1 “Iei usun mine kopwe föri, lupwen kopwe apini Aaron me nöün kewe mwän pwe repwe föri ar angang ngeniei lon wisen souasor. Kopwe angei eman nienifön ätemwänin kow me ruoman ätemwänin sip esap wor terir, 2 kopwe pwal angei pilawa mi amas seni föün wiich mi mürina o föri pilawa esap wor iis lon, sokun pilawa mi tonafengen me apüra, pwal nokop mi toto ngeni apüra. 3 Iwe, kopwe iseniir lon eu chüük o uweefengenireto me ewe ätemwänin kow me ekewe ätemwänin sip. 4 Kopwe pwal emwenato Aaron me nöün kewe mwän ren asamalapen ewe imw mangaku ia aramas ra churiei ie o atütüür. 5 Mürin kopwe angei ekewe üf o aüföüfa ngeni Aaron. Ewe sööch epwe akom, mürin ewe owokot, pwal mürin ewe üf itan efot, nge ewe chechen leupw epwe nom won. Iwe, ririn ewe efot mi mürina kopwe pwal riri ngeni lukalapan. 6 Iwe, kopwe eimweimwa ngeni ewe akkaw o rietä ewe kolt mi chöpöp won, iei ewe mwärämwär mi pin. 7 Mürin kopwe angei ewe löön epit o ninätiu won möküran pwe kopwe epiti. 8 Iwe, kopwe pwal emwenato nöün Aaron kewe mwän o aüföüfa ngeniir ekewe sööch, 9 kopwe pwal peliti ngeniir ekewe pelit o eimweimwa ngeniir ekewe akkaw. Ren pwüngün ei föför ir me mwirimwirir repwe wiseni wisen souasor tori feilfeilachök. Iei usun kopwe afeiöchü Aaron me nöün kewe mwän.

10 Mürin kopwe emwenato ewe ätemwänin kow mwen ewe imw mangaku ia aramas ra churiei ie. Iwe, Aaron me nöün kewe mwän repwe isetä pöür won möküren ewe ätemwänin kow, 11 nge en kopwe niela ewe kow fän mesei leasamalapen ewe imwenfel seni mangaku. 12 Iwe, kopwe angei ekis chan ewe ätemwänin kow o aea poum le tofi ngeni mächän ewe rongen asor, nge ewe lusun cha kopwe ninätiu ünükün ewe rongen asor. 13 Mürin kopwe angei kirisin meinisin mi pwölüela pisekin lon inisin, pwal mwärekeon ammünün me ekewe ruoföü föün lon fiti kirisir o kenirela won ewe rongen asor. 14 nge fituken ewe ätemwänin kow me silin pwal taran kopwe kenirela lükün ewe ia chon Israel ra nonom ie, pun iei eu asoren tipis fän iten ekewe souasor.

15 Mürin kopwe angei eman lein ekewe ätemwänin sip, nge Aaron me nöün kewe mwän repwe isetä pöür won möküran. 16 Iwe, kopwe niela ewe ätemwänin sip, kopwe angei chan o äsupufetalei ngeni pwelin ewe rongen asor. 17 Mürin kopwe kinikisietiu fituken ewe ätemwänin sip o limeti pisekin lon inisin pwal pöün me pechen. Iwe, kopwe achufengeniir meinisin fiti möküran 18 o kenala kinikinin ewe ätemwänin sip meinisin won ewe rongen asor. Iei eu asoren kek ngang ewe Samol mi Lapalap üa efich pwoon. ✡Ef 5.2; Filip 4.18

19 Iwe, kopwe angei ewe aruomanün ätemwänin sip, nge Aaron me nöün kewe mwän repwe isetä pöür won möküran. 20 Mürin kopwe niela ewe ätemwänin sip, kopwe angei ekis chan o tofi ngeni emin fän pelifichin selingen Aaron, pwal ngeni emin fän pelifichin selingen nöün kewe mwän, kopwe pwal tofi ngeni aütülapen pelifichin pöür me pecher, nge ewe lusun cha kopwe äsupufetalei ngeni pwelin ewe rongen asor. 21 Iwe, kopwe angei ekis cha me won ewe rongen asor me ewe löön epit o äsupu ngeni Aaron me üfan, pwal ngeni nöün kewe mwän me üfer. Iwe, Aaron me üfan kewe repwe pin, pwal nöün kewe mwän me üfer.

22 Kopwe pwal angei kirisin ewe ätemwänin sip, kirisin ükün, ewe kiris mi pwölüela pisekin lon inisin, mwärekeon ammünün, ekewe ruoföü föün lon fiti kirisir, pwal pelifichin pechen, pun ei ätemwänin sip eu asoren afeiöch. 23 Iwe, kopwe angei eföü pilawa, eföü pilawa mi tonafengen me apüra, pwal echö nokop seni lon chükün ewe pilawa esap wor iis lon mi nom fän mesei. 24 Ekei mettoch meinisin kopwe isenalong lepöün Aaron me lepöün nöün kewe mwän, pwe repwe assawereto fän mesei, pun eu asoren assaw. 25 Mürin kopwe angei ekei mettoch seni lepöür o kenirela won ewe rongen asor pwe epwe pach ngeni ewe asoren kek. Iei eu asor ngang ewe Samol mi Lapalap üa efich pwoon.

