1 Iwe, ewe Samol mi Lapalap a üreni Moses, 2 “Kopwe üreni ekewe aramasen Israel pwe repwe liwinsefäl o asösö sasape ngeni Pihahirot lefilen Miktol me ewe Setipar. Iwe, repwe asösö arun ewe Setipar akawenewenen Paalsefon. 3 Pun Farao epwe ekieki pwe ekewe aramasen Israel ra rukola lon ewe fanü o mwöchülong lon fanüapö. 4 Iwe, ngang üpwe aföreai letipen Farao pwe epwe tapweriir. Pun üpwe alinga itei won Farao me nöün mwicheichen sounfiu, pwe chon Isip meinisin repwe silei pwe ngang ewe Samol mi Lapalap.” Iwe, ekewe chon Israel ra föri iei usun. 5 Iwe, lupwen ra apworausa ngeni ewe kingen Isip pwe ekewe aramasen Israel ra sü, Farao me nöün kewe nöüwis ra siwili ar ekiek fän iter. Ra apasa, “Met ei sa föri? Pwota sa mwüt ngeni ekewe chon Israel pwe ra towu seni ar angang ngenikich?” 6 Iei mine Farao a anükünükü wan woken me oris o emwichato nöün sounfiu. 7 A nuki wonopükü woken me oris mi nükünüköch, pwal meinisin lusun wokenin me orisin Isip, nge a wor eman meilap won iteiten efoch me efoch. 8 Nge ewe Samol mi Lapalap a aföreai leluken Farao ewe kingen Isip, pwe a tapweri ekewe aramasen Israel, lupwen ra töpworawu. 9 Iwe, ewe pöisein Isip meinisin wän Farao oris me woken, fiti sounfiu mi wawa oris me sounfiu mi fetal ra tapweriir o toriir, lupwen ra asösö arosetin Pihahirot akawenewenen Paalsefon.

10 Lupwen Farao a arap ngeniir, ekewe aramasen Israel ra chimwätä o küna pwe ekewe chon Isip ra telito müriir. Iwe, ra fokun niuokus o siö ngeni ewe Samol mi Lapalap. 11 Ra üreni Moses, “Ifa usun, esap wor lenien peias lon Isip, pwe ka emwenikeemiwu pwe aipwe mäla lon fanüapö? Pwota ka föri iei usun ngenikem pwe ka emwenikeemiwu seni Isip? 12 Esap iei usun mine äm aia ürenuk me Isip, pwe kopwe chök likitikeemila pwe aipwe angang ngeni ekewe chon Isip? Pun epwe fen mürina ngenikem pwe ekewe chon Isip repwe nöünikem amanau, lap seni äm aipwe mäla lon fanüapö.” 13 Nge Moses a üreni ekewe aramas, “Ousap niuokus, oupwe üpos o nengeni usun än ewe Samol mi Lapalap amanauakemi ikenai. Pun ekewe re Isip oua küneer ikenai, ousap chüen künasefäliir. 14 Ewe Samol mi Lapalap epwe fiu fän itemi, nge ämi oupwe chök fanafanala.” 15 Mürin, ewe Samol mi Lapalap a üreni Moses, “Pwota ka siö ngeniei? Kopwe üreni ekewe aramas pwe repwe chök feila mwer. 16 Iwe, en kopwe aitietä wokum o aitiela poum won ewe sät pwe kopwe kinifeseni, pwe ekewe aramasen Israel repwe fetal won pwasapwas epin ewe sät. 17 Nge ngang üpwe aföreai letipen chon Isip pwe repwe tapwelong müriir. Iwe, üpwe alingaei won Farao me nöün mwicheichen sounfiu, won wan woken me oris, pwal won nöün sounfiu mi wawa oris. 18 Iwe, ekewe chon Isip repwe silei pwe ngang ewe Samol mi Lapalap, lupwen üpwe pwärala ai ling won Farao me wan woken me oris, pwal won nöün sounfiu mi wawa oris.”

19 Mürin, nöün Kot we chon läng mi akom mwen ewe mwicheichen chon Israel a feila lükisökürür. Pwal ewe ürekuchu a mwöküt seni mwer o ütä lükisökürür, 20 pwe epwe nonom lefilen ewe mwicheichen re Isip me ewe mwicheichen chon Israel. Lon ewe pwinin, ewe ürekuchu a rochopwak kuku ngeni ekewe re Isip, nge a asarama kuku ngeni chon Israel, pwe resap tongeni chufengen lon unusen ewe pwin.

21 Mürin, Moses a aitiela pöün won ewe sät, nge ewe Samol mi Lapalap a aliwini ewe sät ren enienin ötiu mi fokun pöchökül lon unusen ewe pwin, pwe ewe sät a pwasatä, nge ewe lölö a kinikinfesen. 22 Iwe, ekewe aramasen Israel ra fetal lukalapen ewe sät won pwasapwas, nge ewe lölö a usun chök etip lepelifichir me lepelimöngür. ✡1.Kor 10.1-2; Ipr 11.29 23 Iwe, ekewe re Isip pwal nöün Farao oris, wan woken me nöün sounfiu mi wawa oris meinisin ra tapwerirelong lukalapen ewe sät. 24 Nge wünümweerän ewe Samol mi Lapalap a netiu me lon ewe üreekkei me ürekuchu won ekewe mwicheichen re Isip o afitikokoor, 25 pun a mwöch willen war woken, pwe ra weires le kul. Iwe, ekewe re Isip ra apasa, “Ousipwe sü seniir, pun ewe Samol mi Lapalap a peni chon Israel o fiu ngenikich.”

26 Mürin, ewe Samol mi Lapalap a üreni Moses, “Kopwe aitiela poum won ewe sät pwe lölön lon epwe liwinfengen won ekewe re Isip, won war woken pwal won nöür sounfiu mi wawa oris.” 27 Iei mine Moses a aitiela pöün won ewe sät, nge lesosorusich ewe sät a liwinfengen usun chök me mwan. Iwe, ekewe re Isip ra süwu me lon, nge ewe Samol mi Lapalap a amopuretiu lukalapen ewe sät. 28 Lölön lon a liwinfengen o pwölüela ekewe woken me ekewe sounfiu mi wawa oris, nöün Farao mwichen sounfiu meinisin mi tapweralong chon Israel lon ewe sät. Esap fokun wor eman leir a chüen manau. 29 Iwe, ekewe aramasen Israel ra fetal won pwasapwas epin ewe sät, nge ewe lölö a usun chök etip lepelifichir me lepelimöngür.

30 Lon ena rän ewe Samol mi Lapalap a amanaua chon Israel seni ekewe re Isip. Iwe, ekewe chon Israel ra küna somän ekewe re Isip arosetin ewe leni. 31 Lupwen ekewe chon Israel ra küna än ewe Samol mi Lapalap manaman a föri ngeni ekewe re Isip, ra meniniti ewe Samol mi Lapalap, ra pwal lükü i me nöün we chon angang Moses.