1 “Iwe, kopwe körato reöm Aaron pwiüm we seni lein ekewe chon Israel fiti nöün kewe mwän iter Natap, Apihu, Eleasar me Itamar, pwe repwe angang ngeniei lon wisen souasor. 2 Iwe, kopwe tei üf mi pin fän iten Aaron pwiüm we, pwe epwe pwäla lingen wisan me iteüöchün. 3 Kopwe kapas ngeni ekewe soutete üa asilelapeer o atufichiir pwe repwe tei üfen Aaron. Mürin epwe afeiöch pwe epwe angang ngeniei lon wisen souasor. 4 Ikkei ekewe pisek repwe tei: echö chechen leupw, echö üf itan efot, echö owokot, echö sööch mi pwechepwech o sikapoot, eu akkaw me efoch pelit. Iwe, repwe tei ekei üf mi pin fän iten Aaron pwiüm we me nöün kewe mwän, pwe repwe angang ngeniei lon wisen souasor.

5 Iwe, ekewe soutete repwe aea terech kolt me mangaku mi arauarau me parachol me parapar, pwal mangaku mi pwechepwech le tete. 6 Repwe föri ewe üf itan efot seni terech kolt, pwal seni mangaku mi arauarau me parachol me parapar, pwal seni mangaku mi pwechepwech, nge eman soutete epwe föri ei angang. 7 Iwe, repwe föri ruachö chechen won afaran o teiretä lekochun me won afaren ewe üf, pwe ekewe ruu pekin repwe pachefengen. 8 Kiren ewe riri won ewe efot epwe usun chök kiren ewe efot, pun epwe för seni terech kolt, pwal seni mangaku mi arauarau me parachol me parapar, pwal seni mangaku mi pwechepwech. 9 Iwe, kopwe angei ruoföü fau aüchea iter oniks o ruputi wor iten nöün Israel kewe mwän. 10 Iten wonoman leir kopwe ruputi won ewe eföü, nge iten pwal ekewe wonoman kopwe ruputi won ewe aruoföün lon tettelin ar uputiu. 11 Iwe, kopwe ruputi iten nöün Israel kewe mwän won ekewe ruoföü fau usun chök eman chon fala fau aüchea a rup won ringen pwau, kopwe pwal föri lenien ömwöchür seni kolt. 12 Iwe, kopwe amasatä ekewe ruoföü fau won chechen won afaren ewe üf itan efot, pwe föün achema iten nöün Israel kewe mwän. Iei usun Aaron epwe uwei iter won afaran me ruu pwe ngang ewe Samol mi Lapalap üpwe chechemeniir fansoun meinisin. 13 Kopwe pwal föri lenien ömwöch seni kolt 14 me ruofoch säl seni kolt mi mürina. Kopwe ona ekewe säl usun chök lül o rietä ngeni ekewe lenien ömwöch.

15 Iwe, kopwe tei ewe chechen leupw pwe eu lenien pwärätä letipen Kot. Eman soutete epwe föri ei angang. Kopwe föri seni terech kolt me mangaku mi arauarau me parachol me parapar, pwal seni mangaku mi pwechepwech, usun chök ewe efot. 16 Iwe, langataman me chölapen ewe cheech repwe nönöfengen, ükükün tiu inis, nge epwe pwal wor ruu säsärin. 17 Mürin kopwe amasalong won ewe cheech rüanü telin fau aüchea. Won aeuin telin epwe wor ülüföü fau iter sartoniks, topas me karpunkel. 18 Won aruuen telin epwe wor ülüföü fau iter emeralt, safaia me taiamont. 19 Iwe, won aülüngatin telin epwe wor ülüföü fau iter iasint, akit me ametist, 20 nge won arüanün telin epwe wor ülüföü fau iter peril, oniks me iasper. Iwe, kopwe amaserelong lon lenien ömwöchür kewe seni kolt. 21 Iei usun epwe wor engol me ruoföü fau ükükün iteiten nöün Israel kewe mwän. Iwe, iteiten eföü me eföü kewe fau epwe rup iten ekewe engol me ruu ainangen Israel won, nge ewe mak epwe usun chök rupun won ringen pwau. 22 Iwe, kopwe föri selin ewe chechen leupw seni kolt mi mürina usun chök lül mi kon. 23 Kopwe pwal föri ruofoch ring seni kolt o apacheretä lepwokukun won ewe cheech me ruu. 24 Iwe, ekewe ruofoch säl seni kolt kopwe ri ngeni ekewe ruofoch ring mi nom lepwokukun ewe chechen leupw. 25 Nge lesopun ekewe ruofoch säl repwe riri ngeni ekewe ruu lenien ömwöch mi nom won ekewe chechen won afaren ewe efot me fän mesan. 26 Iwe, kopwe pwal föri ruofoch ring seni kolt o apacheretä lepwokukun ewe cheech me fan, pwe repwe nom lefilen ewe cheech me ewe efot. 27 Kopwe föri pwal ruofoch ring seni kolt o apacheretä lesopun me fän ekewe ruachö chechen won afaren ewe efot me fän mesan, pwe epwe nom lekochun ewe efot asen ewe riri. 28 Iwe, ringen ewe chechen leupw repwe riri ngeni ringen ewe efot ren efoch säl mi arauarau, pwe epwe nom asen ririn ewe üf, pwe esap nükütomotom me won. 29 Iwe, lupwen Aaron epwe tolong lon ewe leni mi pin, epwe uwala iten nöün Israel kewe mwän won ewe chechen leupw mi nom fän mwärin pwe ngang ewe Samol mi Lapalap üpwe chechemeni nei aramas fansoun meinisin. 30 Kopwe iselong ewe Urim me ewe Tumim *Urim me Tumim ruu minen asisila letipen Kot lon ewe chechen leupw, pwe repwe nonom fän mwärin Aaron, lupwen epwe tolong fän mesei. Iei usun Aaron epwe uwei fän mwärin ewe minen asisila letipei ngeni chon Israel fansoun meinisin, lupwen epwe tolong fän mesei. ✡Num 27.21; Tut 33.8; Esr 2.63; Ne 7.65

