1 Iwe, ewe Samol mi Lapalap a üreni Moses, 2 “Oupwe apini fän itei ekewe mwänichi meinisin. Iwe, meinisin mine a akomwen uputiu lein aramas me man lon Israel nei.” ✡Num 3.13; Luk 2.23

3 Iwe, Moses a üreni ekewe aramas, “Oupwe chechemeni ei rän, ewe rän oua towu seni Isip, ewe leni ia ra nöünikemi amanau ie. Pun lon ei rän ewe Samol mi Lapalap a emwenikemiiwu ren pöün mi manaman. Ousap mongö pilawa mi wor iis lon. 4 Pun lon ei rän fän ewe maram Apip *Ei maram Apip a seni lukalapen Mas tori lukalapen April oua towu seni Isip. 5 Iwe, lupwen ewe Samol mi Lapalap epwe emwenikemiilong lon ewe fanüen chon Kanaan, chon Hit, chon Amor, chon Hiw me chon Jepus, ewe fanü i a pwon fän akapel ngeni ämi kewe lewo pwe epwe ngeniir, eu fanü mi pwülüöch me fanüeräs, oupwe föri ei angang iteiten ier lon ei chök maram. 6 Oupwe mongö pilawa esap wor iis lon lon ükükün fisu rän, nge lon ewe afisuen rän oupwe föri eu chulap ngeni ewe Samol mi Lapalap. 7 Oupwe fokun mongö pilawa esap wor iis lon lon ükükün fisu rän. Esap wor pilawa mi wor iis lon epwe pwä remi, esap pwal wor iis epwe pwä lon leniemi meinisin. 8 Lon ewe rän oupwe awewei ngeni en me nöün mwän, ‘Iei achechemenien usun mine ewe Samol mi Lapalap a föri ngeniei, lupwen üa towu seni Isip.’ 9 Ei epwe usun chök eu asisil won pöümi pwal eu pisekin achem won chamwemi, pwe oupwe chök leaweni än ewe Samol mi Lapalap kewe allük. Pun ewe Samol mi Lapalap a emwenikemiiwu seni Isip ren pöün mi manaman. 10 Iei mine oupwe föri pwüngün ei angang iteiten ier, lupwen a tori fansoun.”

11 “Iwe, lupwen ewe Samol mi Lapalap epwe emwenikemiilong lon ewe fanü Kanaan o fang ngenikemi ewe fanü usun a fen pwon fän akapel ngenikemi me ämi kewe lewo, 12 oupwe aimwüela fän iten ewe Samol mi Lapalap ät meinisin mi akomwen uputiu. Ekewe ätemwänin man meinisin mi akomwen uputiu repwe nöün ewe Samol mi Lapalap. ✡Eks 34.19-20; Luk 2.23 13 Iwe, iteiten ätemwänin aas meinisin mi akomwen uputiu epwe akasiwil ngeni eman lam. Nge ika ousap mochen akasiwili, oupwe kupi üen ewe aas. Iteiten eman me eman mwänichi me lein nöümi mwän oupwe möni. 14 Nge ika nöümi mwän repwe aisinikemi lon kan rän mwach, ‘Met wewen ei föför?’, oupwe üreniir, ‘Ewe Samol mi Lapalap a emwenikeemiwu seni Isip ren pöün mi manaman, ewe leni ia ra nöünikem amanau ie. 15 Pun lupwen Farao a tipeförea ren an esap mochen mwüt ngenikem pwe aipwe feila, ewe Samol mi Lapalap a niela mwänichien ewe fanü Isip meinisin, mwänichien aramas me mweinöün man. Iei mine aia eäni asor ngeni ewe Samol mi Lapalap ätemwänin man meinisin mi akomwen uputiu. Nge ekewe mwänichien lein nöüm mwän aia möni.’ 16 Ei epwe usun chök eu asisil won pöümi pwal eu pisekin achem won chamwemi. Pun ewe Samol mi Lapalap a emwenikichewu seni Isip ren pöün mi pöchökül.”

17 Iwe, lupwen Farao a mwüt ngeni ekewe aramas pwe repwe towu seni Isip, Kot esap emwenirela won alen fanüen chon Filistia, inamwo ika a mochomoch. Pun Kot a apasa, “Eli ekewe aramas repwe ekieksefäl o liwiniti Isip, lupwen epwe toriir maun.” 18 Iei mine Kot a emwenirela lükün ewe fanü won efoch al mi alelong lon fanüapö tori ewe Setipar. Iwe, ekewe aramasen Israel ra towu seni Isip fän ar pisekin maun. 19 Nge Moses a uwei chün Josef usun i a tüngorei ekewe aramasen Israel repwe pwon fän akapel pwe repwe uwei chün. Pun Josef a apasa, “Kot epwe fokun alisikemi, nge lupwen oupwe towu, oupwe uwei chüi seni ikei.” ✡Ken 50.25; Jos 24.32 20 Iwe, ekewe chon Israel ra feil seni Sukot o tori Etam mi nom ünükün ewe fanüapö. Ikenan ra asösö. 21 Nge ewe Samol mi Lapalap a akakom mwer. A emweniir won aler lerän ren eu ürekuchu, nge lepwin ren eu üreekkei pwe epwe ngeniir saram. Iei usun ra tongeni sai lerän me lepwin. 22 Ewe ürekuchu esap feil seni ekewe aramas lerän, pwal ewe üreekkei esap feil seniir lepwin.