala ämi eu leengol ren ewe leni ewe Samol mi Lapalap ämi we Kot epwe filätä pwe aramas repwe fel ngeni ie, pun a kon toau senikemi, nge ewe al a kon langatam ngenikemi, 25 mürin oupwe akasiwili ewe eu leengol ngeni moni. Iwe, oupwe angei ewe moni o uwala ren ewe leni ewe Samol mi Lapalap ämi we Kot epwe filätä. 26 Ikenan oupwe kamö won ewe moni ngeni mine oua mochen. Oua tongeni kamö kow ika sip ika wain ika sokopaten minen ün ika mine oua chök mwoneiti. Iwe, oupwe mongö o pwapwa ikenan fän mesen ewe Samol mi Lapalap ämi we Kot, ämi me chon leimwemi. 27 Nge ousap manlükala chon ewe ainangen Lefi mi nom lon ämi kewe telinimw, pun esap wor fanüer me wiser leimi.

28 Iwe, amüchülan iteiten ülüngat ier oupwe uwato ämi kewe eu leengol meinisin seni uän fotämi irä lon ewe chök ier o iseis lon ämi kewe telinimw. 29 Ei mongö epwe fän iten chon ewe ainangen Lefi, pun esap wor fanüer me wiser leimi. Epwe pwal fän iten ekewe chon ekis, ekewe mi mäsen me ekewe fefin mi mä pwülüer mi nom lon ämi kewe telinimiw. Repwe feito o mongö tori repwe möt. Are oua föri iei usun, ewe Samol mi Lapalap ämi we Kot epwe afeiöchü angangen pöümi meinisin.” ✡Lif 27.30-33; Num 18.21