1 Iwe, ewe Samol mi Lapalap a ngeni Moses 2 ekei allük fän iten ekewe aramasen Israel: Are eman aramas a eäni pwon ngeni ewe Samol mi Lapalap eman aramas, ewe aramas epwe tongeni kepichila seni ewe pwon, are ewe mi eäni ewe pwon epwe mönätiu ükükün liwinin aüchean. 3 Iwe, ükükün liwinin aüchean eman mwän seni ier rüe tori wone epwe lime föün moni silifer, nge epwe för won ewe kilo ra aea le aükük lon ewe imw mi pin. 4 Nge are ewe aramas eman fefin, ükükün liwinin aüchean epwe ilik föün moni silifer. 5 Iwe, are ewe aramas a lefilen ier limu tori rüe, ükükün liwinin aüchean epwe rüe föün moni silifer fän iten eman ät, nge engol föün moni silifer fän iten eman nengin. 6 Nge are ewe aramas a lefilen eu maram tori limu ier, ükükün liwinin aüchean epwe limeföü föün moni silifer fän iten eman ät, nge ülüföü föün moni silifer fän iten eman nengin. 7 Iwe, are ewe aramas a ierini wone feitä, ükükün liwinin aüchean epwe engol me limeföü föün moni silifer fän iten eman mwän, nge engol föün moni silifer fän iten eman fefin. 8 Nge are eman aramas a wöüngau pwe esap tongeni mönätiu ükükün liwinin aüchean ewe aramas a eäni pwon won, epwe emwenato ewe aramas fän mesen ewe souasor. Iwe, ewe souasor epwe aüküsefäli liwinin aüchean, nge epwe alongolong won ükükün tufichin ätewe a eäni ewe pwon.

9 Are eman a eäni pwon eman man me lein ekewe sokun man aramas ra eäni asor ngeni ewe Samol mi Lapalap, ekei man meinisin aramas ra fangala ngeni ewe Samol mi Lapalap ra pin. 10 Iwe, ätewe esap tongeni akasiwili ewe man ngeni pwal eman, esap pwal tongeni akasiwili eman mi öch ngeni eman mi ngau ika eman mi ngau ngeni eman mi öch. Nge are a akasiwili eman man ngeni eman, ewe man a angei akom me akasiwilin we repwe pin me ruoman. 11 Nge are a eäni pwon eman man mi limengau esap tufich an epwe eäni asor ngeni ewe Samol mi Lapalap, ewe aramas epwe uwato ewe man fän mesen ewe souasor. 12 Iwe, ewe souasor epwe filätä ika men lapalapöch ika men lapalapangau. Nge ükükün aüchean mine ewe souasor epwe aükü ngeni epwe chök ina. 13 Nge are ewe aramas a mochen mönisefäli ewe man, epwe pacheetä eu lelimu ngeni ükükün liwinin aüchean ren moni.

14 Iwe, are eman aramas a fangala imwan pwe epwe pin fän iten ewe Samol mi Lapalap, ewe souasor epwe aükü ükükün liwinin aüchean ewe imw o filätä ika men öch ika men ngau. Nge ükükün mine ewe souasor epwe aükü ngeni epwe chök ina. 15 Nge are ätewe mi fangala imwan ngeni Kot a mochen mönisefäli, epwe pacheetä eu lelimu ngeni ükükün liwinin aüchean ewe imw ren moni. Mürin epwe pwal imwenisefäli.