26 Kopwe pwal angei leupwen ewe ätemwänin sip fän iten afeiöchün Aaron o assawa fän mesei, pun eu asoren assaw. Iei ükükün inetum. 27 Iwe, kopwe apini kinikinin fituken ewe ätemwänin sip, ewe asoren afeiöch, pwe inetin Aaron me nöün kewe mwän: ewe leupw me ewe peche a fen assaw. 28 Ikkei inetin Aaron me nöün kewe mwän, repwe angei me ren ekewe chon Isrel iteiten fansoun meinisin. Pun iei ewe asor ekewe chon Israel repwe fang ngeniei seni ar kewe asoren kinamwe.

29 Mürin än Aaron mäla üfan kewe mi pin nöün kewe mwän repwe pwal üföüf le epit o afeiöch far, lupwen repwe seikitä ngeni wisen souasor. 30 Iwe, nöün we mi siwili lon wisan wisen souasor epwe üföüf ekewe üf lon ükükün fisu rän, lupwen an tolong lon ewe imw mangaku ia aramas ra churiei iei, pwe epwe föri an angang lon ewe leni mi pin.

31 Iwe, kopwe angei fituken ewe ätemwänin sip fän iten asoren afeiöch o amota lon eu leni mi pin. 32 Aaron me nöün kewe mwän repwe ochoch fituken ewe ätemwänin sip o mongö ekewe pilawa mi nom lon ewe chüük leasamalapen ewe imw mangaku ia aramas ra churiei ie. 33 Iei usun repwe mongö ewe asor a fis amusamusen tipis ren, lupwen ra afeiöch o apinipinila. Nge esap wor eman lükür epwe mongö seni, pun a pin. 34 Iwe, sorotän ewe rän, are a chüen wor ekis lusun fituk me pilawa seni ewe asoren afeiöch, kopwe kenirela meinisin pwe esap wor eman epwe mongö, pun ra pin.

35 Iei usun kopwe föri ngeni Aaron me nöün kewe mwän meinisin mine üa allük ngonuk. Lon ükükün fisu rän epwe fis angangen afeiöch wor. 36 Iwe, iteiten rän kopwe eäni asoren amusamusen tipis eman ätemwänin kow. Kopwe pwal alimöchü ewe rongen asor ren om föri asoren limelim fän itan. Mürin kopwe epiti pwe epwe pin. 37 Lon ükükün fisu rän kopwe föri asoren limelim fän iten ewe rongen asor, kopwe pwal apini. Mürin, ewe rongen asor epwe unusen pin, nge meinisin mine epwe toori epwe pwal pin.”

38 “Ikkei ekewe mettoch kopwe eäni asor won ewe rongen asor: Iteiten rän tori feilfeilachök kopwe eäni asor ruoman lam eu ierir. 39 Ewe aemanün kopwe eäni asor lesosor, nge ewe aruomanün kopwe eäni lekuniol. 40 Iwe, kopwe afiti ngeni ewe aemanün lam ruu paun pilawa mi mürina nofitfengen me eu kuoch apüra seni föün olif mi üsüs, pwal eu kuoch wain pwe eu asoren ün. 41 Nge ewe aruomanün lam kopwe eäni asor lekuniol, kopwe pwal afiti ngeni ewe asoren mongö me asoren ün usun chök ewe asor a fis lesosor. Ei epwe eu asor ngang ewe Samol mi Lapalap üa efich pwoon. 42 Ei asoren kek mwirimwirimi kana repwe eäni fansoun meinisin me leasamalapen ewe imwenfel seni mangaku fän mesei ngang ewe Samol mi Lapalap. Iei ei leni üpwe churikemi ie pwe üpwe kapas ngenikemi. 43 Eiia üpwe churi chon Israel ie, ei leni epwe pin, pun ai ling epwe nom lon. 44 Iwe, üpwe apini ewe imwenfel seni mangaku me ewe rongen asor, üpwe pwal apini Aaron me nöün kewe mwän pwe repwe pin o angang ngeniei lon wiser wisen souasor. 45 Iwe, üpwe imweimw lein ekewe chon Israel pwe üpwe ar Kot. 46 Nge ir repwe silei pwe ngang ewe Samol mi Lapalap ar we Kot, üa emwenirewu seni lon ewe fanü Isip pwe üpwe imweimw lefiler. Ngang ewe Samol mi Lapalap ar we Kot.”