31 Iwe, kopwe tei ewe owokot seni chök mangaku mi arauarau, epwe nom fän ewe efot. 32 Me lukalapen ewe owokot epwe wor leawan usun chök leawen eu üf, nge ünükün leawan epwe wor leisin pwe esap tongeni kam. 33 Iwe, lepwülün kopwe teätä uluulun apel seni mangaku mi arauarau me parachol me parapar, kopwe pwal teätä pel seni kolt lefiler. 34 Epwe iei usun: eu pel, eföü apel, eu pel, eföü apel won pwelin lepwülün ewe owokot. 35 Iwe, Aaron epwe üföüf ei üf, lupwen a föri an angang. Iwe, ekewe pel repwe nech, lupwen epwe tolong fän mesei lon ewe leni mi pin, pwal lupwen epwe towu. Ei epwe fis pwe esap mäla.

36 Iwe, kopwe angei kolt mi mürina o achöpöpü, kopwe pwal ruputi ekei kapas won usun rupun won ringen pwau, ‘A pin me ren ewe Samol mi Lapalap’. 37 Kopwe rietä ewe kolt mi chöpöp won eten mesen ewe akkaw ren efoch säl mi arauarau. 38 Iwe, Aaron epwe uwei won chamwan. Aaron epwe uwei sokun pupungau mi pach ngeni ekewe asor ekewe chon Israel ra apini, ese lifilifil met sokun asor ra eäni. Iwe, ewe kolt mi chöpöp epwe nom fochofoch won chamwan, pwe ekewe asor repwe tiw me rei ngang ewe Samol mi Lapalap.

39 Mürin kopwe föri ewe sööch seni mangaku mi pwechepwech o sikapoot me ewe akkaw seni mangaku mi pwechepwech o mürina, kopwe pwal tei efoch pelit epwe chü.

40 Nge kopwe pwal tei sööch me pelit me akkaw fän iten nöün Aaron kewe mwän, pwe epwe pwäla lingen wiser me iteüöchür. 41 Iwe, ekewe üf kopwe aüföüfa ngeni Aaron pwiüm we, pwal ngeni nöün kewe mwän. Kopwe epitiir o afeiöchüür, kopwe pwal apiniir pwe repwe angang ngeniei lon wiser wisen souasor. 42 Iwe, kopwe tei ar rauesesin lon seni mangaku mi pwechepwech, nge ükükür epwe seni won wila tori lepwäsuk, pwe epwe pwölüla ar selela. 43 Iwe, Aaron me nöün kewe mwän repwe aea, lupwen repwe tolong lon ewe imw mangaku ia aramas ra churiei ie, pwal lupwen repwe kan ngeni ewe rongen asor pwe repwe föri ar angang ngeniei lon ewe leni mi pin. Iei usun resap tipis ika mäla. Nge ei epwe eu allük esemüch ngeni Aaron me mwirimwirin kana.”