16 Iwe, are eman aramas a fangala eu kinikin seni fanüan me won saman ngeni ewe Samol mi Lapalap, ükükün liwinin aüchean epwe alongolong won ükükün mine a tongeni fotutiu won. Iwe, ükükün liwinin iteiten wone paun föün parli a tongeni fot won epwe engol föün moni silifer. 17 Are ewe aramas a fangala fanüan ngeni Kot lon ewe ierin supili, ükükün liwinin aüchean epwe unus. 18 Nge are a fangala fanüan mürin ewe ierin supili, ewe souasor epwe aükü ükükün liwinin aüchean, nge epwe alongolong won ükükün fitu ier mi chüen nom tori ewe ierin supili me mürin. Iwe, ükükün liwinin aüchean epwe kotur won ükükün ekewe ier ra fen wes. 19 Iwe, are ätwe mi fangala ewe fanü ngeni Kot a mochen mönisefäli, epwe pacheetä eu lelimu ngeni ükükün liwinin aüchean ewe fanü ren moni. Mürin epwe pwal fanüenisefäli. 20 Nge are esap mochen mönisefäli ewe fanü, ika a amömöla ngeni eman, esap chüen wor an pwüng won me mürin. 21 Are ewe fanü a pichila lon ewe ierin supili, ei fanü epwe pin fansoun meinisin usun chök eu fanü a fen pin fän iten ewe Samol mi Lapalap. Iwe, ewe souasor epwe fanüeni. 22 Nge are eman a fangala ngeni ewe Samol mi Lapalap eu fanü sap fanüan me won saman pwe a möni, 23 ewe souasor epwe aükü liwinin aüchean seni fansoun än ewe aramas fangala tori ewe ierin supili. Iwe, ewe aramas epwe mönätiu ükükün liwinin aüchean mi kaük lon ewe chök rän. Ei moni a fän iten ewe Samol mi Lapalap. 24 Nge lon ewe ierin supili ewe fanü epwe liwiniti ätewe mi amömöla, pun fanüan me won saman. 25 Iwe, iteiten aükükün liwinin epwe för won ewe kilo ra aea le aükük lon ewe imw mi pin.

26 Iwe, esap wor eman a tongeni fangala ngeni Kot eman mweinöün nöün man pwe an asor seni püsin letipan, pun a fen nöün ewe Samol mi Lapalap. Ese lifilifil ika ätemwänin kow ika sip, ir nöün ewe Samol mi Lapalap. 27 Nge are ewe man eman mweinöü me lein ekewe man mi limengau, ätewe nöün ewe man a tongeni mönisefäli won ükükün liwinin aüchean a fen kaük ngeni, nge epwe pacheetä eu lelimu ngeni. Nge are esap mönisefäli, repwe amömöla ewe man won ükükün liwinin aüchean a fen kaük ngeni.

28 Nge are eman aramas a apini och mettoch seni mine an fän iten ewe Samol mi Lapalap pwe epwe katala, ese lifilifil ika eman aramas ika nöün man ika fanüan me won saman, esap tufich an epwe amömöla are mönisefäli. Iteiten mettoch mi pin pwe repwe katala ra unusen pin fän iten ewe Samol mi Lapalap. ✡Num 18.14 29 Eman aramas mi apinipin pwe epwe kärila esap tufich pwe epwe mösefäl, nge epwe ninnila.

30 Iwe, ämi leengol meinisin seni ewe fanü, ese lifilifil ika föün irän wiich mi mär won pwül ika uän sokopaten irä, än ewe Samol mi Lapalap. Ekewe leengol meinisin ra pin fän iten ewe Samol mi Lapalap. 31 Nge are eman aramas a mochen mönisefäli eu kinikin seni an leengol, epwe mönätiu ükükün liwinin, nge epwe pwal pacheetä eu lelimu ngeni. 32 Iwe, eu leengol seni ekewe kow me sip meinisin, iteiten engolun man meinisin mi alea repwe pin fän iten ewe Samol mi Lapalap. 33 Esap wor eman epwe eiipöni ika ewe man a mürina ika a ngau, esap pwal akasiwili ngeni eman. Nge are a akasiwili ewe man ngeni eman, ewe man a fen nom me akasiwilin we repwe pin me ruoman, nge esap wor eman a tongeni mönisefäliir. ✡Num 18.21; Tut 14.22-29

34 Iwe, ikkei ekewe allük ewe Samol mi Lapalap a ngeni Moses fän iten ekewe aramasen Israel me won ewe chuk Sinai.